Paipel JOSUA 14
14
Ewe fanü Kanaan a ainet ren üttüt
14.1-5
Iei pworausen inetin ewe fanü Kanaan mi nom lotoun ewe chanpupu Jortan ngeni ekewe aramasen Israel. Ewe souasor Eleasar me Josua nöün Nun we mwän, pwal souemwenin än semer kewe cho seni ekewe ainangen Israel ra aineti ewe fanü ngeniir. Iwe, ra angei fanüer ren üttüt, usun ewe Samol mi Lapalap a fen allük fän iten ekewe tiu esop ainang. Num 26.52-56; 34.13 Pun Moses a fen ngeni ekewe ruu esop ainang fanüer ötiuen ewe chanpupu Jortan. Num 32.33; 34.14-15; Tut 3.12-17 Pun ekewe mwirimwirin Josef ra ruu ainang, ekewe ainangen Manasa me Efraim. Nge chon ewe ainangen Lefi resap angei eu kinikin me lon ewe fanü, pwe ra chök angei telinimw pwe repwe imweimw lon fiti ekewe fanü ünükür fän iten nöür man. Iwe, ekewe aramasen Israel ra aineti ewe fanü ren üttüt, usun mine ewe Samol mi Lapalap a allük ngeni Moses.
Josua a ngeni Kalep ewe telinimw Hepron
14.6-15
Lon eu rän ekoch re Juta ra feito ren Josua lon Kilkal. Iwe, eman me leir itan Kalep nöün Jefune we mwän, ewe re Kenis, a üreni Josua, “En ka silei mine ewe Samol mi Lapalap a üreni Moses ewe aramasen Kot me lon Kates-parnea usun en me ngang. Num 14.30
Ngang üa ierini faik lupwen Moses nöün ewe Samol mi Lapalap we chon angang a tinieila seni Kates-parnea pwe üpwe operi ewe fanü. Iwe, üa uwato ren eu pworaus usun mefien lelukei. Num 13.1-30 Nge pwii kewe mi etiei le feila ra akisikisala leluken ekewe aramas. Nge ngang üa fokun apwönüetä letipen ewe Samol mi Lapalap ai we Kot. Iwe, lon ewe ränin Moses a pwon fän akapel ngeniei o apasa, ‘Ellet, ewe fanü ka fen ipwetiu won epwe fanüom me noum kana tori feilfeilachök, pokiten ka apwönüetä letipen ewe Samol mi Lapalap ai we Kot.’ Num 14.24 10 Nengeni, iei ewe Samol mi Lapalap a amanauaei usun a apasa. Iei a faik me limu ier seni ewe fansoun ewe Samol mi Lapalap a eäni ei kapas ngeni Moses, lupwen chon Israel ra fetalfeil lon ewe fanüapö. Ikenai üa ierini walik me limu. 11 Ngang üa chüen pöchökül tori ikenai, usun pöchökülei lon ewe fansoun Moses a tinieila. Ikenai üa chüen pöchökül le feila maun usun chök lepöchökülei me lom. 12 Iei mine kopwe ngeniei ewe fanü mi chukuchukutä, ewe Samol mi Lapalap a fen pwon ngeniei lon ewe ränin. Ka pwal rong lon ewe fansoun pwe ekewe mwirimwirin Anak ra nom ikenan, nge ar kewe telinimw ra watte o pöchökül tittir. Eli ewe Samol mi Lapalap epwe etiei pwe üpwe asürela, usun a fen apasa.”
13 Iwe, Josua a afeiöchü Kalep. A ngeni Kalep nöün Jefune we mwän ewe telinimw Hepron pwe epwe telinimweni. 14 Iei mine ekewe mwirimwirin Kalep nöün Jefune we mwän, ewe re Kenis, ra telinimweni Hepron tori ikenai, pun Kalep a fokun apwönüetä letipen ewe Samol mi Lapalap ewe Koten Israel. 15 Iwe, iten Hepron me lom telinimwen Arpa. Nge Arpa eman mwän mi iteföüla me lein mwirimwirin Anak. Iwe, ewe fanü a kinamwe, pun esap chüen wor maun.

14:2: Num 26.52-56; 34.13

14:3: Num 32.33; 34.14-15; Tut 3.12-17

14:6: Num 14.30

14:7: Num 13.1-30

14:9: Num 14.24