4
Iotekin lekuniol pwe Kot epwe alilis
4.1-8
Ngeni ewe mi emweni chon köl: Won pisekin ettik mi wor saitenin. Echö än Tafit köl.
Ai Kot, en mi pwüng, kopwe pälüeniei, lupwen üa kökö.
Ka fen angasaeila, lupwen üa nom lon riaföü.
Kopwe ümöümöch ngeniei o aüselinga ai iotek.
 
Ämi aramas, ifa ükükün fansoun ämi oupwe chüen aitengauaei?
Ifa ükükün fansoun ämi oupwe aücheani mine a lomotongau
o tipeni mine a mwäl?
 
Nge oupwe silei pwe ewe Samol mi Lapalap a aimwüela chokewe mi pwüng fän püsin itan.
Ewe Samol mi Lapalap a rongorong, lupwen üa kökköri.
 
Are oua song, oupwe afälikemi pwe ousap tipis ren.
Oupwe ekieki ei lon lelukemi,
lupwen ämi konola lon kiemi fän mosonoson. Ef 4.26
Oupwe eäni sokun asor mi pwüng ngeni ewe Samol mi Lapalap
o anomu ämi apilükülük won.
 
Chomong aramas ra apasa,
“Iö a tongeni fang ngenikich feiöch?”
Ai Samol mi Lapalap, kopwe netiu wom o kirikiröch ngenikem.
Ka fen ngeniei pwapwa mi lap seni än chokewe pwapwa
ren kinier wiich me ünümer wain mi somwola.
 
Üpwe konola o möür fän kinamwe,
pun en echök, ai Samol mi Lapalap, ka tümwünüöchüei.

4:4: Ef 4.26