Paipel MARKUS 12
12
Pworausen awewe usun ekewe chon mälämäl mi ngau
12.1-12
(Mat 21.33-46; Luk 20.9-19)
Mürin Jesus a kapas ngeniir lon pworausen awewe: “A wor eman mwän a fotuki eu tanipin wain. A föri eu tit ünükün, a tuw eu pwang fän iten ewe lenien üchüch föün wain o aüetä eu imwen mamas mi tekia lon. Mürin a awisa ekoch chon mälämäl, pwe repwe tümwünü an tanipin wain. Iwe, a saila toau. Ais 5.1-2 Nge lupwen a tori fansoun kinikin, a tinala eman nöün chon angang ren ekewe chon mälämäl, pwe epwe ange seniir wisan me lon ekewe föün wain. Iwe, ekewe chon mälämäl ra turufi ewe chon angang, ra wichi o tinala fän an asoulapö. Mürin ewe mine an ewe tanipin wain a tinala pwal eman nöün chon angang. Iwe, ekewe chon mälämäl ra akinasa möküran o föri ngeni sokun föför, pwe epwe säw ren. Iwe, ewe mine an ewe tanipin wain a tinala pwal eman nöün chon angang, nge ir ra niela. Iei usun ra föri ngeni chomong chon angang, ekoch ra wichi, ekoch ra niela. Iwe, a chüen wor eman lusun, iei püsin nöün we a fokun echeni. Amüchülan a tinala nöün we ren ekewe chon mälämäl, pun a üra, ‘Üa lükü, pwe repwe meniniti nei we mwän.’ Nge ekewe chon mälämäl ra kapasfengen lefiler, ‘Iei i alemürin, ätei mine an ei tanipi. Oule feito, sipwe niela, pwe sipwe eäni mine an me ren saman.’ Iei mine ra turufi nöün we mwän, ra niela o aturawu lükün ewe tanipin wain.”
Mürin Jesus a ais, “Met ewe mine an ewe tanipin wain epwe föri? Epwe feito o niela ekei chon mälämäl, nge epwe ngeni pwal ekoch chon mälämäl an we tanipin wain. 10 Oua fen aleani ekei kapas lon ewe Toropwe mi Pin,
‘Ewe fau ekewe chon kaü imw ra pöütala, pun resap aücheani
a wiliti ewe föün lepwokuku mi fokun aüchea.
11 Iei än ewe Samol we föför,
a fokun amwarar me fän mesach.’ ” Kölf 118.22-23
12 Iwe, ekewe souemwenin Juta ra sotuni ar repwe fötekini Jesus, pun ra silei pwe a afalafala ei pworausen awewe usur. Nge ra niuokusiti ewe mwicheichen aramas, iei mine ra likitala o feila seni.
Kapas ais usun takises
12.13-17
(Mat 22.15-22; Luk 20.20-26)
13 Iwe, ra tinala ekoch Farisi me ekoch chiechien Herotes, pwe repwe rawei Jesus lon an kapas. 14 Iwe, ra feito ren Jesus o üreni, “Sense, äm aia silei pwe ka kapas wenechar, nge kosap ekieki mine aramas ra eäni ekiek. Kosap nenengeni wisen eman, nge ka afalafala usun letipen Kot fän iten aramas. Kopwe ürenikem ika a pwüng ach sipwe mönätiu ach takises ngeni Sisar ika ese pwüng. 15 Ifa usun, sipwe takises ika sisap?” Nge Jesus a silei usun ar likatuputup. Iwe, a üreniir, “Pwota oua sotuni le säreei? Oupwe uwato rei eföü moni silifer, pwe üpwe katol.” 16 Iwe, ra uwato eföü moni ren. Mürin Jesus a aisiniir, “Liosun iö me iten iö ei won ei moni?” Ir ra pölüeni, “Liosun Sisar me itan.” 17 Mürin Jesus a üreniir, “Mi pwüng! Oupwe ngeni Sisar mine än Sisar, nge oupwe ngeni Kot mine än Kot.” Iwe, ra fokun mwar ren mine a pölüeniir won.
Kapas ais usun manausefäl
12.18-27
(Mat 22.23-33; Luk 20.27-40)
18 Mürin ekoch Satusi ra feito ren Jesus, ir chokewe mi apasa pwe aramas resap manausefäl seni mäla. Iwe, ra üreni Jesus, Föf 23.8 19 “Sense, Moses a makei ei allük fän itach: ‘Are eman mwän a mäla, nge esap wor nöün me won pwülüan, pwiin ei mwän epwe fokun pwülüeni ei fefin, pwe epwe wor nöün fänäsengesin mwirimwirin pwiin we mi mäla.’ Tut 25.5 20 Mi wor füman pwiin. Ewe mwänichi a pwülüeni eman fefin, nge lupwen a mäla, esap wor nöün. 21 Mürin ewe aruomanün a pwülüeni ewe fefin, o ätewe a pwal mäla, nge esap wor nöün. Iei usun a pwal fis ngeni ewe aülümanün, 22 pwal ngeni afömanün tori afümanün. Ekewe füman pwipwi ra pwülüeni ewe fefin, ir meinisin ra mäla, nge esap wor nöür. Lesopolan ewe fefin a pwal mäla. 23 Iwe, lon ewe ränin, lupwen ekewe sotup meinisin repwe manausefäl, iö me leir epwe pwülüeni ewe fefin? Pun ir me füman ra pwülüeni.”
