4
Satan a sotuni Jesus
4.1-11
(Mark 1.12-13; Luk 4.1-13)
Iwe, mürin Ngünmifel a emwenala Jesus lon ewe fanüapö pwe epwe küna sosot me ren Tefil. Ipr 2.18; 4.15 Nge pokiten Jesus esap mongö och lon ükükün faik rän me faik pwin, a mefi echik. Iwe, ewe Tefil a feito ren o üreni, “Are en Nöün Kot, kopwe üreni ekei fau pwe repwe wiliti mongö.” Nge Jesus a pölüeni, “A mak lon ekewe Toropwe mi Pin, ‘Aramas resap manau ren mongö chök, pwe ra manau ren iteiten kapas Kot a apasa.’ ” Tut 8.3
Mürin ewe Tefil a panala Jesus Jerusalem, ewe telinimw mi pin o aütai won ungen ewe imwenfel. Iwe, a üreni, “Are en Nöün Kot, kopwe aturuketiu me ikei, pun a mak lon ekewe Toropwe mi Pin,
‘Epwe allük ngeni nöün kewe chon läng, pwe repwe tümwünuk.
Repwe pwisuk le pöür kana pwe pecheöm esap chepeti eföü fau.’ ” Kölf 91.11-12 Jesus a pölüeni, “A pwal mak lon ekewe Toropwe mi Pin, ‘Kosap sotuni ewe Samol om we Kot.’ ” Tut 6.16
Mürin ewe Tefil a pwal panatä Jesus won eu chuk mi fokun tekia o aküna ngeni mwün fanüfan meinisin me linger. Iwe, a üreni, “Ekei mettoch meinisin üpwe ngonuk, are kopwe chapetiu mwei o fel ngeniei.” 10 Jesus a üreni, “Kopwe sü seniei Satan! Pun a mak lon ekewe Toropwe mi Pin, ‘Kopwe fel ngeni ewe Samol om Kot o angang ngeni i chök.’ ” Tut 6.13 11 Mürin ewe Tefil a likitala Jesus, nge nengeni, ekewe chon läng ra feito ren o tümwünü.
Jesus a popuetä an angang lon Kalilea
4.12-17
(Mark 1.14-15; Luk 4.14-15)
12 Iwe, lupwen Jesus a rong pwe Johannes a nom lon fötek, a feila Kalilea. Mat 14.3; Mark 6.17; Luk 3.19-20 13 Nge esap nonometiu lon Nasaret, nge a feila o nonom lon Kapernaum, eu telinimw mi nom arun ewe nomun Kalilea lon fanüen Sepulon me Naftali. Joh 2.12 14 Ei a fis pwe epwe pwönüetä mine ewe soufos Aisea a apasa,
15 “Ewe fanü Sepulon me ewe fanü Naftali won ewe al mi ale ngeni ewe matau,
pekilan ewe chanpupu Jortan me epek, Kalilea, fanüen ekewe chon lükün Israel!
16 Ekewe aramas mi nom lon rochopwak ra küna eu saram mi watte,
nge fän iten chokewe mi nom lon kirochen fanüen mäla eu saram a tinetiu wor.” Ais 9.1-2 17 Seni ena fansoun Jesus a popuetä le eäni ei afalafal, “Oupwe aier seni ämi tipis, pun a arap Mwün Läng!” Mat 3.2
Jesus a köri föman chon attau
4.18-22
(Mark 1.16-20; Luk 5.1-11)
18 Iwe, lupwen Jesus a fetal arun ewe nomun Kalilea, a küna ruoman pwipwi, ir chon attau, Simon, a pwal iteni Petrus me pwiin we Andru, ra aturätiu nöür chew lon ewe noom. 19 Jesus a üreniir, “Oupwe tapweto müri pwe üpwe aiti ngenikemi usun ämi oupwe attaua aramas.” 20 Lon ewe chök otun ra likitala nöür kewe chew o tapwela mürin Jesus. 21 Jesus a pwal feila lon eu leni o a küna pwal ruoman pwipwi, James me Johannes nöün Sepeti kewe. Ra nom won waar we fiti semer we Sepeti le wonefi nöür kewe chew. Jesus a köriir, 22 nge lon ewe chök otun ra likitala waar we me semer we o tapwela mürin.
Jesus a afalafal o apöchöküla aramas
4.23-25
(Luk 6.17-19)
23 Iwe, Jesus a fetalfeil lon unusen Kalilea, a aiti ngeni aramas kapasen Kot me lon ekewe imwen felikis, a afalafala ewe Pworaus Allim usun ewe Mwün Kot, a pwal apöchöküla aramas mi eäni sokopaten samau me apwangapwang. Mat 9.35; Mark 1.39 24 Iwe, pworausen Jesus a chöfetal lon unusen ewe fanü Siria, pwe ekewe aramas ra uwato ren ekewe chon samau meinisin, chokewe mi üriir sokopaten samau o metek, aramas mi waan anü, mään kawakau me aramas mi mwök. Iwe, Jesus a apöchöküleretä meinisin. 25 Eu mwichen aramas mi chomong ra tapwela mürin Jesus seni Kalilea me ewe fanü itan Engol Telinimw, seni Jerusalem me Jutea me ewe fanü ünükün ewe chanpupu Jortan me ewe epek.

4:1: Ipr 2.18; 4.15

4:4: Tut 8.3

4:6: Kölf 91.11-12

4:7: Tut 6.16

4:10: Tut 6.13

4:12: Mat 14.3; Mark 6.17; Luk 3.19-20

4:13: Joh 2.12

4:16: Ais 9.1-2

4:17: Mat 3.2

4:23: Mat 9.35; Mark 1.39