Paipel JOSUA 6
6
Jeriko a oola
6.1-21
Iwe, asamalapen ewe telinimw Jeriko ra kapüngüla pwe ekewe aramasen Israel resap tongeni tolong lon. Esap wor eman a tongeni towu ika tolong. Nge ewe Samol mi Lapalap a üreni Josua, “Nengeni, üa atolonga Jeriko fän nemeniom fiti an king me nöün kewe sounfiu mi pöchökül o pwora. Oupwe karis lükün pwelin ewe telinimw, pwe ekewe sounfiu meinisin repwe pweli ewe telinimw fän eu. Oupwe föri iei usun lon ükükün wonu rän. Füman souasor repwe uwei fisu rappwa seni mächän ätemwänin sip me mwen ewe pworofel. Nge lon afisuen rän oupwe karis lükün pwelin ewe telinimw fän fisu, nge ekewe souasor repwe ettiki ekewe rappwa. Iwe, lon ewe otun, lupwen oupwe rongorong tikin ekewe rappwa pwe ra tikitam, ekewe aramas meinisin repwe leüömong le arükak. Iwe, tittin ewe telinimw epwe turutiu, nge ekewe aramas repwe töfochofocholong lon seni en me awenewenen lenian. Iwe, Josua nöün Nun we mwän a körato ekewe souasor o üreniir, “Oupwe eki ewe pworofel, nge füman me leimi repwe uwei fisu rappwa seni mächän ätemwänin sip me mwen än ewe Samol mi Lapalap we pworofel.” Mürin, Josua a üreni ekewe aramas, “Oupwe feila o karis lükün pwelin ewe telinimw, nge ekewe mwän mi eäni pisekin maun repwe akomwola mwen än ewe Samol mi Lapalap we pworofel.”
Nge wesin än Josua kapas ngeni ekewe aramas, ekewe füman souasor mi uwei ekewe fisu rappwa me fän mesen ewe Samol mi Lapalap ra popuetä le fetal o ettiki ekewe rappwa, nge chokewe mi mwärei än ewe Samol mi Lapalap we pworofel ra tapwela mürir. Iwe, ekewe mwän mi eäni pisekin maun ra akom mwen ekewe souasor mi ettiki ekewe rappwa. Nge eu mwichen sounfiu a pwal tapweto mürin ewe pworofel, lupwen ekewe rappwa ra tikifochofoch. 10 Nge Josua a allük ngeni ekewe aramas, “Ousap arükak ika lalal, esap pwal wor eu kapas epwe towu seni awemi tori ewe rän üpwe ürenikemi pwe oupwe arükak. Mürin oupwap arükak.” 11 Iwe, Josua a allük pwe repwe apwelifeili fän eu än ewe Samol mi Lapalap we pworofel lükün ewe telinimw. Mürin ra liwiniti ewe leni ia ra nonom ie o pwinipwin ikenan.
12 Iwe, Josua a pwätä lesosorusich, nge ekewe souasor ra eki än ewe Samol mi Lapalap we pworofel. 13 Ekewe füman souasor mi uwei ekewe fisu rappwa ra akomwola mwen än ewe Samol mi Lapalap we pworofel o atikifochei ekewe rappwa. Iwe, ekewe mwän mi eäni pisekin maun ra akom mwer, nge eu mwichen sounfiu a tapweto mürin än ewe Samol mi Lapalap we pworofel, lupwen ekewe rappwa ra tikifochofoch. 14 Iwe, lon aruuen rän ra pwal karis lükün pwelin ewe telinimw fän eu. Mürin ra liwiniti ewe leni ia ra nonom ie. Ra föri iei usun lon ükükün wonu rän.
15 Iwe, lon afisuen rän ra pwätä lesosorusich o karis lükün pwelin ewe telinimw fän fisu usun chök me mwan. Nge lon ewe chök rän ra karis lükün pwelin ewe telinimw fän fisu. 16 Nge lupwen ekewe souasor ra ettiki ekewe rappwa lon afisuen fansoun ar karis, Josua a üreni ekewe aramas, “Oupwe arükak. Pun ewe Samol mi Lapalap a ngenikemi ewe telinimw. 17 Iwe, ewe telinimw me mettoch meinisin mi nom lon repwe pin fän iten ewe Samol mi Lapalap pwe repwe katala. Chilon chök Rahap ewe fin lisowu me meinisin mi nom ren lon imwan repwe manau, pun a aopa ekewe chon künö sia tiniir. 18 Nge ämi oupwe afälikemi ren ekewe mettoch mi pin repwe kata. Pun lupwen oupwe apiniir pwe repwe kata, nge mürin oua angei och seniir, oupwe atoto tatakis me feiengau won lenien chon Israel. 19 Nge silifer me kolt meinisin me ekewe sepi mi för seni piras me mächä ra pin fän iten ewe Samol mi Lapalap. Repwe tolong lon än ewe Samol mi Lapalap lenien iseis.” 20 Iwe, ekewe souasor ra ettiki ekewe rappwa. Lon ewe otun ekewe aramas ra rongorong tikin rappwa, ra leüömong le arükak, nge ewe tit a turutiu. Mürin ekewe aramas ra töfochofocholong lon ewe telinimw seni en me awenewenen lenian o liapeni ewe telinimw. Ipr 11.30 21 Iwe, ra ataala mettochun lon ewe telinimw meinisin o niela mwän me fefin, semirit me chinlap, ätemwänin kow me sip me aas ren nöür ketilas.
22 Iwe, Josua a üreni ekewe ruoman mwän mi operi ewe fanü, “Oupwe tolong lon imwen ewe fin lisowu o emwenawu me aramasan meinisin, usun oua fen pwon ngeni fän akapel.” 23 Iei mine ekewe alüal mi piin operi ewe fanü ra tolong lon o emwenawu Rahap pwal saman me inan, mongean me aramasan meinisin. Iwe, ra emwenirewu meinisin o anomuur lükün ewe leni ia chon Israel ra nom ie. 24 Mürin ra keni ewe telinimw me meinisin mine a nom lon. Nge silifer me kolt, pwal ekewe sepi mi för seni piras me mächä ra iseis lon ewe lenien iseis lon imwen ewe Samol mi Lapalap. 25 Nge Josua a amanaua Rahap ewe fin lisowu me chon leimwen saman meinisin, pwal aramasan meinisin, pokiten a aopa ekewe chon künö Josua a tinirela pwe repwe operi Jeriko. Iwe, ekewe mwirimwirin Rahap ra nom lon Israel tori ikenai. Ipr 11.31
26 Lon ei fansoun Josua a eäni ei pwon fän akapel ngeni chon Israel o apasa, “A anümamau me ren ewe Samol mi Lapalap eman mwän mi aüsefälietä ewe telinimw Jeriko.
Iö a föri longolongun ewe telinimw,
nöün mwänichi epwe mäla.
Nge iö a apachätä asamalapan,
nöün setiputur epwe mäla.” 1.King 16.34 27 Iei usun ewe Samol mi Lapalap a eti Josua, iwe, an iteüöch a chöfetal lon unusen ewe fanü.

6:20: Ipr 11.30

6:25: Ipr 11.31

6:26: 1.King 16.34