28
Aramas ra küttafesifesi tipachem
28.1-28
“Ellet mi wor eu lenien silifer fän pwül,
mi pwal wor eu leni ia aramas ra limeti kolt ie.
Aramas ra atowu mächä seni fän pwül,
ra pwal eteli kapa mi nofitfengen me fau pwe repwe imwüfesen.
Aramas ra awesi rochopwak,
lupwen ra tötiu epin fanüfan,
pwe repwe tuw ekewe fau lon ewe lenien rochokichin rochopwak.
Ra tuw pwang mi alolol lon ekewe lemol.
Ikkei ekewe leni aramas resap feila ngeni,
pun ra toau seni ewe ia aramas ra nom ie.
Ra fisenitiu won säl lon ekewe pwang o likamwaüchfeil.
Irän mongö ra märitä won pwül,
nge fan a fis tatakis usun ekkei a atai mettoch.
Ekewe fau aüchea iter safaia ra nom lon ekewe fau,
mi pwal wor moromoren kolt lon ewe pwül.
 
Esap wor eman machang mi mwacho a silei ewe al mi aletiu fan,
pwal ewe machang itan falkon esap fen küna.
Ekewe manmwacho mi pwora resap fetal won,
esap pwal wor eman laion epwe pwerela won.
 
Aramas ra amökkü ekewe achau mi fokun pöchökül
o tuw ekewe chuk pwe epwe pwä lepopur.
10 Ra tuw al lon ekewe achau
o küna mettoch mi fokun aüchea.
11 Ra pinei michchin ekewe koluk pwe resap mich,
o pwärawu ekewe mettoch mi monomon lon saram.
 
12 Nge ia sipwe küna me ie tipachem?
Ia sia tongeni kaiö weweöch me ie?
13 Aramas resap silei aüchean tipachem,
esap wor eman a tongeni küna me lon fanüen ekewe mi manau.
14 Ewe leni mi alolol a apasa, ‘Tipachem esap nom loi,’
nge matau a apasa, ‘Esap nom rei.’
15 Sisap tongeni kamö ren kolt ika liwini ngeni silifer.
16 Tipachem a kon aüchea seni ewe kolt seni Ofair
me ekewe fau aüchea iter oniks me safaia.
17 Kolt me kilas mi aüchea resap wewe ngeni aüchean tipachem,
fout seni kolt mi mürina esap tongeni akasiwil ngeni.
18 Sisap tongeni awewe ngeni tipachem eengin leset ika kilas mi molupolup,
liwinin a lap seni liwinin föün pwei.
19 Ewe fau aüchea itan topas seni Itiopia esap tongeni wewe ngeni,
tipachem a kon aüchea seni kolt mi mürina.
 
20 Ian chök tipachem a feito me ie?
Nge ifa lenien ach kaiö weweöch?
21 A opola seni mesen mönümanau meinisin
o monola seni ekewe machangen failäng.
22 Ewe leni mi alolol me mäla ra apasa,
‘Äm aia chök rongorong püngöpüngan.’
 
23 Kot echök a silei ewe al ngeni tipachem,
i a silei lenian.
24 Pun a nenengeni lesopun fanüfan
o küna mettoch meinisin mi nom failäng.
25 Lupwen Kot a awora ngeni asepwäl an pöchökül
o aükü ekewe matau ngeni ükükün,
26 lupwen a föri allük fän iten püngün üt
o awora efoch al fän iten fifi me chopulap,
27 iei otun a küna tipachem o pwärätä usun,
a anüküchara o aükü alololun.
28 Nge a üreni aramas, ‘Ämi niuokusiti ewe Samol iei tipachem,
nge ämi sü seni mine a ngau iei weweöch.’ ” Kölf 111.10; SalF 1.7; 9.10

28:28: Kölf 111.10; SalF 1.7; 9.10