30
Mine Akur a nenengeni
30.1-33
Ikkei ekewe kapas än Akur nöün Jake we mwän seni Masa:
Üa aweiresiei, ai Kot, üa aweiresiei,
nge iei üa aiengau.
Ellet, ngang eman mi fokun tiparoch lap seni aramas meinisin,
esap wor rei än eman aramas mirit.
Üsap kaiö tipachem,
esap pwal wor ai silei usun Ewe mi Unusen Pin.
Iö a feitä läng o liwinsefälitiu?
Iö a tongeni kumwuchufengeni asepwäl?
Iö a tongeni üfätä ekewe koluk lon echö üf?
Iö a förätä kiännin fanüfan meinisin?
Ifa itan? Nge ifa iten nöün we mwän? Kopwe üreniei are ka silei!
Än Kot kewe kapas meinisin ra let. I a usun chök eu tittin maun fän iten chokewe mi op ren. Kosap apacha och ngeni an kewe kapas, pwe esap apwünguk, nge epwe pwä pwe en eman chon chofana.
Ai Kot, ruu mettoch üa tüngor senuk, kosap amwöchüür seniei mwen ai üpwe mäla: Kopwe alisiei pwe üsap eäni kapas atuputup me kapas chofana. Kosap mwüt ngeniei ai üpwe wöüngau ika wöümong, nge kopwe chök ngeniei enei mongö iteiten rän. Pun are üpwe fokun mötüla, üpwe tongeni amamäsinuk o apasa, “Iö na ewe Samol mi Lapalap?” Nge ika üpwe wöüngau, üpwe solä o atoto itengau won iten ai Kot.
10 Kosap aturumwäli eman chon angang ngeni an samol, pun epwe ottekiik, nge en kopwe angei liwinin om we föför.
11 Mi wor aramas ra otteki semer, resap pwal kilisou ngeni iner. 12 Mi wor aramas ra ekieki pwe ra püsin limöch, nge ra fokun limengau. 13 Mi wor aramas ra chök fetaläsengeseng, won meser a pwä pwe ra lamalamtekia. 14 Mi wor aramas ra chök ariaföüü ekewe chon wöüngau me chon mwelele lein ekewe aramas, pwe repwe pisekisekila ren. Ei lapalap ra föri pwe repwe manau seni.
15 Och sokun pweechar mi ünümi cha a wor ruoman nöün föpwül. Ir me ruoman ra kökkö, “Ngeniei, ngeniei.” Mi wor rüanü mettoch resap fokun tongeni menemenöch:
16 Ewe lenien sotup,
eman fefin mi rit,
fanü esap menemenöch ren püngün üt,
pwal ekkei esap tongeni ükütiu le küri mettoch.
17 Eman mi urumwotei saman o aleasolap ngeni inan, ekewe ängä repwe alusawu föün mesan, nge ekewe machang iter wolcher repwe ochei fitukan.
18 Rüanü mettoch ra kon amwarar ngeniei, pwe üsap tongeni weweitiir:
19 Usun än eman ikel äkkäs fän läng,
usun än eman serepenit tö won eu achau,
usun än efoch sip sai won mataulap,
pwal usun lapalapen än eman alüal tongei eman föpwül.
20 Iei usun föförün eman fefin mi kirikiringau ngeni pwülüan: A lisowu ngeni pwal eman, a tütü o apasa, “Üsap föri och mi ngau.”
21 Mi wor rüanü mettoch fanüfan esap pwäk ngeni:
22 Eman amanau mi tolong lon wisen king,
eman chon tiparoch a wor anan mongö pwe a tongeni möt,
23 eman fefin esap wor eman a tongei, nge a pwüpwülü,
pwal eman chon angang fefin mi siwili an samol fefin lon wisan.
24 Mi wor rüanü mwichen man won fanüfan ra men kükün, nge ra fokun tipachem:
25 Ekewe molus, ir eu mwich mi apwangapwang, nge ra amolätä ener mongö lon fansoun räs.
26 Ekewe man iter pächer, ir eu mwich esap pöchökül, nge ra föri lenier lon ekewe achau.
27 Ekewe lifichimas esap wor ar king, nge ir meinisin ra fetal lon tettelir.
28 Ekewe litopach, ka tongeni amwöchü eman lon poum, nge ra nom lon imwen ekewe king.
29 Mi wor föman mönümanau mi üwenewen lon ar fetal:
30 Eman laion mi pöchökül seni lein ekewe manmwacho meinisin,
esap tongeni niuokusiti eman,
31 säsän eman ätemwänin chuko, eman ätemwänin kuuch,
me eman king, lupwen a fetal mwen nöün mwichen sounfiu.
32 Are ka tiparoch ren om püsin atekiokotä, ika ka ekiekietä mine a ngau, kopwe fanafanala. 33 Pun are ka wichiki milik, epwe fisitä pwötö, are ka afönü pwötün eman, epwe cha, nge are ka afisätä song, epwe wor fitikoko.