Paipel NEHEMIA 6
6
Ekewe chon pälüeni chon Juta ra rawangauei Nehemia
6.1-19
Iwe, Sanpalat me Topia pwal Kesem ewe re Arapia me ekewe lusun chon oputakem ra rongorong pwe üa awesala angangen ewe tit, esap pwal chüen wor eu pwang a nom won, nge lon ei fansoun üsamwo amasalong ekewe asam lon lenier. Mürin, Sanpalat me Kesem ra titito rei o üra, “Kopwe feito pwe sipwe chufengen lon eu kewe sop lon ewe maasiesin Ono.” Nge ir ra ekiekin afeiengauei. Iwe, üa tinala chon künö rer pwe repwe üreniir, “Üa föri eu angang mi fokun aüchea, üsap tongeni feila remi. Pwota ewe angang epwe kaüla pokiten ai likitala o feila remi?” Ra titito rei fän rüanü lon ei chök ititin pworaus, nge iteitan ngang üa pälüeniir pwal lon ei chök ititin. Mürin, Sanpalat a tinato nöün chon angang rei fän alimuan lon ei chök ititin fän echö toropwe esap appach o impwang. Iei usun mine a mak lon ei toropwe, “Ei pworaus a chöfetal lein chon ekewe mwü, pwal Kesem a apasa, pwe en me ekewe re Juta oua ekiekin ü ngeni ewe mwü. Iei mine oua senisefälietä ewe tit. Nge soposopun ei pworaus, pwe en ka mochen pwe kopwe ar king. Ka pwal awisa soufos pwe repwe asilefeili pworausom lon Jerusalem, pwe en ka king lon Juta. Iwe, iei ei pworaus epwe tori ewe king. Iei mine kopwe feito pwe sipwe pwüngüpwüngfengen won.” Mürin üa tinala ren Sanpalat ei pworaus, “Ekei mettoch ka kapas usun resap pwüng, pun ka chök afisätä seni püsin lon om ekiek.” Pun ir meinisin ra chök mochen aniuokusukem, pun ra ekieki pwe aipwe ükütiu le angang, pwe ewe angang esap wes. Nge üa iotek, “Ai Kot, kopwe apöchökülaei.”
10 Iwe, lon eu rän üa feila lon imwen Semaia nöün Telaia we mwän, nge Telaia nöün Meetapel mi mwelilong lon imwan. Ätei a üreniei, “Ousipwe chufengen lon imwen Kot me lon ewe leni mi pin o apüngala ekewe asam, pun repwe feito o niik. Lon eu pwin repwe feito o niikela.” 11 Nge üa üra, “Ngang eman mwän, üsap sü. Ifa usun, eman mwän usun ngang epwe opolong lon ewe imwenfel pwe epwe manau? Üsap tolong.” 12 Iwe, lupwen üa ekieki usun, üa mefi pwe Kot esap fos ngeni Semaia, nge i a eäni ei kapasen osuni ngeniei, pun Topia me Sanpalat ra möni. 13 Popun ra möni Semaia, pwe epwe aniuokusuei pwe üpwe tipis ren ai föri ei föför, nge ir repwe tongeni aitengauaei o turunufaseei. 14 Iwe, üa iotek, “Ai Kot, kopwe chechemeni mine Topia me Sanpalat ra föri. Kopwe pwal chechemeni ewe soufos fefin Noatia me ekewe lusun soufos mi mochen aniuokusuei.”
15 Iwe, lon rüe me limuen ränin ewe maram Elul ewe tit a wesila. Ra angang ngeni lon ükükün lime me ruu rän. 16 Lupwen ekewe chon oputakem ra rongorong usun, nge chon ekewe mwü ünüküm ra küna ei, ra fokun säw, pun ra mefi pwe ei angang a fis ren än Kot alilis ngenikem. 17 Lon ena fansoun ekewe aramas tekia seni Juta ra tinala chomong toropwe ren Topia, nge nöün Topia kewe toropwe ra pwal toriir. 18 Pun chomong chon Juta ra riri ngeni Topia ren eu pwon fän akapel, pokiten Topia i pwülüen nöün Sekania we fefin, nge Sekania nöün Ara. Iwe, Jehoanan nöün Topia we mwän a pwal pwülüeni nöün Mesulam we fefin, nge Mesulam nöün Perekia. 19 Iwe, ekewe aramas ra apworausa usun än Topia kewe föför mürina me fän mesei o asile ngeni i ai kewe kapas. Nge Topia a chök tinato rei toropwe pwe epwe aniuokusuei.