Paipel MARKUS 15
15
Ra etekinala Jesus mwen Pilatus
15.1-5
(Mat 27.1-2,11-14; Luk 23.1-5; Joh 18.28-38)
Iwe, lupwen a ränila, ekewe souasor mi lap ra mwichfengen me ekewe souakom, ekewe Sensen Allük me unusen ewe mwichen soupwüng, pwe repwe pwüngüpwüngfengen won met repwe föri. Ra föti Jesus o etekinala ren Pilatus, pwe epwe apwüngü. Iwe, Pilatus a aisini Jesus, “Ifa usun, en nöün chon Juta we king?” Jesus a pölüeni, “Ewer, usun om apasa.” Iwe, ekewe souasor mi lap ra atipisi Jesus won chomong mettoch. Iei mine Pilatus a pwal kapas ais ngeni Jesus, “Ifa usun, esap wor om kapasen pölüen? Nengeni, chomongun ekewe mettoch ra atipisuk won.” Nge Jesus esap chüen pölüeni och. Iei mine Pilatus a mairü.
A pwüngüla pwe Jesus epwe mäla
15.6-15
(Mat 27.15-26; Luk 23.13-25; Joh 18.39–19.16)
Iteiten ier, lupwen a tori ewe mongön Pasofer, Pilatus a soun amusala eman chon fötek, iö ekewe aramas ra tüngor. Iwe, a wor eman mwän lon imwen fötek itan Parapas, i eman me lein ekewe chon afitikoko mi niela aramas. Iwe, lupwen ewe mwichen aramas ra chufengen, ra tüngor ngeni Pilatus pwe epwe föri usun mine a piin föföri fän iter. Nge Pilatus a aisiniir, “Ifa usun, oua mochen pwe üpwe amusa ngenikemi ewe kingen chon Juta?” 10 Pun Pilatus a mefi, pwe ekewe souasor mi lap ra etekinala Jesus pwe epwe kapwüng pokiten ar lolowo.
11 Nge ekewe souasor mi lap ra pese ngeni ewe mwichen aramas pwe repwe tüngor Pilatus, pwe epwe amusa ngeniir Parapas, nge sap Jesus. 12 Iwe, Pilatus a aissefäl ngeniir, “Nge met üpwe föri ngeni ätewe oua aita ngeni kingen chon Juta?” 13 Ra kökkö fän leüömong, “Kopwe iräpengesi!” 14 Pilatus a pwal aisiniir, “Pwota? Met sokun föför mi ngau a föri?” Nge ir ra chök alapala ar kökkö, “Kopwe iräpengesi!” 15 Iei mine Pilatus a apwönüetä mochenin ewe mwichen aramas o amusa ngeniir Parapas. Iwe, a üreniir, pwe repwe wichi Jesus o etekinala, pwe epwe iräpenges.
Ekewe sounfiu ra turunufasei Jesus
15.16-20
(Mat 27.27-31; Joh 19.2-3)
16 Iwe, ekewe sounfiu ra etekinalong Jesus lon ewe leni lükün ewe imwen kepina o körifengeni unusen ar we mwichen sounfiu. 17 Ra aüfa ngeni echö üf mi parachol, mürin ra fittiifengeni palen iräfölüföl o isetä won möküren Jesus pwe mwärin. 18 Mürin ra popuetä le kapong ngeni, “Kopwe manauatam, en Kingen chon Juta!” 19 Ra wichi möküran ngeni efoch wok o atufa, ra fotopwäsuk mwan o pomwen fel ngeni. 20 Lupwen ra wes le turunufasei, ra pwiliti seni ewe üf mi parachol o aüfa ngeni püsin üfan kewe. Mürin ra etekinala pwe epwe iräpenges.
Jesus a iräpenges
15.21-32
(Mat 27.32-44; Luk 23.26-43; Joh 19.17-27)
21 Iwe, lupwen ar feila won ewe al, ra churi eman mwän itan Simon seni Kirene, a feito seni lemäl pwe epwe tolong lon ewe telinimw. Ekewe sounfiu ra echimwa ngeni an epwe mwärei än Jesus iräpenges. Simon semen Aleksanter me Rufus. Rom 16.13 22 Iwe, ra emwenala Jesus lon ewe leni itan Kolkota, wewen “Lenien Pösökün Mökür.” 23 Ikenan ra sotuni le aünü ngeni Jesus wain mi nofitfengen me och säfei itan mör, nge esap mochen ünümi. 24 Mürin ra iräpengesi Jesus. Ra üttüt won üfan kewe o ngeni eman me eman leir met üttian. Kölf 22.18
