Paipel MARKUS 5
5
Jesus a apöchöküla eman mwän mi wor chomong ngününgau won
5.1-20
(Mat 8.28-34; Luk 8.26-39)
Iwe, Jesus me nöün kewe chon kaiö ra tori epek ewe nomun Kalilea lon ewe fanü Kerasa. Lon ewe otun Jesus a tötiu me won ewe wa, eman mwän mi wor eman ngününgau won a feito seni ekewe lenien peias, pwe epwe churi. Ei mwän a nonom lein ekewe peias, nge esap chüen wor eman a tongeni föti, sap pwal mwo nge ngeni sein. Fan chomong pöün me pechen ra föfö ngeni selimächä, nge iteitan a chök mwütifeseni ekewe sein o kupi ewe selimächä won pechen. Ei mwän a fokun pöchökül, pwe esap wor eman a tongeni amwöchü. Lerän me lepwin a fetalfeil lein ekewe peias pwal won ekewe chukutekison, a pupuchör o akinasa inisin ngeni fau.
Iwe, lupwen a küna Jesus me toau, a sä ngeni o fotopwasuketiu me mwan. Iwe, a puchörütä o apasa, “Jesus, Nöün Kot ewe mi Unusen Tekia, met ka mochen föri ngeniei? Üa tüngor ngonuk mwen mesen Kot pwe kosap ariaföüüei.” A nöünöü ei ititin fos, pun Jesus a fen kapas ngeni, “Kopwe towu seni ei mwän, en ngün mi ngau!” Iwe, Jesus a aisini, “Ifa itom?” Ewe mwän a pölüeni, “Itei mwichemong, pun äm aia chomong.” 10 Iwe, a fokun tüngormau ngeni Jesus pwe esap asüela ekewe ngününgau seni ewe fanü.
11 Iwe, a wor eu pwiin pik ra mongöfeil won ekewe chukutekison mi arap ngeni ewe leni. 12 Iei mine ekewe ngününgau ra tüngor ngeni Jesus, “Kopwe tinikeemila ren ekewe pik o kopwe mwüt ngenikem pwe aipwe tolong lor.” 13 Iwe, Jesus a mwüt ngeniir. Ekewe ngününgau ra towu seni ewe mwän o tolong lon ekewe pik. Ekewe pik meinisin arapakan ruungeröü ra sätiu me won palen ewe chuk o turulong lon ewe noom. Iwe, ra mop meinisin. 14 Mürin ätekewe mi foleni ekewe pik ra süla o apworausafeili ewe pworaus lon ekewe telinimw me ekewe sopw. Iwe, ekewe aramas ra feila ngeni ewe leni, pwe repwe nengeni mine a fis. 15 Lupwen ra feito ren Jesus, ra küna ewe mwän a wor eu mwichemongun ngününgau won me mwan. A mot ikenan a üföüf o miritila. Iwe, ra niuokus. 16 Iwe, chokewe mi küna ei manaman ra apworausa ngeni ekewe aramas mine a fis ngeni ewe mwän mi wor ngününgau won, pwal mine a fis ngeni ekewe pik. 17 Iei mine chon ewe fanü ra tüngor ngeni Jesus epwe towu seni fanüer.
18 Iwe, lupwen Jesus a tötä won ewe wa, ewe mwän mi wor ngününgau won me lom, a fokun tüngor ngeni Jesus pwe epwe eti. 19 Nge Jesus esap mwüt ngeni, pwe a üreni, “Kopwe feila lon leniom ren om famili o apworausa ngeniir meinisin mine ewe Samol a föri ngonuk, pwal usun an eäni ümöümöch ngonuk.” 20 Iei mine ewe mwän a feila seni, a tori ewe fanü itan Engol Telinimw o apworausafeili mine Jesus a föri fän itan. Iwe, ekewe aramas meinisin mi rongorong ei pworaus ra mairü ren.
