Paipel HIOP 31
31
Hiop a kamwöchünük won an wenechar
31.1-40
“Üa föri eu pwon ngeni mesei
pwe üsap nenengeni eman föpwül fän mocheisou.
Met wisei me ren Kot,
nge met ineti me ren Ewe mi Unusen Manaman mi nom lon läng?
Ifa usun, feiengau esap feitiu won eman chon pwüngingau,
nge riaföü esap tori chokewe mi föföringau?
Ifa usun, Kot esap silei meinisin mine üa föri
o küna fefetalin pechei?
 
Üa pwärätä pwe üsap föri föför mi mwäl,
ika föri föförün atuputup.
Kot epwe kiloniei won eu kilo mi pwüng,
pwe epwe küna pwe üsap tipis.
Are pechei a tokola seni ewe al mi pwüng
o lelukei a chei nennen mesei,
are pei a limengau ren tipis,
mürin üpwe fofot, nge eman epwe eni,
nge mine a märitä fän itei epwe üttütä.
 
Are üa mocheniaiti pwülüen chon ari,
ika üa operi lükün asamen imwan,
10 mürin pwülüei epwe üsüs föün wiich fän iten pwal eman mwän usun eman amanau,
pwal ekoch mwän repwe annut ren.
11 Pun ekiekekin fefin eu föför mi fokun ingau,
eu tipis ekewe soukapwüng repwe apwüngü,
12 a usun chök eu ekkei a külong lon ewe leni mi alolol,
epwe kenala meinisin mine ai.
 
13 Are üa amwöchü seni nei chon angang mwän ika chon angang fefin ar pwüng,
lupwen ra pälüeniei ren och osukosuk,
14 mürin met üpwe föri, are Kot epwe ü ngeniei?
Met üpwe pälüeni ngeni, are epwe apwüngüei?
15 Ifa usun, Kot mi föriei esap pwal föriir?
Ifa usun, esap eman chök Kot a alapalapakem lon letipen inem?
 
16 Ifa usun, üa amwöchü seni ekewe chon wöüngau mine ra tüngor,
ika popwi pwe ewe fefin mi mä pwülüan a tton mesan ren kechü?
17 Ifa usun, ngang echök üa eni enei,
nge ekewe mi mäsen resap mongö seni?
18 Apwi! Seni lealüali üa foleniir usun eman sam,
nge lon unusen manauei üa tümwünü fefin mi mä pwülüer.
 
19 Lupwen üa küna eman mi mwelele esap wor üfan,
ika eman mi wöüngau esap wor pwölüpwölün,
20 üa fang ngeni üf mi för seni ülöülen nei sip pwe epwe üföüf.
Mürin a mwareitiei ren unusen lelukan.
21 Are üa amola ai üpwe angeetä won ewe mi mäsen,
pun üa silei pwe mi wor manei lon kapwüng,
22 mürin chün afarei epwe imwü seni afarei,
nge pei epwe üttüwu seni lekamasan.
23 Pun üa niueiti än Kot apwüng,
iei mine üsap tongeni föri ekei sokun föför.
 
24 Ifa usun, üa anomu ai apilükülüköch won kolt,
ika apasa pwe kolt mi mürina ai apilükülük?
25 Ifa usun, üa sikesik pokiten watten wöüi,
ika pokiten pei a aworato chomong mettoch?
26 Ifa usun, üa fel ngeni akkar lupwen a tin,
ika ngeni maram lon lingan lupwen a tö,
27 pwe lelukei a tokola lemonomon,
pwe üa asamoluur ren ai tinala ai kapongen menin ngeniir?
28 Pwal ei epwe eu föför mi ngau ekewe soukapwüng repwe apwüngü,
pun üpwe amamäsini Kot lon läng.
 
29 Üsap fokun meseik ren feiengauen ekewe chon oputaei,
ika mwänek, lupwen riaföü a toriir.
30 Ngang üsap tipis ren ai üpwe anümamaueer.
31 Nei kewe chon angang meinisin ra silei
pwe üa amongöü ekewe chon ekis fansoun meinisin.
32 Ekewe chon saifetal resap nomofetal won al lepwin,
pun üa etiweer lon imwei.
33 Üsap tukumala ai pupungau usun aramas ra föri,
o opala ai tipis.
34 Üsap fokun niuokusiti mine ekewe aramas ra ngününgünüei won,
ika niueiti ar turunufaseei,
pwe üpwe fanafanala o nonom chök lon imwei.
35 Amwo a wor eman epwe aüselingaei. Iei sainin itei.
Ewe mi Unusen Manaman epwe pälüeniei.
Amwo epwe wor rei ewe toropwen atutur,
ewe chon atipisiei a makei.
36 Ellet, üpwe mwärei won afarei
o rietä won mökürei pwe mwäri.
37 Üpwe aiteitä ngeni Kot meinisin mine üa föri lon manauei.
Üpwe feila ren fän wenecharen letipei.
 
38 Are üa tömwälilong lon eu fanü o angang won,
39 are üa mongö uan, nge üsap möni mwo ewe fanü,
are popwi pwe mine fanüan ewe a mäla ren echik,
40 mürin iräfölüföl repwe märitä won, nge sap wiich,
pwal fetilingau, nge sap parli.”
Än Hiop kewe kapas ra müchüla.