Paipel NAHUM 2
2
Ewe chon kata a feito pwe epwe maun ngonuk, Ninifa.
Kopwe tümwünü ekewe leni mi pöchökül o mamasa ewe al.
Kopwe amolokotä
o fokun apöchökülok.
Pun ewe Samol mi Lapalap epwe aworasefäli lingen Israel, pwe epwe usun chök me mwen än chon oputan feito o soläni pisekin.
Ekewe chon pwora mi maun ngonuk ra uwei tittin maun mi parapar,
ekewe sounfiu ra üföüf üf mi parachol.
Ekewe wokenin maun ra molupolup usun ekkei,
lupwen ra molotä ngeni maun,
Ekewe wokenin maun ra säpuropurolong lon ekewe al,
ra akaliwin lukalapen ewe telinimw,
ra molupolup usun töl
o müttir usun inefi.
Ewe meilap a körifengeni nöün kewe sounfiu mi pwora.
Ra chepetek ren ar niuokus.
Ra müttir le säiti ewe tit,
ra aüetä ar epetin feiengau.
Mürin, ekewe asamalap arun ewe chanpupu ra sukula,
chon leimwen ewe king ra rükö.
Ewe kiwiin a oola.
Nöün kewe chon angang fefin ra ngüngüres usun lisom
o pisipisiri leupwer fän ar letipeta.
Ekewe aramasen Ninifa ra sü seni ewe telinimw usun chök koluk a puwu seni eu nomun koluk mi tala epetin.
Ra kökkö, “Oupwe üla, oupwe üla!”
Nge esap wor eman a kulsefäl.
Oupwe angei ewe silifer
me ewe kolt fän pöchökül.
A fokun wor chomong pisek mi aüchea lon ewe telinimw.
 
10 Ewe telinimw a tala o pön, esap chüen so.
Leluken aramas a kisikisila,
pwäsukur a chechech, esap chüen wor ar pöchökül,
won meser a pwechela.
11 Ifa chök ewe telinimw
mi wewe ngeni eu pwangen laion,
ewe leni ia ekewe nienifön laion ra mongö ie,
ewe ia ewe ätemwänin laion me ewe liafefinin laion ra feila ie,
nge apaner kewe ra kinamwe lon?
12 Ewe laion a niela liapan
o atatakisi fitukan, pwe ochän ewe liafefin me apanan kewe.
A amasoua pwangan ren fituk mi tatakis.
Ninifa a unusen tala
2.13-3.19
13 Iei alon ewe Samol mi Unusen Manaman, “Ngang üa ü ngonuk, Ninifa. Ngang üpwe kenala waom kewe wokenin maun. Noum kewe sounfiu repwe mäla lon maun. Üpwe angei senuk liapom kewe ka angei seni chon fanüfan, nge esap chüen wor eman epwe rong mwelien noum kewe chon künö.”