Paipel NUMPERIS 16
16
Kora, Tatan me Apiram ra ü ngeni Moses
16.1-50
Iwe, Kora nöün Isar, nge Isar nöün Kohat, nge i nöün Lefi mwän, pwal Tatan me Apiram nöün Eliap kewe mwän me On nöün Pelet mwän seni ewe ainangen Rupen Jut 11 ra ü ngeni Moses. A pwal chu ngeniir ükükün ruopükü lime chon Israel, ir souemwen mi iteüöch, ra fil seni ewe mwichen aramas pwe repwe nöür souemwen. Iwe, ra mwichfengen o ü ngeni Moses me Aaron. Iwe, ra üreniir, “Ämi oua kon alapala nemeniemi. Pun unusen ei mwichen aramas a pin, nge ewe Samol mi Lapalap a nom lefiler. Pwota oua püsin atekiakemiitä won än ewe Samol mi Lapalap mwich?” Iwe, lupwen Moses a rong ekei kapas, a chapetiu lepwül o iotek. Mürin a üreni Kora me chienan kewe meinisin, “Lesosorun lesor ewe Samol mi Lapalap epwe pwärätä iön nöün pwal iön a pin. Epwe pwal pwärätä iön a mwüt ngeni pwe epwe kan ngeni. Ätewe Kot a filätä epwe kan ngeni. Iei usun oupwe föri: Lesor, ämi Kora me chienom kewe meinisin oupwe angei sepien asoren ötüöt. Oupwe uwalong ekkei lor o iseis apach mi pwokus wor fän mesen ewe Samol mi Lapalap. Nge ätewe ewe Samol mi Lapalap epwe filätä, i epwe pin. Ämi kana mwän seni ewe ainangen Lefi oua kon alapala nemeniemi.” Iwe, Moses a pwal üreni Kora, “Iei oupwe aüseling, ämi chon ewe ainangen Lefi. Ifa usun, esap naf ngenikemi pwe än chon Israel we Kot a aimwükemi seni ewe mwichen chon Israel, a pwal mwüt ngenikemi pwe oupwe kan ngeni o föri angangen lon än ewe Samol mi Lapalap imwenfel seni mangaku? Oua pwal ü mwen ewe mwichen aramas pwe oupwe angang ngeniir. 10 Kot a mwüt ngenikemi me pwimi kewe seni ewe ainangen Lefi pwe oupwe kan ngeni. Nge iei oua pwal kütta ewe wisen souasor. 11 Iei mine oua ü ngeni ewe Samol mi Lapalap, ämi me chienom kewe mi mwichefengen. Pun iö Aaron pwe oua lal ngeni?”
12 Mürin, Moses a titi Tatan me Apiram nöün Eliap kewe mwän. Nge ir ra üra, “Äm aisap feila. 13 Ifa usun, esap naf me reöm pwe ka emwenikeemiwu seni ewe fanü mi pwülüöch o fanüeräs, pwe kopwe nikem lon ewe fanüapö? Ifa usun, kopwe pwal seikuketä pwe kopwe samol wom? 14 Kosap fokun emwenikeemilong lon eu fanü mi pwülüöch o fanüeräs, kosap pwal ngenikem fanü me tanipin wain pwe aipwe fanüeni. Ifa usun, kopwe pwal atupu ekei aramas? Äm aisap feila.”
15 Mürin, Moses a fokun song ren ekei kapas o üreni ewe Samol mi Lapalap, “Kosap etiwa ar kewe asor. Ngang üsap mwo nge angei eman aas seniir, üsap pwal föri och mi mwäl ngeniir.” 16 Iwe, Moses a üreni Kora, “Ämi me chienom kewe meinisin, oupwe feito lesor ren ewe imw mangaku ia aramas ra churi Kot ie, ämi pwal Aaron. 17 Iwe, eman me eman leimi epwe angei an sepien asoren ötüöt, epwe iseis apach mi pwokus lon o uwato fän mesen ewe Samol mi Lapalap. Iwe, epwe wor ruopükü lime sepien asoren ötüöt, pwal en me Aaron oupwe uwato ämi sepien asoren ötüöt.” 18 Iei mine ekewe mwän meinisin ra angei ar sepien asoren ötüöt, ra uwalong ekkei lor o iseis apach mi pwokus wor. Iwe, ra ütä leasamalapen ewe imwenfel seni mangaku, nge Moses me Aaron ra pwal ütä rer. 19 Mürin, Kora a amwichafengeni ekewe aramas meinisin leasamalapen ewe imwenfel seni mangaku, pwe repwe ü ngeni Moses me Aaron. Iwe, lingen ewe Samol mi Lapalap a pwä ngeni ewe mwichen aramas meinisin.
20 Iwe, ewe Samol mi Lapalap a üreni Moses me Aaron, 21 “Oupwe aimwükemi seni ekei aramas pwe üpwe aroserela fän eu chök.” 22 Nge ir ra chapetiu lepwül o apasa, “Äm Kot, en popun manauen aramas meinisin. Ifa usun, kopwe song ngeni unusen ewe mwichen aramas are eman chök mwän a tipis?” 23 Mürin, ewe Samol mi Lapalap a kapas ngeni Moses, 24 “Kopwe üreni ekewe aramas pwe repwe sü seni imwen Kora, Tatan me Apiram.”
