Numperis
Kapas akom
I. Iten ei puk: Numperis, wewen “angei iteit”. Ei kapas a pop seni än Moses angei iteiten chon Israel.
II. Chon makei ei puk: Chomong sousilelap lon Paipel ra tipeeu ngeni pwe Moses a makei.
III. Itelapemongen ei puk: Sipwe afälikich ren lükülükümang me aleasolap.
IV. Kapas aüchean ei puk: Lükülükümang a epetikich seni ach sipwe manaueni ewe manau mi somosomola.
V. Masouen ei puk Numperis: Lon ei puk a mak pworausen än chon Israel saifeil lon ewe fanüapö lon ükükün faik ier, seni ewe fansoun ra feila seni ewe chuk Sinai tori ötiuen kiännin ewe fanü Kot a fen pwon pwe epwe ngeniir. Moses a angei iteiten ekewe chon Israel mwen ar feil seni ewe chuk Sinai. Ina epwe mürin ükükün faik ier a pwal angesefäli iteiter me lon Moap ötiuen ewe chanpupu Jortan. Lefilen ekei ruu alean iteiten chon Israel ra feila ngeni Kates Parnea me peliörün kiännin ewe fanü Kanaan, nge resap tongeni tolong lon ewe fanüen pwon me ikenan. Mürin ar nonom lon ei fanü lon chomong ier, ra feila ngeni ewe fanü ötiuen ewe chanpupu Jortan. Ikenan ekoch lein ekewe aramas ra lefanüla lon, nge ekewe ekoch ra amolätä ar repwe feila Kanaan pekilan ewe chanpupu. Lon ei puk a mak pworausen eu mwichen aramas mi müttir tipemaramar me niuokus lupwen fansoun weires. Ra ü ngeni Kot me Moses, ewe mwän Kot a filätä pwe epwe emweniir, a pwal mak pworausen än Kot allükülük ngeni nöün aramas me an tümwünüür fansoun meinisin, inamwo ika ra lükülükümang me aleasolap, pwal usun än Moses tipepos me achocho le angang ngeni Kot me nöün aramas, nge fän ekoch esap mosonotam.
VI. Tettelin masouen ei puk:
Ekewe chon Israel ra amolätä ar repwe sai seni ewe chuk Sinai 1.1–9.23
1. Ewe aeuin alean iteiten chon Israel 1.1–4.49
2. Ekoch sokopaten allük me pwüüng 5.1–8.26
3. Ewe aruuen Pasofer 9.1-23
Än chon Israel sai seni ewe chuk Sinai tori Moap 10.1–21.35
Mine a fis me lon ewe fanü Moap 22.1–32.42
Aliwinin pworausen ewe sai seni Isip tori Moap 33.1-49
Kapasen öüröür ngeni chon Israel me mwen ar repwe feila pekilan ewe chanpupu Jortan 33.50–36.13
1
A fis alean iteiten chon Israel me fäsonun ewe chuk Sinai
1.1-46
(Num 26.1-51)
Iwe, lon aeuin ränin ewe aruuen maram lon aruuen ier mürin än chon Israel towu seni ewe fanü Isip, ewe Samol mi Lapalap a kapas ngeni Moses me lon ewe imw mangaku ia aramas ra churi Kot ie mi nom lon ewe fanüapön Sinai, “Oupwe angei iteiten ekewe aramasen Israel meinisin, iteiten eu me eu famili lon ar kewe cho. Oupwe makei iten eman me eman mwän seni ier rüe feitä mi tongeni fiti maun. Ämi me Aaron oupwe nampaniir lon eu me eu mwich. Iwe, epwe wor eman mwän seni eu me eu ainang i mwänirelan an cho, epwe alisikemi. Ikkei iten ekewe mwän repwe alisikemi: Elisur nöün Seteur mwän seni ewe ainangen Rupen, Selumiel nöün Surisatai mwän seni ewe ainangen Simeon, Nason nöün Aminatap mwän seni ewe ainangen Juta, Netanel nöün Suar mwän seni ewe ainangen Isakar, Eliap nöün Helon mwän seni ewe ainangen Sepulon, 10 nge seni mwirimwirin Josef kewe: Elisama nöün Amihut mwän seni ewe ainangen Efraim, pwal Kamaliel nöün Petasur mwän seni ewe ainangen Manasa, 11 Apitan nöün Kiteoni mwän seni ewe ainangen Peniamin, 12 Ahieser nöün Amisatai mwän seni ewe ainangen Tan, 13 Pakiel nöün Okran mwän seni ewe ainangen Aser, 14 Eliasaf nöün Teuel mwän seni ewe ainangen Kat, 15 Ahira nöün Enan mwän seni ewe ainangen Naftali.” 16 Ikkei ir ätekewe mi kefilitä seni ekewe chon Israel, ir ekewe souemwenin än semer ainang pwal mwänirelan ekewe eterekesin Israel.
