Paipel KÖLFEL 7
7
Eu iotekin tüngor aleleten pwüng
7.1-17
Echö än Tafit Sikaion, a köl ngeni ewe Samol mi Lapalap usun Kus ewe re Peniamin.
Ai Samol mi Lapalap ai Kot, üa feito pwe üpwe op reöm,
kopwe amanauaei seni chokewe meinisin mi tapweriei. Kopwe angasaeila,
pwe resap etekinieila o atatakisi fitukei
usun chök mine eman laion a föri,
nge esap wor eman a chimanüei.
 
Ai Samol mi Lapalap, ai Kot,
are üa föri eu lein ekei föför,
are üa föri och mi mwäl ngeni eman,
are üa liwini än chienei kirikiröch ngeni mi ngau,
ika angei och fän pöchökül seni chon oputaei, nge esap wor popun,
mürin, ekewe chon oputaei repwe tapweriei o liapeniei,
repwe atatakisiei, repwe nieila
o likitieila lepwül.
 
Ai Samol mi Lapalap, kopwe ütä lon om song,
kopwe awenokota o ü ngeni än ekewe chon oputaei lingeringeritiei.
Kopwe pwätä o alisiei, ai Kot en mi allük pwe epwe fis pwüng.
Kopwe amwichato chon ekewe mwü ünükum,
nge en kopwe nom aser o nemeniir.
En ka apwüngü chon ekewe mwü meinisin.
Ai Samol mi Lapalap, lon om kapwüng kopwe pwärätä pwe üa pwüng,
pun ka silei pwe esap wor ai tipis.
En ewe Kot mi pwüng, ka etittina ekiekin me tipen aramas.
Kopwe aükätiu än ekewe aramasangau föför mi ngau,
nge kopwe anüküchara ekewe chon pwüng. Pwär 2.23
10 Kot a tümwünüei,
a amanaua chokewe mi aleasochisi i.
11 Kot eman soukapwüng mi pwüng,
eman Kot mi apwüngü ekewe aramasangau fansoun meinisin.
12 Are eman aramas esap mochen ekieksefäl,
Kot epwe seimi nöün ketilas,
epwe emeia an likapich o änna ngeni.
13 A amolätä an pisekin maun mi afeiengau,
pwal wokun föün esefich mi ngetenget.
 
14 Nengeni, ekewe aramasangau ra chök ekiekietä mine a ngau,
ra chök föri föför esepwüng o eäni kapas chofana.
15 Iwe, ra tuw pwang pwe aramas repwe tup lon,
nge ra püsin turulong lon.
16 Ar föför esepwüng epwe püsin ukur chök,
nge liwinin ar föförün mwäneson epwe püsin küür.
 
17 Üpwe kilisou ngeni ewe Samol mi Lapalap pokiten an pwüng,
üpwe pwal kölün mwareiti ewe Samol mi Lapalap, Ewe mi Unusen Tekia.

7:9: Pwär 2.23