22
Elifas a atipisi Hiop pwe a föri föföringau mi watte
22.1-30
Mürin, Elifas ewe re Teman a pälüeni Hiop,
“Ifa usun, eman aramas a tongeni lomot ngeni Kot?
Ellet, ätewe mi tipachem a chök lomot ngeni püsin i.
Ifa usun, epwe lomot ngeni Ewe mi Unusen Manaman are ka föri mine a pwüng?
Ifa usun, epwe feiöch ren om föför mi unusöch? Hiop 35.6-8
Ifa usun, Kot a amirituk
ika a atookolong lon kapwüng pokiten om niuokusiti i?
Apwi, a fokun watte om föföringau.
Esap wor müchün om kewe tipis.
Pun ka echimwa pwiüm kewe pwe repwe ngonuk asisilen ar pwonen liwinimang,
nge esap wor popun, ka pwal angei seniir üfer pwe ra selela.
Kosap ngeni ekewe chon malülü ünümer koluk,
kosap pwal amongöü chokewe mi echik.
En ka aea manom pwe kopwe fanüeni ewe fanü,
nge ren om iteföüla ka nonom lon.
Ka tinala ekewe fefin mi mä pwülüer fän ar asöülapö
o angei seni ekewe mi mäsen mine a wor rer.
10 Iei mine ekewe sär ra nom pwelin ünükum,
nge eniweniw a müttir aniuokusuk.
11 Om saram a rochopwakala pwe kosap tongeni küna mwom,
nge koluk mi pumong a pwölükela.
 
12 Ifa usun, Kot esap nom lon ewe leni tekia lon läng?
Nengeni usun tekian ekewe fü mi fokun toau.
13 Nge en ka apasa, ‘Met Kot a tongeni silei usi?
Ifa usun an epwe tongeni föri kapwüng won mine a nom fän rochokichin rochopwak?
14 Ekewe kuchu mi kirochoroch ra pwölüela mesan pwe esap tongeni künakich,
lupwen a fetalfeil lon läng.’ 15 Ifa usun, kopwe chök fetal won ewe alen lom ekewe aramas mi föföringau ra fen fetal won? 16 Eman a müttir angerela me mwen ar fansoun,
ar longolong a tala ren koluk.
17 Ra üreni Kot, ‘Kopwe feila senikem,’
ra pwal apasa, ‘Met Ewe mi Unusen Manaman epwe tongeni föri ngenikem?’
18 Iei mwo nge Kot a fen amasoua imwer ren mettoch mi mürina.
Nge ngang üa atoauala seniei än ekewe aramasangau öüröür.
 
19 Ekewe chon pwüng ra pwapwa,
nge chokewe esap wor ar tipis ra takirin ämängaua ekewe aramasangau,
lupwen ra küna ar feiengau.
20 Ra apasa, ‘Ellet, ekewe chon oputakem ra kärila,
nge mine ra likitala seni wöür, ekkei a kenala.’
 
21 Kopwe tipeeu ngeni Kot o kinamwe ngeni.
Ren ei, feiöch epwe toruk.
22 Kopwe angei öüröürom seni
o iseis an kewe kapas lon lelukom.
23 Are kopwe liwinsefäl ngeni Ewe mi Unusen Manaman o püsin atekisonok,
are kopwe aükätiu pwüngingau mi fis lon imwom,
24 are kopwe pöütala om kolt lepwül,
nge om kolt seni Ofair kopwe pöütala lein ekewe föün lon öüwö,
25 mürin Ewe mi Unusen Manaman epwe om kolt
pwal om silifer mi aüchea.
26 Iwe, mürin kopwe pwapwa ren Ewe mi Unusen Manaman
o anetäi mesom ngeni Kot.
27 Kopwe iotek ngeni, nge i epwe aüselingok,
kopwe pwal föri pwüngün om kewe pwon.
28 Meinisin mine ka ekiekietä epwe fisitä,
nge saram epwe tittin won alom kewe.
29 Pun Kot a atekisona ekewe chon lamalamtekia,
Nge a amanaua chokewe mi tekison.
30 Epwe pwal amanauok inamwo ika ka tipis,
epwe angasokola, are kopwe föri mine a pwüng.”

22:3: Hiop 35.6-8