25 Mürin, Moses a feila ren Tatan me Apiram, nge ekewe souakomwen Israel ra tapwela mürin. 26 Iwe, a üreni ekewe aramas, “Üa tüngor ngenikemi, oupwe feil seni imwen ekei mwän mi föföringau. Ousap atapa och pisekir, pwe ousap pwal etiir le tolong lon ewe feiengau epwe toriir pokiten ar kewe tipis.” 27 Iei mine ekewe aramas ra sü seni imwen Kora, Tatan me Apiram. Nge Tatan me Apiram ra towu o ütä leasamalapen imwer kewe fiti pwülüer me nöür mwän pwal nöür semirit. 28 Iwe, Moses a üra, “Ren ei oupwe silei pwe ewe Samol mi Lapalap a akünöüei pwe üpwe föri ekei föför meinisin, nge üsap püsin ekiekietä. 29 Are ekei mwän ra mäla lon sokun mälan armamas, ika a fis ngeniir mine a fis ngeni aramas meinisin, ewe Samol mi Lapalap esap akünöüei. 30 Nge are ewe Samol mi Lapalap epwe afisätä och mettoch mi fö, are ewe pwül epwe sangfesen o oromirela fiti pisekir meinisin pwe ra feilmanauetiu lon lenien sotup, oupwe silei pwe ekei mwän ra turunufasei ewe Samol mi Lapalap.”
31 Iwe, wesin chök än Moses üra ekei kapas, ewe pwül fän Tatan me Apiram a sangfesen 32 o oromirela fiti ar famili meinisin, pwal chienen Kora kewe mwän meinisin me pisekir meinisin. 33 Iei usun ir meinisin ra feilmanauetiu lon lenien sotup fiti pisekir meinisin. Iwe, ewe pwül a pwölürela pwe ra mola seni me lein ewe mwichen aramas. 34 Iwe, ekewe chon Israel meinisin mi nom ünükür ra sü, lupwen ra rong ar puchör. Ra puchör le apasa, “Sipwe sü pwe ewe pwül esap pwal oromikichela.” 35 Nge ekkei a feitiu seni ewe Samol mi Lapalap o kenala ekewe ruopükü lime mwän mi eäni ekewe asoren ötüöt.
36 Mürin, ewe Samol mi Lapalap a kapas ngeni Moses, 37 “Kopwe üreni Eleasar nöün ewe souasor Aaron we mwän, epwe angei ekewe sepien asoren ötüöt seni lon molien ewe ekkei, pun ra pin. Epwe pwal atoropasala molien ewe ekkei ekis toau. 38 Nge ekewe sepien asoren ötüöt än ekewe mwän mi mäla pokiten ar tipis, repwe nechenech o achöpöp pwe pwölüpwölün ewe rongen asor. Pokiten ra aea le asor me fän mesen ewe Samol mi Lapalap, iei mine ra pin. Iwe, repwe eu asisilen fön ngeni ekewe aramasen Israel.” 39 Mürin, ewe souasor Eleasar a angei ekewe sepien asoren ötüöt mi för seni piras, chokewe mi kar ra aea le asor. Iwe, a necheer o achöpöpüür pwe pwölüpwölün ewe rongen asor. 40 Iwe, ekei pisek repwe achema ngeni ekewe aramasen Israel, pwe esap wor eman epwe kanoto pwe epwe keni apach mi pwokus fän mesen ewe Samol mi Lapalap, chilon chök ekewe mwirimwirin Aaron, pwe esap fis ngeni usun mine a fis ngeni Kora me chienan kewe. Iwe, ra föri meinisin usun mine ewe Samol mi Lapalap a allük ngeni Moses fän iten Eleasar.
41 Nge sorotän ewe rän ekewe aramasen Israel ra lal ngeni Moses me Aaron o apasa, “Ämi oua niela nöün ewe Samol mi Lapalap aramas.” 42 Iwe, lupwen ekewe aramas ra chufengen pwe repwe ü ngeni Moses me Aaron, ra kul ngeni ewe imw mangaku ia aramas ra churi Kot ie o küna pwe ewe kuchu a pwölüöla o lingen Kot a pwä. 43 Mürin, Moses me Aaron ra feito ren asamalapen ewe imw mangaku ia aramas ra churi Kot ie. 44 Nge ewe Samol mi Lapalap a üreni Moses, 45 “Oupwe merela seni ei mwichen aramas pwe üpwe aroserela fän eu chök.” Iwe, ir me ruoman ra chapetiu lepwül. 46 Mürin, Moses a üreni Aaron, “Kopwe angei om sepien asoren ötüöt, kopwe atolonga ekkei seni won ewe rongen asor o iseis apach mi pwokus won. Kopwe müttir uwala ren ewe mwichen aramas o föri asoren amusamusen tipis fän iter. Pun än ewe Samol mi Lapalap song a feitiu, nge ewe mätter a fen popuetä.” 47 Iei mine Aaron a angei ewe sepien asoren ötüöt, usun Moses a üreni, o säla lein ekewe aramas. Nge lupwen Aaron a küna pwe ewe mätter a fen popuetä lein ekewe aramas, a iseis apach mi pwokus lon ewe sepien asoren ötüöt o föri asoren amusamusen tipis fän iten ekewe aramas. 48 Iwe, a ütä lefilen ekewe mi mäla me ekewe mi manau, nge ewe mätter a kaüla. 49 Iwe, iteiten chokewe mi mäla ren ewe mätter ükükün engol me rüanüngeröü füpükü lükün chokewe mi mäla pokiten ar eti Kora le tipis. 50 Nge lupwen ewe mätter a kaüla, Aaron a liwinla ren Moses leasamalapen ewe imw mangaku ia aramas ra churi Kot ie.

16:1: Jut 11