Paipel MIKA 7
7
Manauangauen chon Israel
7.1-6
Feiengauei, pun üa usun eman chon kinikin föün irä mürin fansoun räs, ika usun eman mi kütta uän irän wain mürin fansoun räs. Esap fokun wor eum föün wain pwe üpwe ochoch, esap wor eföü fiik mi anö üa mwoneiti. Esap chüen wor eman aramas mi pwüng lon ewe fanü, esap pwal chüen wor eman mi wenechar me lein ekewe aramas. Meinisin ra op pwe repwe ni aramas, ra en me chei pwin pwe repwe likatupur. Ra fokun sipeöch le föri mine a ngau. Ekewe nöüwis me soukapwüng ra angei lifangen amichimich. Ekewe aramas tekia ra apasawu mochenin letiper, ir meinisin ra rawangaufengen. Ewe mi fokun mürina me leir a usun chök pötöwölingau, nge ewe mi fokun wenechar me leir a usun chök eu tit seni irafölüföl. A war ewe ränin än Kot apwüngü ekewe aramas, usun a fen asile ngeniir me ren ekewe soufos. Iei ra nom lon fitikoko. Kosap anomu om lükülük won chon arum, kosap pwal lükü chiechiom. Kopwe pwal tümwünü mine ka apasa me fän mesen pwülüom. Pun eman ät epwe aitengaua saman, eman nengin epwe ü ngeni inan, eman föpwül epwe ü ngeni inen pwülüan, nge püsin chon leimwen eman epwe chon oputan. Mat 10.35-36; Luk 12.53
Kot a awarato saram me ngas
7.7-13
Nge ngang üpwe neta ngeni ewe Samol mi Lapalap. Üpwe ösüküsükü Kot ai we Chon Amanau. Ai Kot epwe aüselingaei. Ämi chon oputaei, ousap meseik woi. Inamwo ika üa turula, üpwe pwal üsefälitä. Inamwo ika üa nom lon rochopwak, ewe Samol mi Lapalap epwe ai saram. Pokiten üa tipis ngeni ewe Samol mi Lapalap, üpwe mwärelong fän an song tori epwe peniei o pwärawu ai pwüng. Epwe emwenieiwu ngeni saram pwe üpwe küna an angasaei. 10 Mürin chon oputaei repwe küna mine a fis o fokun säw, ir chokewe mi aisiniei, “Ifa i ewe Samol mi Lapalap om we Kot?” Üpwe küna ar kuf me än aramas puriir usun ar puri pwakaken won ekewe al.
11 Ämi aramasen Jerusalem, epwe war ewe fansoun ämi oupwe senisefälietä tittin ewe telinimw. Lon ena fansoun kiännin fanüemi epwe fokun wattela. 12 Aramasemi repwe liwinto remi seni Asiria me Isip pwal seni ewe leni arun ewe chanpupu Oifrat, seni arosetin ekewe matau, pwal seni ekewe chuk mi fokun toau. 13 Nge fanüfan epwe wiliti eu fanüapö pokiten föföringauen chokewe mi nonom won.
Än Kot tong ngeni chon Israel
7.14-20
14 Äm Samol mi Lapalap, kopwe mamasa noum aramas fän wokum usun eman chon mas, kopwe tümwünü ewe mwichen aramas ka filätä. Ra imwüla o nonom lon eu wöllap lukalapen eu fanü mi pwülüöch. Kopwe mwüt ngeniir pwe repwe mongö lon Pasan me Kiliat usun chök lon ekewe fansoun lom. 15 Kopwe pwäri ngenikem om kewe manaman, usun ka föri lon ewe fansoun lupwen ka emwenikeemiwu seni Isip.
16 Chon ekewe mwü repwe küna ei o säw, pokiten ar pöchökül meinisin a sü seniir. Repwe pwölüela awer o pinela selinger fän ar mitingau. 17 Repwe chönawei pwül moromor usun serepenit, repwe tö usun mantötö won pwül. Repwe towu seni ar kewe imwen maun mi pöchökül fän chechech. Repwe kul ngeni ewe Samol mi Lapalap ach we Kot fän niuokus.
18 Esap wor eman Kot usun en. Ka amusala tipis o apichala pupungauen chokewe mi chüen manau me lein noum kewe aramas. Kosap amwöchü om song tori feilfeilachök, nge ka pwapwa le pwärätä om tong ellet ngenikem. 19 Kopwe pwal tongeesefälikem. Kopwe purätiu äm kewe föföringau fän pecheöm o aturätiu äm kewe tipis lealololun matau. 20 Kopwe pwäri om allükülük me tong ellet ngeni äm noum kei aramas, äm mwirimwirin Apraham me Jakop usun ka pwon fän akapel ngeni äm kewe lewo lon ekewe fansoun lom.

7:6: Mat 10.35-36; Luk 12.53