5
Chon Israel ra sirkomsais o föri ewe Pasofer me lon Kilkal
5.1-12
Iwe, lupwen ekewe kingen chon Amor meinisin mi nom lotoun ewe chanpupu Jortan me ekewe kingen chon Kanaan meinisin mi nom aroset ra rongorong, pwe ewe Samol mi Lapalap a apwasatä lölön ewe chanpupu Jortan fän iten ekewe aramasen Israel tori ra pwerela pekila, a kisikisila leluker o ra rükö pokiten ekewe aramasen Israel.
Lon ena fansoun ewe Samol mi Lapalap a üreni Josua, “Kopwe föri sar seni fau mi pöchökül o sirkomsaisi ekewe re Israel resamwo sirkomsais.” Iei mine Josua a föri sar seni fau mi pöchökül o sirkomsaisi ekewe re Israel me lon Kipeat-haaralot. Mi wor popun pwe Josua a sirkomsaisiir. Pun lon ekewe faik ier, lupwen ekewe aramasen Israel ra sai lon ewe fanüapö, nöür kewe ät resamwo sirkomsais. Nge ekewe mwän meinisin me lein ekewe aramas mi towu seni Isip ra fen sirkomsais. Iwe, sopolan ekewe faik ier ekewe mwän meinisin mi tori ierin sounfiu lupwen ar towu seni Isip ra rosola, pokiten resap aleasochisi alon ewe Samol mi Lapalap. Pun a pwon fän akapel ngeniir, pwe esap mwüt ngeniir pwe repwe küna ewe fanü mi pwülüöch o fanüeräs a pwon ngeni ar kewe lewo, pwe epwe ngeniir. Num 14.28-35 Iwe, nöür kewe, Kot a amäriretä me mürir, Josua a sirkomsaisiir. Pun ir resap sirkomsais lupwen ar sai.
Iwe, wesin ewe angangen sirkomsais won ekewe aramas meinisin, ra nonom lon ewe leni ia ra nom ie, tori ra pöchökülsefäl. Nge ewe Samol mi Lapalap a üreni Josua, “Ikenai üa angei senikemi ämi itengau me ren chon Isip.” Iei mine ewe leni a iteni Kilkal * wewen Kilkal angei seni tori ikenai.
10 Iwe, lupwen ekewe aramasen Israel ra nom lon Kilkal, ra föri ewe Pasofer lekuniolun ewe engol me rüanün ränin ewe maram lon ewe maasiesin Jeriko. Eks 12.1-13 11 Nge sorotän mürin ewe Pasofer, lon ewe chök ränin, ra mongö seni mine a mär lon ewe fanü. Ra mongö pilawa esap wor iis lon me föün wiich mi kapwich. 12 Iwe, seni lesosorun ewe rän ra mongö seni mine a mär lon ewe fanü, esap chüen wor enen ekewe aramasen Israel mana. Nge ra mongö seni uän irän ewe fanü Kanaan lon ewe ier. Eks 16.35
Josua me ewe mwän mi kömwöch efoch ketilas
5.13-15
13 Lupwen Josua a nom arun Jeriko, a küna eman mwän mi ütä me mwan, a amwöchü efoch ketilas. Iwe, Josua a feila ren o aisini, “Ifa usun, en peliem ika pelien chon oputakem?” 14 Nge ewe mwän a pälüeni, “Apwi, üa feito, pun ngang ewe chon nemenemen än ewe Samol mi Lapalap mwichen sounfiu.” Iwe, Josua a chapetiu lepwül, a fel ngeni o aisini, “Ai samol, met ka mochen akünöü ngeniei ngang noum chon angang?” 15 Iwe, ewe chon nemenemen än ewe Samol mi Lapalap mwichen sounfiu a üreni Josua, “Kopwe pwilitawu ipwom sus, pun ei leni ka ütä won a pin.” Iwe, Josua a föri iei usun.

5:6: Num 14.28-35

*5:9: wewen Kilkal angei seni

5:10: Eks 12.1-13

5:12: Eks 16.35