Paipel KÖLFEL 5
5
Eu iotek pwe Kot epwe tümwünükich
5.1-12
Ngeni ewe mi emweni chon köl: Won ekewe aangün. Echö än Tafit köl.
Ai Samol mi Lapalap, kopwe aüselinga ai kei kapas,
kopwe ekieki ai ngüngü fän weires.
Kopwe rongorong ai siö,
ai king me ai Kot,
pun üa iotek ngonuk.
 
Ai Samol mi Lapalap, ka rongorong mweliei lesosor,
lesosorusich üa iotek ngonuk o witiwiti om kopwe pälüeniei.
Pun en sap eman Kot mi sani mine a ngau,
eman chon föföringau esap tongeni nonom reöm.
Ekewe mi sikesik resap tongeni ü fän mesom,
ka oput chokewe meinisin mi föföringau.
Ka arosala chokewe meinisin mi kapas chofana.
Ka oput chon niela aramas me chon atupu aramas.
 
Nge ngang üpwe tolong lon imwom pokiten om we tong ellet mi lap o somwola.
Üpwe fel ngonuk lon imwom we mi pin
o chapetiu mwom fän menin.
Ai Samol mi Lapalap, kopwe atufichiei pwe üpwe föri letipom,
pun mi wor chon oputaei mi nenengeniei,
kopwe aiti ngeniei mine üpwe föri.
 
Chon oputaei ra apasa mine a chofana,
leluker a chök ekiekin kata,
ar kapas a motoutou,
nge ra uren atuputup mi afeiengau. Rom 3.13
10 Ai Kot, kopwe ngeniir liwinin ar tipis.
Repwe feiengau ren püsin ar raw.
Kopwe pöütirela pokiten a chomong ar pupungau,
pun ra ü gonuk.
 
11 Nge chokewe meinisin mi anomu ar apilükülük womw repwe meseik,
repwe köl fän pwapwa fansoun meinisin.
Kopwe peni chokewe mi echenuk,
pwe repwe ingemwareituk.
12 Pun en, ai Samol mi Lapalap, ka afeiöchü ekewe chon pwüng,
ka pwölürela ren om ümöümöch usun chök eu tittin maun.

5:9: Rom 3.13