10
Ekewe rappwa seni silifer
10.1-10
Iwe, ewe Samol mi Lapalap a üreni Moses, “Kopwe föri ruofoch rappwa seni silifer mi nechenech ngeni ama. Iwe, kopwe ettikiir, lupwen kopwe körifengeni ekewe aramasen Israel, pwal lupwen repwe atomwala imwer. Iwe, lupwen ekewe ruofoch rappwa repwe tikitam, ekewe aramasen Israel meinisin repwe mwichefengen reöm leasamalapen ewe imw mangaku ia aramas ra churiei ie. Nge ika efoch chök a tik, ekewe souemwen, ekewe mwänirelan ekewe ainangen Israel repwe mwichefengen reöm. Iwe, lupwen oupwe ettiki ewe tikin asilesil mi tikimoch, ekewe aramas mi nonom peliötiuen ewe imwenfel seni mangaku repwe sai. Nge lupwen oupwe ettiki ewe tikin asilesil mi tikimoch fän aruuan, ekewe mi nonom peliörün repwe sai. Ewe tikin asilesil mi tikimoch epwe tik iteiten fansoun repwe sai. Iwe, lupwen ekewe aramasen Israel repwe mwichefengen, oupwe chök ettikitama ekewe rappwa, nge ousap ettiki ewe tikin asilesil mi tikimoch. Iwe, nöün Aaron kewe mwän ekewe souasor repwe ettiki ekewe rappwa. Ei epwe eu allük fochofoch ngenikemi seni eu täppin aramas tori eu täppin. Iwe, lupwen oupwe feila maun ngeni chon oputakemi mi ariaföüükemi me lon fanüemi, oupwe ettiki ewe tikin asilesilen maun ren ekewe rappwa. Mürin, ngang ewe Samol mi Lapalap ämi we Kot üpwe alisikemi o amanauakemi seni chon oputakemi. 10 Oupwe ettiki ekewe rappwa pwal lon ränin ämi pwapwa, lupwen fansoun ämi kewe chulap mi kefilitä me lepoputän ekewe maram. Oupwe ettiki ekewe rappwa lupwen fansoun ämi eäni asoren kek me asoren kinamwe. Mürin üpwe alisikemi. Ngang ewe Samol mi Lapalap ämi we Kot.”
Ekewe chon Israel ra feila seni ewe chuk Sinai
10.11-36
11 Iwe, lon aruuen ränin ewe aruuen maram lon aruuen ier mürin än chon Israel towu seni Isip, ewe kuchu a wiitä seni won ewe imwenfel seni mangaku ewe ia ekewe allük ra nom ie. 12 Iwe, ekewe aramasen Israel ra sai seni ewe fanüapön Sinai lon tettelir. Iwe, ewe kuchu a üla lon ewe fanüapön Paran. 13 Ekkärän iei aeuin ar sai fän än ewe Samol mi Lapalap allük ngeni Moses. 14 Iwe, ekewe mwich mi nom lon kinikinin Juta ra akom le sai lon tettelir fän ar filäik. Nge Nason nöün Aminatap mwän i souemwenin chon ewe ainangen Juta. 15 Iwe, Netanel nöün Suar mwän i souemwenin chon ewe ainangen Isakar. 16 Nge Eliap nöün Helon mwän i souemwenin chon ewe ainangen Sepulon.
17 Iwe, mürin än ewe imwenfel seni mangaku katomwola, nöün Kerson me Merari kewe mwän mi wisen mwärei ra sai. 18 Mürin ekewe mwich mi nom lon kinikinin Rupen ra sai lon tettelir fän ar filaik. Nge Elisur nöün Seteur mwän i souemwenin chon ewe ainangen Rupen. 19 Iwe, Selumiel nöün Surisatai mwän i souemwenin chon ewe ainangen Simeon. 20 Nge Eliasaf nöün Teuel mwän i souemwenin chon ewe ainangen Kat.
21 Mürin, än Kohat cho ra sai. Ra mwärei ekewe mettoch mi pin. Nge lupwen ra tori ewe leni ia ra asösö ie, ewe imwenfel seni mangaku a fen kaütä. 22 Mürin, ekewe mwich mi nom lon kinikinin Efraim ra sai lon tettelir fän ar filaik. Nge Elisama nöün Amihut mwän i souemwenin chon ewe ainangen Efraim. 23 Iwe, Kamaliel nöün Petasur mwän i souemwenin chon ewe ainangen Manasa. 24 Nge Apitan nöün Kiteoni mwän i souemwenin chon ewe ainangen Peniamin.
25 Iwe, ekewe mwich mi nom lon kinikinin Tan ra kükümwirifoch seni ekewe mwich meinisin. Ra sai lon tettelir fän ar filaik, nge Ahieser nöün Amisatai mwän i souemwenin chon ewe ainangen Tan. 26 Iwe, Pakiel nöün Okran mwän i souemwenin chon ewe ainangen Aser. 27 Nge Ahira nöün Enan mwän i souemwenin chon ewe ainangen Naftali. 28 Iei tettelin än ekewe aramasen Israel sai lon ar kewe mwich iteiten fansoun ar sai.
29 Iwe, Moses a üreni Hopap nöün Setiro we mwän ewe re Mitian, nge Setiro semen pwülüen Moses, “Iei äm aipwe le sai ngeni ewe leni ewe Samol mi Lapalap a pwon pwe epwe ngenikem. Kopwe etikem, nge äm aipwe kirikiröch ngonuk, pun ewe Samol mi Lapalap a pwon pwe epwe awöüü ekewe chon Israel.” 30 Nge Hopap a üreni, “Üsap etikemi. Üpwe liwinsefäliti poputän fanüei me aramasei.” 31 Iwe, Moses a üra, “Üa tüngoreek, kose mochen kosap likitikem. Pun en ka silei ia aipwe aüetä imwem ie lon ewe fanüapö. En kopwe emwenikem. 32 Iwe, are kopwe etikem, aipwe pwal ngonuk ewe feiöch ewe Samol mi Lapalap epwe ngenikem.”
33 Iwe, ekewe aramasen Israel ra sai seni chukun ewe Samol mi Lapalap o sai lon ükükün ülüngat rän. Nge än ewe Samol mi Lapalap we pworun pwon a akomwola mwer, pwe epwe kütta ia repwe asösö ie. 34 Iwe, kuchun ewe Samol mi Lapalap a nom wor lerän iteiten fansoun lupwen ra sai seni lenier.
35 Iwe, iteiten fansoun lupwen ewe pworofel a sai, Moses a apasa, “Äm Samol mi Lapalap, kopwe ütä o atoropasafeili chon pälüenuk, nge ekewe mi oputok repwe sü me mwom.” 36 Nge iteiten fansoun lupwen ewe pworofel a asösö, Moses a apasa, “Äm Samol mi Lapalap, kopwe liwinto ren ekei ngeröüröün chon Israel.”