9
Kilisou ren än Kot eäni pwüng le kapwüng
9.1-20
Ngeni ewe mi emweni chon köl: Ei köl usun ngingin ewe köl itan ‘Mälan ewe Nau’. Echö än Tafit köl.
Üpwe kilisou ngonuk, ai Samol mi Lapalap, ren unusen lelukei,
üpwe apworausa usun om kewe föför meinisin mi amwarar.
Üpwe pwapwa o ingemwareituk,
üpwe kölün mwareituk, En ewe mi Unusen Tekia.
 
Ekewe chon oputaei ra kulsefäl, lupwen ka waroto,
ra turula o mäla.
Ka apwüngala pwe üa pwüng,
en ka mot won om lenien mot o eäni kapwüng fän pwüng.
 
Ka apwüngü chon ekewe mwü,
ka arosala ekewe aramasangau,
esap wor eman epwe chüen chechemeniir tori feilfeilachök.
Ekewe chon oputem ra feiengau o rosola.
Ka ataela ar kewe telinimw
pwe esap wor eman epwe chüen chechemeniir.
 
Nge ewe Samol mi Lapalap a king tori feilfeilachök,
a anüküchara an lenien motun king pwe epwe eäni kapwüng.
Iwe, a apwüngü chon fanüfan fän pwüng,
a apwüngü chon ekewe mwü fän wenechar.
 
Ewe Samol mi Lapalap eu lenien op mi pöchökül fän iten ekewe mi riaföü,
eu lenien manau lon fansoun riaföü.
10 Chokewe mi silei en ra anomu ar apilükülük womw,
pun en, ai Samol mi Lapalap, kosap kul seni chokewe mi feito reöm.
 
11 Oupwe kölün mwareiti ewe Samol mi Lapalap mi imweimw lon Sion,
oupwe apworausa an kewe föför ngeni chon ekewe mwü.
12 Kot a chechemeni chokewe mi riaföü,
esap manlükala ar siö,
nge epwe ngeni ekewe chon föföringau chappen ar föför.
 
13 Ai Samol mi Lapalap, kopwe ümöümöch ngeniei!
Kopwe nenengeni ai riaföü ren chokewe mi oputaei.
Ai Samol mi Lapalap, kopwe angasaeila seni mäla,
14 pwe üpwe tufichin pwärätä mwen ekewe aramasen Jerusalem
ekewe metoch meinisin üa mwareituk ren.
Üpwe pwal pwapwa pun ka angasaeei.
15 Iwe, chon ekewe mwü ra turulong lon ewe pwang ra püsin tuw,
ra tup lon ewe sär ra püsin aopala.
16 Ewe Samol mi Lapalap a pwärala püsin i ren an eäni kapwüng fän pwüng.
Ekewe aramasangau ra tup lon püsin ar föför.
 
17 Iwe, ekewe aramasangau repwe fokun feil ngeni mäla,
pwal chon ekewe mwü meinisin mi pöütala Kot.
18 Kot esap manlükala ekewe chon mwelele tori feilfeilachök,
pwal än chon wöüngau apilükülüköch esap tala tori feilfeilachök.
 
19 Ai Samol mi Lapalap, kopwe feito! Kosap mwütätä pwe aramas repwe ü ngonuk.
Chon ekewe mwü repwe kapwüng fän mesom.
20 Ai Samol mi Lapalap, kopwe eniweer.
Kopwe asile ngeniir pwe ir aramas echök repwe mäla.