Jesus a apöchöküla eman fefin o amanauasefäli eman nengin
5.21-43
(Mat 9.18-26; Luk 8.40-56)
21 Iwe, Jesus a liwinsefäliti epek ewe noom. Ikenan eu mwichen aramas mi chomong ra mwicheto ren. 22 Mürin Jairus eman meilapen imwen felikis a feito. Iwe, lupwen a küna Jesus, a chapetiu arun pechen 23 o a fokun tüngormau ngeni, “Nei nengin a arap ngeni mäla. Kose mochen kopwe feito o iseis poumw won, pwe epwe pöchökülela o chikarsefäl.” 24 Mürin Jesus a etala Jairus. Nge chomong aramas ra tapwela mürin o etiepach ngeni.
25 Iwe, a wor eman fefin a eäni samaun fefin mi fokun watte lon ükükün engol me ruu ier. 26 A fokun riaföü ren chomong sousafei ra säfeeni. A pwal fangala meinisin mine a wor ren fän iten an epwe küna pöchökül, nge an samau a chök wattela. 27 Lupwen ei fefin a rong usun pworausen Jesus, a feito me lükisökürün lein ewe mwichen aramas o atapa üfan, 28 pun a ekieki lon lelukan, “Are üpwe chök atapa üfan, üpwe pöchökülsefäl.” 29 Lon ewe chök otun a atapa üfen Jesus we, an we samau a köüla. Iwe, a mefi lon inisin pwe a chikar seni an we samau. 30 Lon ewe chök otun Jesus a mefi pwe och manaman a towu seni, iei mine a sap ngeni ewe mwichen aramas o a aisiniir, “Iö we a atapa üfei?” 31 Nöün kewe chon kaiö ra pölüeni, “Ka fen küna ekewe aramas mi etiepach ngonuk, nge pwota ka ais, ‘Iö we a atapaei?’ ”
32 Iwe, Jesus a nenefeil pwe epwe küna iö we a föri ei. 33 Nge ewe fefin a silei mine a fis ngeni. A feito o fotopwäsuk arun pechen Jesus fän chechech me niuokus. Iwe, a pwäri ngeni Jesus meinisin mine a fis ngeni. 34 Iwe, Jesus a üreni, “Nei fefin, om lükülük a apöchökülokotä. Kopwe feila fän kinamwe pwe ka chikar seni om samau.”
35 Nge lupwen Jesus a chüen kakapas, ekoch nöün Jairus chon künö ra war o üreni, “Noumw nengin a mäla. Pwota ka chüen aweiresi ewe sense?” 36 Iwe, Jesus esap afäli mine ra apasa, nge a üreni Jairus, “Kosap niuokus, kopwe chök lükü.” 37 Mürin Jesus esap chüen mwüt ngeni eman epwe fiti, pwe Petrus chök me James me pwiin we Johannes. 38 Iwe, lupwen ra tori imwen Jairus, Jesus a küna ar akürang o rongorong ar kechü fan leüömong me ar ngüngüres. 39 Iwe, a tolong lon ewe imw o a üreniir, “Pwota oua akürang o kechü? Ewe nengin esap mäla, pwe a chök möür.”
40 Iwe, ra takiri, iei mine a atorowu me lon ewe imw. Nge a angei semen ewe nengin me inan pwal nöün ülüman chon kaiö o emweniirelong lon ewe ruum ia ewe nengin a kon ie. 41 Iwe, Jesus a amwöchü pöün ewe nengin o üreni, “Talita koum!” wewen “Kükün nengin, üa ürenuk, kopwe pwätä!” 42 Lon ewe chök otun ewe nengin a pwätä o fetal. Lon ei fansoun ei nengin a ierini engol me ruu. Lupwen a fis ei manaman ekewe aramas ra fokun mairü. 43 Nge Jesus a allük ngeniir, pwe resap üreni eman mine a fis, a pwal üreniir pwe repwe amongöü.