Paipel NUMPERIS 2
2
Usun lenien ekewe ainangen Israel me nöür kewe souemwen
2.1-34
Iwe, ewe Samol mi Lapalap a üreni Moses me Aaron, “Eman me eman ekewe aramasen Israel epwe aüetä imwan imw mangaku fän filäiken an mwich pwal fän asisilen än saman cho. Repwe aüetä imwer kewe pwelin ünükün ewe imwenfel seni mangaku. Iwe, peliötiuen ewe imwenfel seni mangaku awenewenen meserän chon ewe ainangen Juta me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Juta Nason nöün Aminatap mwän. Iteiten ekewe mwän lon än Nason mwich ükükün fik me rüanüngeröü wonopükü. Iwe, chon ewe ainangen Isakar repwe aüetä imwer ünükür. Iten nöür souemwen Netanel nöün Suar mwän. Iteiten ekewe mwän lon än Netanel mwich ükükün lime me rüanüngeröü föpükü. Nge chon ewe ainangen Sepulon repwe nom ünükür. Iten nöür souemwen Eliap nöün Helon mwän. Iteiten ekewe mwän lon än Eliap mwich ükükün lime me fisungeröü föpükü. Iwe, iteiten chokewe meinisin mi imweimw lon kinikinin Juta lon tettelin ar kewe mwich ükükün ipükü walik me wonungeröü föpükü mwän. Ir repwe wisen akomw lupwen fansoun ar sai.
10 Iwe, peliörün ewe imwenfel seni mangaku chon ewe ainangen Rupen me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Rupen Elisur nöün Seteur mwän. 11 Iteiten ekewe mwän lon än Elisur mwich ükükün faik me wonungeröü limepükü. 12 Iwe, chon ewe ainangen Simeon repwe aüetä imwer ünükür. Iten nöür souemwen Selumiel nöün Surisatai mwän. 13 Iteiten ekewe mwän lon än Selumiel mwich ükükün lime me tiwungeröü ülüpükü. 14 Nge chon ewe ainangen Kat repwe nom ünükür. Iten nöür souemwen Eliasaf nöün Reuel mwän. 15 Iteiten ekewe mwän lon än Eliasaf mwich ükükün faik me limungeröü wonopükü lime. 16 Iwe, iteiten chokewe meinisin mi imweimw lon kinikinin Rupen lon tettelin ar kewe mwich ükükün ipükü lime me eungeröü föpükü lime mwän. Ir repwe nom lon tettel nampa ruu lupwen fansoun ar sai.
17 Mürin ekei ruu mwich chon ewe ainangen Lefi mi nom lukalaper repwe sai o eki pisekin ewe imwenfel seni mangaku. Usun tettelin ar nom lon lenier, iei usun pwal tettelin ar sai, eu me eu mwich lon an tettel fän en me an filäik.
18 Iwe, pelilotoun ewe imwenfel seni mangaku chon ewe ainangen Efraim me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Efraim Elisama nöün Amihut mwän. 19 Iteiten ekewe mwän lon än Elisama mwich ükükün faik ngeröü limepükü. 20 Iwe, chon ewe ainangen Manasa repwe nom ünükür. Iten nöür souemwen Kamaliel nöün Petasur mwän. 21 Iteiten ekewe mwän lon än Kamaliel mwich ükükün ilik me ruungeröü ruopükü. 22 Nge chon ewe ainangen Peniamin repwe nom ünükür. Iten nöür souemwen Apitan nöün Kiteoni mwän. 23 Iteiten ekewe mwän lon än Apitan mwich ükükün ilik me limungeröü föpükü. 24 Iwe, iteiten chokewe meinisin mi imweimw lon kinikinin Efraim lon tettelin ar kewe mwich ükükün ipükü walungeröü ipükü mwän. Ir repwe nom lon tettel nampa ülüngat lupwen fansoun ar sai.
25 Iwe, peliefengin ewe imwenfel seni mangaku chon ewe ainangen Tan me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Tan Ahieser nöün Amisatai mwän. 26 Iteiten ekewe mwän lon än Ahieser mwich ükükün wone me ruungeröü füpükü. 27 Iwe, chon ewe ainangen Aser repwe aüetä imwer ünükür. Iten nöür souemwen Pakiel nöün Okran mwän. 28 Iteiten ekewe mwän lon än Pakiel mwich ükükün faik me eungeröü limepükü. 29 Nge chon ewe ainangen Naftali repwe nom ünükür. Iten nöür souemwen Ahira nöün Enan mwän. 30 Iteiten ekewe mwän lon än Ahira mwich ükükün lime me ülüngatngeröü föpükü. 31 Iwe, iteiten chokewe meinisin mi imweimw lon kinikinin Tan ükükün ipükü lime me fisungeröü wonopükü mwän. Iwe, repwe nom mwirichikin lupwen fansoun ar sai fän en me an filäik.”
32 Iwe, ikkei ir ekewe aramasen Israel ra alealong lon en me än saman cho. Nge kapachelapen meinisin mi alea lon tettelin ar kewe mwich lon lenier kewe ükükün wonopükü ülüngatngeröü limepükü lime mwän. 33 Nge chon ewe ainangen Lefi resap alealong lein ekewe aramasen Israel, usun ewe Samol mi Lapalap a allük ngeni Moses.
34 Iei usun ekewe aramasen Israel ra föri meinisin mine ewe Samol mi Lapalap a allük ngeni Moses. Iwe, ra aüetä imwer imw mangaku fän ar filäik, ra pwal sai en me lon an famili lon tettelin än semer kewe cho.