Paipel MATEUS 6
6
Än Jesus afalafal usun angangen tong
6.1-4
“Oupwe tümwünüfichi, pwe ousap föri ämi föförün pwüng mwen mesen aramas pwe repwe küna mine oua föri. Pun are oupwe föri iei usun, ousap angei och liwin seni Sememi mi nom läng. Mat 23.5 Iei mine are oupwe fang ngeni ekewe chon wöüngau och mettoch, ousap asilefetalei mine oua föri, usun ekewe chon likatuputup ra föri lon ar kewe imwen felikis pwal won ekewe al, pwe aramas repwe ingeitiir. Enlet, üpwe ürenikemi, pwe ra fen wes le angei liwiniir. Nge lupwen oupwe fang ngeni ekewe chon wöüngau, oupwe föri lon ei lapalap, pwe fen mwo nge chiechiemi kewe mi fokun kan ngenikemi resap silei usun. Iei usun ämi fang ngeni chon wöüngau epwe fis le monomon. Mürin Sememi we a küna mine oua föri le monomon epwe liwini ngenikemi.
Än Jesus afalafal usun iotek
6.5-15
(Luk 11.2-4)
“Iwe, lupwen oupwe iotek, ousap föri usun ekewe chon likatuputup. Ra efich ar repwe ütä o iotek lon ar kewe imwen felikis pwal lepwokukun ekewe al, pwe aramas repwe küneer. Enlet, üpwe ürenikemi, pwe ra fen wes le angei liwiniir. Luk 18.10-14 Nge lupwen ämi oupwe iotek, oupwe tolong lon rumwemi, oupwe apüngala asaman o iotek ngeni Sememi ousap küna. Iwe, Sememi mi küna mine oua föri le monomon epwe liwini ngenikemi. Iwe, lupwen oupwe iotek, ousap kapaspat usun chokewe resap silei Kot, pun ra ekieki pwe Kot epwe aüselinger pokiten ar iotekitam. Ousap apirüür, pun Sememi a fen silei met oua osupwang ren, mwen ousamwo tüngor ngeni. Iwe, iei usun ämi oupwe iotek:
‘Semem lon läng.
Itom epwe pin,
10 Mwum epwe war, letipom epwe fis
won fanüfan usun chök lon läng.
11 Kopwe ngenikem anem mongö ikenai.
12 Kopwe amusala äm tipis,
usun pwal äm aia amusala chokana mi tipis ngenikem.
13 Iwe, kosap atolongakem lon sosot,
nge kopwe angasakem seni ewe mi ngau.
[Pun om chök mwü me manaman
me ling feilfeilachök. Amen’] 14 Pun are oupwe amusala än aramas tipis, Sememi mi nom läng epwe pwal amusala ämi tipis. 15 Nge are ousap amusala än ekewe aramas tipis, Sememi mi nom läng esap pwal amusala ämi tipis. Mark 11.25-26
Än Jesus afalafal usun echikefel
6.16-18
16 “Iwe, lupwen oupwe echikefel, ousap wowongau usun ekewe chon likatuputup ra föri. Ra awowongaueer, pwe aramas meinisin repwe küna pwe ra echikefel. Enlet, üpwe ürenikemi, pwe ra fen wes le angei liwiniir. 17 Nge lupwen ämi oupwe echikefel, oupwe epiti möküremi o oresi wonmesemi, 18 pwe ekewe aramas resap silei pwe oua echikefel. Nge Sememi we ousap küna, i epwe silei. Iwe, Sememi mi küna mine oua föri le monomon epwe liwini ngenikemi.
Än Jesus afalafal usun ach ioni wöüch lon läng
6.19-21
(Luk 12.33-34)
19 “Ousap iseis wöümi fän püsin itemi won fanüfan, ia ekewe pwötür me parang ra atarela, nge chon solä ra atai o soläni. Jas 5.2-3 20 Nge oupwe iseis wöümi lon läng ia ekewe pwötür me parang resap tongeni atarela, nge chon solä resap tongeni atai o soläni. 21 Pun ia wöümi a nom ie, ikenan lelukemi epwe pwal nom ie.
Än Jesus afalafal usun ewe saramen inis
6.22-23
(Luk 11.34-36)
22 “Mas saramen ewe inis, usun chök eu lamp. Are mesom a fat, unusen inisum a saram. 23 Nge are mesom a fatangau, unusen inisum epwe rochopwak. Iei mine are ewe saram mi nom lomw a wiliti rochopwak, epwe ifan me watten rochokichin rochopwakum!
Än Jesus afalafal usun Kot me wöün fanüfan
6.24-34
(Luk 16.13; 12.22-31)
24 “Esap wor eman a tongeni angang ngeni ruoman samol. Pun epwe oput eman, nge epwe echeni ewe eman, ika epwe tipeni eman, nge epwe turunufasei ewe eman. Ousap tongeni angangepök ngeni Kot me wöün fanüfan. 25 Iei mine üpwe ürenikemi, pwe ousap öüreki manauemi usun mine oupwe äni are ünümi, ousap öüreki mine oupwe üföüf. Ifa usun, manau esap aüchea seni mongö, ika ewe inis esap aüchea seni üf? 26 Oupwe nenengeni ekewe mansüsü: Resap fofot, resap pwal kinikin, esap wor ar lenien iseis, nge Sememi lon läng a fen amongöniir. Ifa usun, ämi ousap kon aüchea seniir? 27 Ifa usun, iö leimi epwe tongeni atama manauan ren an öürek? 28 Pwota oua öüreki üfemi? Oupwe nenengeni ekewe kiopun lemäl usun ra märitä: Resap angang, resap pwal föri üfer. 29 Nge ngang üpwe ürenikemi, pwe fen mwo ewe king Salomon lon wöün meinisin esap üföüf üf mi ling usun lingen ekei pön kiop. 1.King 10.4-7; 2.Kron 9.3-6 30 Are iei usun än Kot aüfa ekewe fetilin lemäl, fetil mi wor ikenai, nge lesor epwe koturulong lon um, ifa usun, Kot esap fokun aüföüfakemi lap seniir? Ämi oua lükülük kisikis! 31 Iei mine ousap öürek o apasa, ‘Meta sipwe mongö?’ ika ‘Meta sipwe ünümi?’ ika ‘Meta sipwe üföüf?’ 32 Pun chokewe resap silei Kot ra chök ekieki usun ekei mettoch. Iwe, Sememi lon läng a silei pwe oua osupwang ren ekei mettoch. 33 Nge oupwe chök ekieki lon letipemi ewe Mwün Kot me pwüngün, iwe, i epwe ngenikemi ekei mettoch meinisin. 34 Iei mine ousap öürek usun ewe rän lesor, pun lesor epwe püsin anafa öürekin lon. Eu me eu rän epwe püsin wor osukosuken lon.

6:1: Mat 23.5

6:5: Luk 18.10-14

6:15: Mark 11.25-26

6:19: Jas 5.2-3

6:29: 1.King 10.4-7; 2.Kron 9.3-6