25 Iwe, kulok tiu lesosor ra iräpengesi Jesus. 26 Iwe, iei makkeen mine ra tip ngeni: “Ewe Kingen chon Juta.” 27 Ra pwal iräpengesi ruoman chon solä arun Jesus, eman a nom lepelifichin, nge eman lepelimöngun. 28 [Iwe, a pwönüetä mine a mak lon ekewe Toropwe mi Pin, “A alealong lein ekewe chon pupungau.”] Ais 53.12
29 Iwe, ekewe aramas mi pwere seni ra turunufasei Jesus, ra alifechifech ngeni o apasa, “Aa! En ewe ka ekiekin atai ewe imwenfel o aüsefälietä lon ükükün ülüngat rän. 30 Kopwe tötiu seni ewe iräpenges o püsin amanauok.”
31 Pwal ekewe souasor mi lap me ekewe Sensen Allük ra takirin ämängaua Jesus o kapasfengen lefiler, “A amanaua ekoch, nge esap tongeni püsin amanaua. 32 Iei i ewe a apasa pwe i Kraist, ewe Kingen Israel, epwe tötiu seni ewe iräpenges iei chök, pwe aipwe küna o lükü.” Pwal ätekewe mi eti Jesus le iräpenges ra eäni kapasen turunufas ngeni.
Jesus a mäla
15.33-41
(Mat 27.45-56; Luk 23.44-49; Joh 19.28-30)
33 Lupwen a tori leoloasen ewe rän, unusen ewe fanü a rochopwak lon ükükün ülüngat kulok. 34 Iwe, kulok ülüngat Jesus a kökkö fän mwelian mi leüömong, “Eloi, Eloi, lama sapaktani!” wewen “Ai Kot, ai Kot, pwota ka likitieila?” Kölf 22.1 35 Lupwen ekoch kewe aramas mi ü arun ra rong ekei kapas, ra apasa, “Ou rongorong, a köri Elias.” 36 Eman me leir a säto ren fän eu farawa, a otukalong lon wain mi mwäl o pachetä lesopun efoch iich. Mürin a pöüetä ewe iich ngeni awen Jesus o üra, “Sipwe witiwit, sipwe pii ika Elias epwe feito o uwätiu me won ewe iräpenges.” Kölf 69.2 37 Iwe, Jesus a leüömong le puchör, mürin a mäla.
38 Iwe, ewe chechen mangaku lon imwenfel a kam seni won tori fan, pwe a wor ruu kinikin. Eks 26.31-33 39 Lupwen ewe meilapen sounfiu mi ü mwen ewe iräpenges a rong o küna usun än Jesus mäla, a apasa, “Enlet, ei mwän wesewesen Nöün Kot.”
40 Iwe, mi pwal wor fefin ikenan mi aköürü me toau, me lein ekei fefin Maria Maktalene, Maria inen James ewe kükün me Josef pwal Salome. 41 Ekei fefin ra tapwela mürin Jesus lupwen a nom lon Kalilea o ra tümwünü ngeni met a eäni osupwang. Pwal chomong fefin mi etätä Jesus Jerusalem ra nom ikenan.
Jesus a peias
15.42-47
(Mat 27.57-61; Luk 23.50-56; Joh 19.38-42)
42 Iei ewe räninamol, wewen, ewe rän mwen ewe ränin sapat. Iwe, lekuniolun ei rän 43 Josef seni Arimatea, i eman me lein ewe mwichen soupwüng mi iteföüla, a pwal ösüküsükü waren ewe Mwün Kot, a feito ren Pilatus fän pöchökülen letipan o tüngor somän Jesus. 44 Nge Pilatus a weitifengeni lupwen an rong pwe Jesus a fen mäla. A titi ewe meilapen sounfiu o aisini are Jesus a fen mäla. 45 Iwe, lupwen a rong seni ewe meilapen sounfiu pwe Jesus a fen mäla, a mwütätä somän ngeni Josef. 46 Iwe, Josef a fen möni echö mangaku mi pwechepwech o mürina. A angeatiu ewe somä seni won ewe iräpenges, a finiti ngeni ewe mangaku mi pwechepwech o peiaseni lon eu peias mi för lon achau. Mürin a asokopanato eföü fau mi watte o pine ngeni mesen ewe peias. 47 Iwe, Maria Maktalene me Maria inen Josef ra küna ia ra peiaseni ie somän Jesus we.

15:21: Rom 16.13

15:24: Kölf 22.18

15:28: Ais 53.12

15:34: Kölf 22.1

15:36: Kölf 69.2

15:38: Eks 26.31-33