27
Hiop a afata mine epwe fis ngeni ekewe aramasangau
27.1-23
Iwe, Hiop a sopwela an pworaus o apasa,
“Mwo manauen Kot ewe mi Unusen Manaman mi angei seniei ai pwüng o atatakisi letipei,
ükükün fansoun ngasangasei epwe nom leuti
o ngasangasen Kot a nom lon pwöti,
tinawei esap apasawu kapas chofana,
nge chönawei esap atowu kapas atuputup.
Esap fokun tufich ai üpwe apasa pwe oua pwüng.
Tori üpwe mäla, üsap ükütiu le apasa pwe üa wenechar.
Üpwe kamwöchünük won ai pwüng, nge üsap mwüt ngeni pwe epwe feil seniei.
Esap wor mengiringirin lelukei pokiten och föförün lon manauei.
 
Amwo ewe chon oputaei epwe wewe ngeni eman aramasangau,
nge ätewe mi ü ngeniei epwe wewe ngeni eman chon pwüngingau.
Pun ifan än ätewe esap aleasochisi Kot apilükülük,
lupwen Kot a angei manauan?
Ifa usun, Kot epwe aüselinga an siö,
lupwen osukosuk epwe tori?
10 Ifa usun, epwe pwawaiti Ewe mi Unusen Manaman
o kökköri Kot fansoun meinisin?
11 Üpwe aiti ngenikemi usun manamanen Kot,
üsap opala mine Ewe mi Unusen Manaman a akota.
12 Nge nengeni, ämi meinisin oua püsin küna ekei mettoch.
Pwota chök oua eäni ena sokun fos esap wor lomotan?
 
13 Iei usun mine Kot epwe föri ngeni eman aramasangau,
iei liwinin ätewe mi ariaföüü aramas me ren Ewe mi Unusen Manaman.
14 Ikamwo a wor chomong nöün,
repwe chök mäla lon maun,
nge mwirimwirin kana esap naf ener mongö.
15 Chokewe mi manau me mürin repwe mäla ren mätter,
nge pwülüer kewe mi lipichsefäl esap wor ar kölün kechü fän iter.
16 Inamwo ika a achukuchukätä silifer usun chukuchukutän pwül moromor,
ika a aioiätä üf usun ioien pwülüpar,
17 ewe chon pwüng epwe üfeni ekewe üf,
nge ätewe mi wenechar epwe angei ewe silifer.
18 Ewe imw ewe aramasangau a aüetä a usun chök eu türün ninnä,
usun eu likachoch eman chon mas a aüetä.
19 A kon won kian o annut lon an pisekisek,
nge esap chüen tongeni föri iei usun.
Lupwen a nennela, wöün esap chüen nom.
20 Eniweniw a feito won usun chök eu noter,
eu mölümöl a uweala lepwin.
21 Ewe asepwälin ötiu a uweatä
o pirumweela seni lon lenian pwe esap chüen nom.
22 Än Kot asepwäl a fokun eniti, nge esap wor tong lon,
iei mine ätewe a müttir süla ren pöchökülan.
23 Aramas ra alopwa fän ämängau,
ra ngääri pwe a towu seni lon lenian.”