17 Iwe, Moses me Aaron ra körato ekei mwän mi föü iter. 18 Nge ir ra amwichafengeni ekewe aramasen Israel meinisin lon aeuin ränin ewe aruuen maram. Iwe, ra angei iteiten chon Israel lon en me an famili me än semer cho o makei iten eman me eman mwän seni ier rüe feitä, 19 usun ewe Samol mi Lapalap a allük ngeni Moses. Iei usun Moses a angei iteiter lon ewe fanüapön Sinai.
20 Iwe, seni mwirimwirin Rupen nöün Israel we mwänichi, ekewe mwän meinisin seni ier rüe feitä mi tongeni fiti maun, ra aleaniir o makei iten eman me eman lon en me an famili me än semer cho. 21 Iwe, ükükün seni ewe ainangen Rupen faik me wonungeröü limepükü mwän.
22 Seni mwirimwirin Simeon ekewe mwän meinisin seni ier rüe feitä mi tongeni fiti maun, ra aleaniir o makei iten eman me eman lon en me an famili me än semer cho. 23 Iwe, ükükün seni ewe ainangen Simeon lime me tiwungeröü ülüpükü mwän.
24 Seni mwirimwirin Kat ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 25 Iwe, ükükün seni ewe ainangen Kat faik me limungeröü wonopükü lime mwän.
26 Seni mwirimwirin Juta ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 27 Iwe, ükükün seni ewe ainangen Juta fik me rüanüngeröü wonopükü mwän.
28 Seni mwirimwirin Isakar ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 29 Iwe, ükükün seni ewe ainangen Isakar lime me rüanüngeröü föpükü mwän.
30 Seni mwirimwirin Sepulon ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 31 Iwe, ükükün seni ewe ainangen Sepulon lime me fisungeröü föpükü mwän.
32 Seni nöün Josef kewe mwän, ekewe mwirimwirin Efraim, ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 33 Iwe, ükükün seni ewe ainangen Efraim faikngeröü limepükü mwän.
34 Seni mwirimwirin Manasa ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 35 Iwe, ükükün seni ewe ainangen Manasa ilik me ruungeröü rüepükü mwän.
36 Seni mwirimwirin Peniamin ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 37 Iwe, ükükün seni ewe ainangen Peniamin ilik me limungeröü föpükü mwän.
38 Seni mwirimwirin Tan ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 39 Iwe, ükükün seni ewe ainangen Tan wone me ruungeröü füpükü mwän.
40 Seni mwirimwirin Aser ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 41 Iwe, ükükün seni ewe ainangen Aser faik me eungeröü limepükü mwän.
42 Seni mwirimwirin Naftali ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho. 43 Iwe, ükükün seni ewe ainangen Naftali lime me ülüngatngeröü föpükü mwän.
44 Ikkei ir ekewe mwän Moses me Aaron ra aleaniir, nge ekewe engol me ruoman souemwenin Israel mi tupuni en me än saman cho ra alisiir. 45 Iwe, kapachelapen iteiten mwänin Israel seni lon än semer kewe cho seni ier rüe feitä mi tongeni fiti maun 46 ükükün wonopükü ülüngatngeröü limepükü lime mwän.
Ekewe mwän seni ewe ainangen Lefi ra wisen tümwünü ewe imwenfel
1.47-54
47 Nge chon ewe ainangen Lefi resap alealong lon iteiten ekewe lusun ainang. 48 Pun ewe Samol mi Lapalap a üreni Moses, 49 “Kosap aleani chon ewe ainangen Lefi, kosap pwal alearelong lein ekewe re Israel mi tongeni fiti maun. 50 Nge kopwe awisa ekewe mwän seni ewe ainangen Lefi pwe repwe tümwünü ewe imwenfel seni mangaku ia ekewe allük ra nom ie me pisekin meinisin. Iwe, repwe mwärefetalei ewe imwenfel me pisekin meinisin o tümwünüöchüür, repwe pwal aüetä imwer imw mangaku pwelin ünükün. 51 Iwe, ekewe mwän seni ewe ainangen Lefi repwe atomwala ewe imwenfel seni mangaku, lupwen ekewe chon Israel repwe sai, nge repwe pwal aüsefäli, lupwen ekewe chon Israel repwe asösö. Iwe, are eman me lükür epwe kan ngeni ei imwenfel, epwe ninnila. 52 Iwe, ekewe lusun aramasen Israel repwe aüetä imwer imw mangaku lon en me an mwich pwal fän en me an filäik. 53 Nge ekewe mwän seni ewe ainangen Lefi repwe aüetä imwer imw mangaku pwelin ünükün ewe imwenfel seni mangaku o tümwünü pwe esap wor eman epwe arap ngeni, pwe ngang üsap song ngeni ekewe aramasen Israel.” 54 Iwe, ekewe aramasen Israel ra föri meinisin mine ewe Samol mi Lapalap a allük ngeni Moses.