Paipel ÄN SALOMON FOS (PROFERPIS) 22
22
Kopwe filätä iteüöch lap seni wöümong, pun än aramas aücheanikich a mürina seni silifer ika kolt. Ekewe chon pisekisek me ekewe chon wöüngau ra wewefengen lon ei lapalap, pwe ewe Samol mi Lapalap a föriir meinisin. Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau. Wöü me iteüöch me manauatam, iei ewe liwin fän iten eman mi tipetekison o niuokusiti ewe Samol mi Lapalap. Lon alen ekewe aramasangau a wor iräfölüföl me sär, nge eman mi tümwünü manauan epwe toau seniir. Kopwe akaiti ngeni eman semirit usun mine epwe föri lon manauan, pun lupwen epwe chinlap, esap likitala mine a kaiö. Ekewe chon pisekisek ra nemeni ekewe chon wöüngau, nge ewe chon paaro i nöün ewe chon mwütätä amanau. Eman mi fotuki pwüngingau epwe kini feiengau, nge an ariaföüü aramas epwe müchüla. Eman mi eäni kirikiröch epwe feiöch, pun a ineti anan mongö ngeni ekewe chon wöüngau. 10 Kopwe asüela eman chon turunufas, mürin esap chüen fis fitikoko, anini me kapasingau. 11 Eman mi eäni eu leluk mi limöch o eäni kapas pwetete, ewe king epwe chiechi ngeni. 12 Ewe Samol mi Lapalap a tümwünü chon silelap, nge a atai än chon chofana kapas. 13 Ewe chon chipwang a apasa, “A wor eman laion lükün imwei, a tongeni fis pwe üpwe mäla won ewe al.” 14 Än eman fin lisowu kapas ra usun chök eu pwang mi alolol, ätewe ewe Samol mi Lapalap a song ngeni epwe turulong lon. 15 Semirit ra chök föri föförün chon tiparoch, nge lupwen ra angei wichiwich, repwe kaiö mine a öch. 16 Eman mi ariaföüü ekewe chon wöüngau pwe epwe awatteloi wöün ika fangala lifang ngeni ekewe chon pisekisek, epwe chök wöüngauala.
Än ekewe chon tipachem kapasen kait me kapasen fön
22.17-24.34
17 Kopwe aü selingom o rongorong, pun üpwe aiti ngonuk än ekewe chon tipachem kapas. Kopwe kaiö ngeni ar kewe kapasen kait. 18 Pun kopwe pwapwa ren om kopwe amwöchüür lon lelukom o molotä ngeni om kopwe apaserewu. 19 Üa mochen pwe kopwe anomu om apilükülük won ewe Samol mi Lapalap, iei mine üa asile ngonuk ekei kapas ikenai.
20 Üa maketiu fän itom ilik mwiitun mi masou ren kapasen öüröür me silelap. 21 Repwe aiti ngonuk mine a pwüng o let, pwe kopwe tongeni atowu pälüöchün ekewe kapas ngeni chokewe mi tinukela.
-1-
22 Kosap angei pisek seni eman chon wöüngau, pokiten i a wöüngau, kosap pwal ariaföüü ewe chon mwelele lon kapwüng, 23 pun ewe Samol mi Lapalap epwe peniir o ariaföüü chokewe mi ariaföüür.
-2-
24 Kosap chiechi ngeni eman aramas mi songokai, kosap pwal eti eman mi lingeringerikai, 25 pwe kosap kaiö lapalapan o püsin afeiengauok.
-3-
26 Kosap pwon pwe kopwe mönätiu än eman liwinimang. 27 Pun are esap wor mine kopwe liwini ngeni, repwe mwo nge angei senuk kiom.
-4-
28 Kosap amwökütü kiännin eu fanü om kewe lewo ra fen förätiu me lomlom.
-5-
29 Ka silei eman aramas mi sipeöch lon an angang? Ätewe epwe angang ngeni ewe king, nge esap angang ngeni aramas kis.
-6-