32
Elihu a alletä pwe a wor an pwüng pwe epwe pälüeni Hiop
32.1-22
1 Iwe, ekei ülüman mwän ra ükütiu le pälüeni Hiop, pun Hiop a lükü pwe a wor püsin an pwüng. 2 Mürin, Elihu nöün Parakel we mwän ewe re Pus seni ewe familien Ram a song. A song ngeni Hiop, pun a ekieki pwe i a pwüng, nge Kot a mwäl. 3 A pwal song ngeni chiechien Hiop kewe ülüman, pun esap chüen wor mine repwe pälüeni ngeni Hiop, inamwo ika ra fen pwärätä pwe i a mwäl. 4 Iwe, Elihu a witiwit le kapas ngeni Hiop, pun i a kis seniir meinisin. 5 Nge lupwen Elihu a küna pwe ekei ülüman mwän resap chüen tongeni pälüeni Hiop, a song. 6 Mürin, Elihu a popuetä le kapas,
“Ngang üa ier kükün, nge ämi oua ier watte.
Iei mine üa säw o niuokus ai üpwe pwärätä mefiei ngenikemi.
7 Üa ekieki, ‘Ir mi chinlap repwe kapas,
nge chokewe mi ieritam repwe aiti ngeni aramas tipachem.’
8 Nge Ngünün Ewe mi Unusen Manaman mi nom lon aramas
a atufichiir pwe repwe weweöch.
9 Sap ir mi chinlap ra tipachem,
sap pwal ir mi ier watte ra wewe ren mine a pwüng.
10 Iei mine oupwe aüselingaei,
oupwe mwüt ngeniei pwe üpwe pwal pwärätä mefiei.
11 Nengeni, üa witiwit lupwen oua kapas,
üa aüseling ngeni ämi kapasen tipachem,
lupwen oua fokun küttaöchü mine oupwe apasa.
12 Üa aü selingei ngenikemi,
nge esap wor eman me leimi mi alletä pwe Hiop a mwäl
ika pälüeni an kewe kapas.
13 Ousap apasa, ‘Äm aia küna tipachem.
Kot echök epwe apälüa Hiop, nge sap aramas.’
14 Hiop esap awena an kapas ngeniei,
nge ngang üsap mochen pälüeni lon ititin ämi kapas.
15 Iwe, esap chüen wor mine repwe pälüeni ngonuk, Hiop,
esap chüen wor mine repwe tongeni apasa.
16 Ifa usun, üpwe chök witiwit pokiten ir resap fos,
pun ra chök ü ikenan, nge resap chüen apasa och?
17 Apwi! Pwal ngang üpwe awora ai pälüen.
Üpwe pwal pwärätä mefiei.
18 Pun üse chüen tongeni fanafanala.
Üse chüen tongeni amwöchü ai kapas.
19 Mefien lelukei a usun chök wain lon rume esap tongeni purowu,
a usun chök eu minefön rumen wain mi arap ngeni an epwe mök.
20 Üpwe fokun kapas pwe epwe manösösöla lelukei,
üpwe amasaaw o kapas.
21 Üsap lifilifil ngeni eman aramas,
üsap pwal eäni kapas motoutou ngeni eman.
22 Pun are üpwe sip lon kapas motoutou,
ewe Chon Föriei epwe müttir angeeila.”