Paipel SONA 2
2
Sona a iotekin kilisou
2.1-10
Iwe, Sona a iotek ngeni ewe Samol mi Lapalap an we Kot me lon upwen ewe ik. A apasa,
“Üa köruk, ai Samol mi Lapalap, lon ai riaföü,
iwe, ka aüselingaei.
Üa siö ngonuk seni lon lenien sotup,
nge ka rongorong mweliei.
Ka aturueitiu fänilolun lukalapen matau,
sät a pwelifeiliei,
nge no kana ra tekiatä o pwölüeila.
Iwe, üa ekieki pwe üa pöüt seni fän mesom.
Ifa usun, üpwe chüen tongeni künasefäli imwom imwenfel?
No kana ra pwölüeila pwe üa ächetä ren,
üa nonom fänilolun matau,
nge irän lematau ra fitti mökürei.
Üa kokotiu tori lepopun chuk kana,
üa tori eu fanü asaman ra lokola tori feilfeilachök.
Iwe, nge en, Samol mi Lapalap ai Kot, ka efieita seni epin fanüfan o amanauaei.
Lupwen üa mefi pwe üpwe le mäla,
üa chechemenuk ai Samol mi Lapalap.
Iwe, ai iotek a toruk lon imwom mi pin.
Iwe, chokewe mi fel ngeni uluulun anümwäl mi lomotongau
ra likitukela, en echök mi tongeni ümöümöch ngeniir.
Nge ngang üpwe kölün kilisou ngonuk,
üpwe asor ngonuk o föri mine üa eäni pwon ngonuk.
Pun en chök, ai Samol mi Lapalap, ka tufichin angasaei.” 10 Mürin, ewe Samol mi Lapalap a kapas ngeni ewe ik. Iwe, ewe ik a musäsinätä Sona wilifanü.