Paipel HIOP 24
24
Hiop a siö pokiten Kot esap ekieki föföringau
24.1-25
“Pwota Ewe mi Unusen Manaman esap awora eu fansoun kapwüng,
pwota chokewe mi silei i resap fokun küna an kewe ränin apwüng?
Ekewe aramasangau ra amwökütü kiännin fanü.
Ra soläni pwiin sip o folenifengeniir me nöür kewe sip.
Ra angei ewe aas nöün ewe mi mäsen,
ra pwal amwöchü ewe ätemwänin kow nöün ewe fefin mi mä pwülüan tori a awesi an liwinimang.
Ra epeti seni ekewe chon wöüngau ar pwüüng,
ra pöchökül ngeni ekewe chon mwelele pwe ra süla o püsin aopeer.
Ekewe chon wöüngau ra feila ngeni ar angangen kütta ener
usun chök ekewe aas mi mwacho lon ewe fanü mi pwas,
ra kütta liaper lon ewe fanüapö pwe enen nöür kewe.
Ra rusifengeni enen ekewe man fetil lon ekewe mälämäl
o ionifengeni ekewe föün wain lon än ekewe aramasangau tanipin wain.
Lon unusen pwin ra kon fän selela, pun esap wor üfer,
esap pwal wor pwölüpwölür lupwen fansoun patapat.
Ra chöchön ren püngün üt me won ekewe chuk,
ra opolong fän ekewe achau, pun esap wor ia repwe op ie.
Mi wor ekoch aramasangau ra angei mönükol mi mä semer seni
oupwun iner pwe repwe nöüniir amanau,
ra pwal angei nöün ewe mi wöüngau semirit pwe liwinin an liwinimang.
10 Nge ekewe chon wöüngau ra fetalfeil fän üfer mi kamwakam.
Ra angang lon tanipin wiich, nge ra chök echik.
11 Ra üchüch föün olif lon ekewe lenien üchüch än ekewe aramasangau,
ra pwal puri ekewe föün wain, nge ra chök kaka.
12 Aramas ra rongorong ngüngün chokewe mi arap ngeni mäla seni lon ekewe telinimw,
nge chokewe mi kinas ra kökkö pwe eman epwe alisiir.
Nge Kot esap aüselinga ar iotek.
 
13 Mi wor chokewe mi ü ngeni ewe saram,
ir chokewe resap silei än Kot kewe al, resap pwal fetal won.
14 Eman mi niela aramas a pwätä ünümweerän
pwe epwe niela ekewe chon wöüngau me chon mwelele.
Nge lepwin a föri föförün chon solä.
15 Ewe chon lisowu a witiwit tori an epwe pwinila.
Iwe, a pwölüela mesan pwe esap wor eman epwe silleni.
16 Lon fansoun kiroch chon solä ra ataelong ekewe imw,
nge lerän ra aoperela.
Resap mochen pwärirela lon saram.
17 Iwe, rochokichin rochopwak a wewe ngeni lesosor me rer meinisin,
pun ir ra chiechi ngeni ekewe eniweniwen rochokichin rochopwak.
 
18 Ekewe aramasangau ra müttir pula ren ekewe koluk.
Fanüer kewe me lon ewe fanü ra anümamau,
pwe esap wor eman a feila ngeni ar tanipin wain.
19 Usun pwasapwas me pwichikar ra amorätä ekewe koluk seni sno,
iei usun mäla a angeala ekewe chon tipis.
20 Pwal ekewe inelap mi nöüniir ra manlükirela,
ekewe moso chök ra pwapwaitiir le ocheer.
Ekewe aramasangau resap chüen chem,
pun ra feiengau usun efoch irä mi turula.
 
21 Ra manau seni fefin mi rit esap wor nöür,
nge resap eäni kirikiröch ngeni fefin mi mä pwülüer.
22 Kot a angeala manauen ekewe chon pwora ren an manaman.
Inamwo ika ra fefeitä, nge esap wor ar apilüköch lon manauer.
23 A fang ngeniir kinamwe, pwe ra ekieki pwe ra nonomöch,
nge Kot a nenengeni ar kewe föför.
24 Ekewe aramasangau ra tekiatä lon fansoun mochomoch,
nge mürin resap chüen nom.
Ra küna tekison o kärila usun ekewe lusun aramas,
ra pöküpök usun chök ekewe umwun wiich.
25 Ifa usun, esap iei usun?
Iö a tongeni tip ngeniei pwe üa chofana,
ika pwärätä pwe esap wor lomoten mine üa apasa?”