4
Ekewe chon angang ra tümwünü ewe tit seni chokewe mi ü ngeniir
4.1-23
Iwe, lupwen Sanpalat a rongorong pwe aia senisefälietä ewe tit, a song o fokun lingeringer. A esita ekewe chon Juta o apasa me fän mesen chiechian kewe me ekewe sounfiun Samaria, “Met ekei chon Juta mi fokun apwangapwang ra föri? Ifa usun, repwe tongeni aüsefälietä ei telinimw? Ifa usun, ra ekieki pwe repwe tongeni föri ar asor o awesi ei angang lon eu chök rän? Ifa usun, repwe tongeni aeasefäl ekewe fau mi karala seni ewe ioien pipi?” Nge Topia ewe re Amon mi nom ren a apasa, “Ellet, are eman foks epwe mwetetä won mine ra senisefälietä, epwe ataetiu ar tittin fau.” Iwe, ngang Nehemeia üa iotek, “Äm Kot, kopwe aüselingakem, pun äm aia küna turunufas. Kopwe ukun ngeniir ar takirin ämängau o asechirela pwe aramas repwe angei ar pisek fän pöchökül, nge ir repwe oola lon eu fanü. Kosap amusala ar pupungau, kosap pwal amoela ar tipis seni fän mesom. Pun ir ra turunufasei ekewe chon ses.”
Iei usun aia senätä unusen ewe tit tori tekian a esop, pun ekewe aramas ra achocho le angang. Nge lupwen Sanpalat me Topia, pwal ekewe chon Arapia, ekewe chon Amon me ekewe chon Astot ra rongorong pwe angangen senisefälietä ewe tittin Jerusalem a soposopola, nge ekewe pwang ra arapakan pinela, ra fokun song. Iwe, ra chufengen le föri ar rawangau usun ar repwe feito o maun ngeni Jerusalem, pwe repwe afisätä fitikoko lon. Nge aia iotek ngeni äm Kot, aia pwal alenia chon mamas repwe tümwünükem seniir lerän me lepwin.
10 Lon ei fansoun ekewe chon Juta ra apasa, “Pöchökülen ekewe chon uwouchou a kisikisila, a pwal wor chomong ioien pipi. Äm aisap tongeni awesi ewe angang ngeni ewe tit.” 11 Nge ekewe chon oputakem ra apasa, “Mwen ar repwe silei äm rawangau ika künakem, äm aipwe nom lefiler o nirela pwe ewe angang epwe ükütiu.” 12 Mürin, ekewe chon Juta mi nonom rer ra feito o ürenikem fän chomong, “Chon oputakich repwe feito o maun ngenikich seni ekewe leni meinisin ia ra nonom ie.” 13 Iei mine üa alenia ekewe aramas lon tettelin ar kewe famili fän nöür ketilas, wokur siles me ar kewe esefich lon ekewe leni lükün ewe ia ewe tit esamwo tekia ie. 14 Iwe, lupwen üa küna pwe ekewe aramas ra niuokus, üa üreni ekewe aramas tekia, ekewe nöüwis pwal ekewe lusun aramas, “Ousap niuokusiti ekewe chon oputach. Oupwe chechemeni ewe Samol mi tekia, aramas ra niuokusiti. Oupwe maun fän iten pwimi kewe chon Juta fän iten nöümi ät me nengin, pwal fän iten pwülüemi me leniemi.”
15 Nge lupwen chon oputakem ra rongorong pwe aia silei usun ar ekiekin rawangauakem, ra mefi pwe Kot a ataela ar ekiek. Mürin äm meinisin aia liwin ngeni en me an angang won ewe tit. 16 Seni ewe ränin esop me lein nei kewe chon angang ra angang ngeni ewe tit, nge esop ra amwöchü siles, tittin maun me esefich o üföüf üfen maun. Nge ekewe souemwen ra apöchöküla leluken ekewe chon Juta meinisin 17 mi senätä ewe tit. Pwal chokewe mi uwou mettoch mi chou ra angang won efoch pöür, nge won efoch ra amwöchü ar pisekin maun. 18 Nge iteiten eman me eman mi senätä ewe tit a rietä nöün ketilas lepekin, lupwen an ses. Iwe, ewe mwän mi wisen ettiki ewe rappwan asilesil a nom ünüki. 19 Nge üa üreni ekewe aramas tekia, ekewe nöüwis pwal ekewe lusun aramas, “Ewe angang a watte o fis lon eu leni mi chölap, nge kich sia toaufesen lon en me an angang ngeni ewe tit. 20 Iwe, lupwen oua rong tikin ewe rappwan asilesil seni lon eu leni, oupwe mwicheto rem ikenan. Ach Kot epwe maun fän itach.”
21 Iei usun esopun äm we mwich a föri ewe angang, nge esop ra amwöchü ekewe siles seni lesosorusich tori lepwin, lupwen ekewe fü ra tin. 22 Lon ewe fansoun üa pwal üreni ekewe aramas, “Eman me eman mwän me nöün chon angang repwe nonometiu lon Jerusalem lepwin pwe repwe tongeni mamas lepwin, nge repwe pwal angang lerän.” 23 Iwe, esap wor eman me leim a siwili üfan, sap ngang ika chienei kewe, ika nei kewe chon angang, ika chokewe mi tümwünüei. Eman me eman a amwöchü an pisekin maun lepöün.