24 Mürin Jesus a pölüeniir, “Ämi oua fokun mwäl! Oua silei pwota? Pun ousap silei makkeen ekewe Toropwe mi Pin ika än Kot manaman. 25 Pun lupwen ekewe sotup repwe manausefäl, resap pwüpwülü, pun repwe wewe ngeni ekewe chon läng. 26 Nge usun manausefälin sotup: Ousamwo aleani lon ewe puken Moses usun ewe iräfölüföl mi pulopulen ekkei? Seni lon ewe irä Kot a kapas ngeni Moses, ‘Ngang än Apraham, Isaak me Jakop we Kot.’ Eks 3.6 27 Kot än ekewe mi manau Kot, nge sap än ekewe mi mäla. Ämi oua fokun mwäl.”
Ewe Allük mi lap
12.28-34
(Mat 22.34-40; Luk 10.25-28)
28 Nge a wor eman Sensen Allük ikenan, a rongorong mine ra kapasfengen won. A rongorong pwe Jesus a ngeni ekewe Satusi pölüenöchun ar kapas ais. Iwe, a feito ren Jesus o aisini, “Meni allük a kon aüchea seni meinisin?” 29 Jesus a pölüeni, “Iei ewe allük a kon aüchea, ‘Kopwe aüseling Israel: Ewe Samol ach Kot i chök ewe Samol mi Lapalap. 30 Kopwe echeni ewe Samol om Kot ren unusen lelukom, ren unusen ngünum, ren unusen ekiekum pwal ren unusen tufichum.’ Tut 6.3-5 31 Nge iei ewe aruuen allük mi pwal aüchea, ‘Kopwe echeni chon arum usun püsin om echenuk.’ Esap wor eu allük mi aüchea seni ekei ruu allük.” Lif 19.18
32 Iwe, ewe Sensen Allük a üreni Jesus, “Mi pwüng, sense, a let mine ka apasa. Ewe Samol, i chök Kot, esap wor eman kot lükün i. Tut 4.35 33 Iwe, eman aramas epwe echeni Kot ren unusen lelukan, ren unusen ekiekin me unusen tufichin, epwe pwal echeni chon arun usun chök püsin an echeni. A men fokun aüchea än eman epwe aleasochisi ekei ruu allük, lap seni än epwe eäni asor man me sokopaten asor ngeni Kot.” Os 6.6 34 Iwe, lupwen Jesus a mefi usun an tipachem le pölüeni, a üreni, “Kosap toau seni ewe Mwün Kot.” Mürin chök ei esap chüen wor eman a tongeni ais ngeni Jesus och kapas ais. Luk 10.25-28
Kapas ais usun Kraist
12.35-37
(Mat 22.41-46; Luk 20.41-44)
35 Lupwen Jesus a afalafal lon ewe imwenfel, a aisini ekewe aramas eu kapas ais, “Ifa usun än ekewe Sensen Allük apasa, pwe Kraist epwe eman mwirimwirin Tafit? 36 Nge Ngünmifel a amefi ngeni Tafit pwe epwe apasa:
‘Ewe Samol a kapas ngeni ai Samol: Kopwe mot lepelifichi
tori üpwe anomu chon oputom fän pecheöm.’ Kölf 110.1 37 Ika Tafit a püsin aita ngeni Samol, epwe ifa usun än Kraist epwe tongeni eman mwirimwirin Tafit?” Iwe, ekewe aramas mi chomong ra efich an afalafal.
Jesus a kapas usun än ekewe chon kaiö repwe afäliir ren ekewe Sensen Allük
12.38-40
(Mat 23.1-36; Luk 20.45-47)
38 Iwe, Jesus a afalafaleer o üreniir, “Oupwe afälikemi ren ekewe Sensen Allük ra sani ar fetalfeil fän üfer mi langatam, ra pwal sani än aramas repwe kapong ngeniir fän menin lon ekewe lenien amömö, 39 ra aea ekewe lenien mot än ekewe meilap lon ekewe lenien felikis, pwal ekewe leni fän iten aramas mi iteföüla lon ekewe lenien kametip. 40 Ra angemwäli imwen ekewe fefin mi mä pwülüer, mürin ra einga ngeni aramas ar iotek mi langatam. Ätekewe repwe küna apwüng mi fokun chou.”
Än ewe fefin mi mä pwülüan asor
12.41-44
(Luk 21.1-4)
41 Lupwen Jesus a mot arun ewe lenien asor me lon ewe imwenfel, a nenengeni ekewe aramas mi uwalong ar asor lon ewe lenien asor. Chomong aramas mi pisekisek ra uwalong chomong moni. 42 Mürin eman fefin mi wöüngau a mä pwülüan a feito o uwalong ruoföü kükün kapa, aüchean ina epwe ükükün senis eu. 43 Iwe, Jesus a körifengeni nöün kewe chon kaiö o apasa, “Üpwe ürenikemi pwe ei fefin mi wöüngau a mä pwülüan a uwalong chomong asor lon ewe lenien asor lap seni ekewe aramas meinisin. 44 Pun ir meinisin ra uwalong somwen wöür, nge neminei seni an wöüngau a uwalong meinisin mine a wor ren, a fangala meinisin mine a manau seni.”

12:1: Ais 5.1-2

12:11: Kölf 118.22-23

12:18: Föf 23.8

12:19: Tut 25.5

12:26: Eks 3.6

12:30: Tut 6.3-5

12:31: Lif 19.18

12:32: Tut 4.35

12:33: Os 6.6

12:34: Luk 10.25-28

12:36: Kölf 110.1