Paipel MATEUS 11
11
Johannes Soupapatais a tinala chon künö ren Jesus
11.1-19
(Luk 7.18-35)
Iwe, lupwen Jesus a wes le öüröüra nöün kewe chon kaiö, a feila seni ikenan pwe epwe aiti ngeni aramas kapasen Kot o afalafaleer lon ekewe telinimw mi arap. Nge lupwen Johannes Soupapatais a rong me lon imwen fötek usun ekewe föför Kraist a föriir, a tinala ekoch nöün kewe chon kaiö ren. Iwe, ra aisini Jesus, “En ewe eman epwe wareto, are sipwe witiwiti pwal eman.” Jesus a pölüeni, “Oupwe liwinla o asile ngeni Johannes mine oua rongorong o küna: Ekewe mi mesechun ra küna mwer, ekewe mi pechemä ra fetal, ekewe mi üriir rupun pwötür ra chikarsefäl, ekewe mi selingepin ra rongorong, ekewe mi mäla ra manauatä, ekewe mi wöüngau ra rongorong afalafalen ewe Pworaus Allim. Ais 35.5-6; 61.1 Ra feiöch chokewe resap tipemwaramwar rei.”
Lupwen än nöün Johannes kewe chon kaiö feila, Jesus a popuetä le kapas ngeni ewe mwichen aramas usun Johannes, “Lupwen oua feila ren Johannes lon ewe fanüapö, met oua ekieki oupwe nengeni? Efoch äsät mi mwaroro ren asepwäl? Met chök oua feila ren pwe oupwe nengeni? Eman mwän mi üföüf üf mi pwetete o mürina? Ekewe aramas mi üföüf ei sokun üf ra nom lon imwen king. Oupwe üreniei, met chök oua feila ren pwe oupwe nengeni? Eman soufos? Ewer, üa ürenikemi, oua fen küna eman mi lap seni eman soufos. 10 Pun Johannes i ätewe ekewe Toropwe mi Pin ra kapas usun: ‘Nengeni, üpwe tinala nei chon künö, epwe akomwola mwomw, epwe amolätä efoch al fän itom.’ Mal 3.1 11 Enlet, üa ürenikemi, pwe Johannes Soupapatais a lap seni aramas meinisin mi uputiu won fanüfan. Nge iön mi kisikis lon Mwün Läng a fen lap seni Johannes. 12 Seni ewe fansoun Johannes Soupapatais a popuetä an afalafal tori iei Mwün Läng a fokun riaföü, nge aramas mi ngau ra sotuni pwe repwe angei o nemeni. 13 Pun ekewe soufos meinisin me ekewe Allükün Moses ra kapas usun ewe Mwün Kot tori fansoun Johannes. Luk 16.16 14 Nge are oua mochen lükü ar kapas, Johannes i ätewe ewe soufos a kapas usun, lupwen a apasa pwe Elias epwe war. Mal 4.5; Mat 17.10-13; Mark 9.11-13 15 Iö a wor selingan epwe rongorong.
16 “Iwe, met üpwe tongeni awewe ngeni ei pilon aramasen ikenai? Ra wewe ngeni ekewe semirit mi mot lon ekewe lenien amömö. Eu mwich a kökkö ngeni pwal eu mwich: 17 ‘Äm aia ettiki aangün ngenikemi, nge ämi ousap pworuk! Äm aia köl kölün lolilen, nge ämi ousap kechü!’ 18 Lupwen Johannes a feito, a echikefel, esap pwal ün wain, nge aramas ra apasa, ‘A wor eman anün rochopwak won!’ 19 Nge lupwen Nöün Aramas a feito, a mongö o ün, nge aramas ra apasa, ‘Ou nengeni ei mwän! I eman mi mongömong me ünümong, eman mi chiechi ngeni ekewe chon ioni takises me chon tipis.’ Än Kot tipachem a pwäla pwe a let ren an kewe föför.”
Feiengauen ekewe telinimw resap lükülük
11.20-24
(Luk 10.13-15)
20 Iwe, aramasen ekewe telinimw ia Jesus a föri ie chomong an kewe manaman resap kul seni ar tipis. Iei mine Jesus a apwüngüür: 21 “Feiengauom Korasim! Feiengauom Petsaita! Are ekewe manaman mi fen fis me lomi repwe fen fis lon Tirus me Siton, ekewe aramas lon ekei telinimw repwe üföüf üf seni tuk me lomlom o amoratiu falang won mökürer, pwe asisilen ar kul seni tipis! Ais 23.1-18; Is 26.1–28.26; Sow 3.4-8; Am 1.9-10; Sek 9.2-4 22 Iwe, ngang üpwe fokun ürenikemi, pwe lon ewe ränin apwüng epwe kisikis feiengauen Tirus me Siton seni ämi feiengau. 23 Nge en Kapernaum! Ka ekieki om kopwe püsin atekiokotä tori läng? Apwi, kopwe turutiu lon hell! Are ekewe manaman ra fen fis lomw, repwe fen fis lon Sotom, ei telinimw epwe chüen nonom tori ikenai. Ais 14.13-15; Ken 19.24-28 24 Iwe, ngang üpwe fokun ürenikemi, pwe lon ränin apwüng epwe kisikis feiengauen Sotom seni ämi feiengau.” Mat 10.15; Luk 10.12
Oupwe feito rei o asösö
11.25-30
(Luk 10.21-22)
25 Iwe, lon ena fansoun Jesus a apasa, “Semei, en Samolun läng me fanüfan, üa kilisou ngonuk, pun ka amonomona ekei mettoch seni ekewe mi tipachem me silelap, nge ka pwärala ngeni ekewe tipate. 26 Ewer, Semei, pun iei usun ka pwapwaiti an epwe fis.”
27 “Semei a ngeniei mettoch meinisin. Esap wor eman a silei ewe Nau, pwe ewe Sam chök, esap pwal wor eman a silei ewe Sam, pwe ewe Nau chök me chokewe ewe Nau a afiliir an epwe pwäri i ngeniir. Joh 3.35; 1.18; 10.15
28 Oupwe feito rei ämi meinisin mi weiresikis o uwochou, ngang üpwe asösökemi. 29 Oupwe ämwäralong womi ai we waas o kaiö seniei, pun ngang üa lukpwetete o tipetekison, iwe, oupwe küna söön ngünümi. Jer 6.16 30 Pun ai we waas üpwe anomu womi a mecheres, nge wosemi we üpwe ngenikemi a pän.”

11:5: Ais 35.5-6; 61.1

11:10: Mal 3.1

11:13: Luk 16.16

11:14: Mal 4.5; Mat 17.10-13; Mark 9.11-13

11:21: Ais 23.1-18; Is 26.128.26; Sow 3.4-8; Am 1.9-10; Sek 9.2-4

11:23: Ais 14.13-15; Ken 19.24-28

11:24: Mat 10.15; Luk 10.12

11:27: Joh 3.35; 1.18; 10.15

11:29: Jer 6.16