Paipel HIOP 20
20
Sofar a pwärätä usun mine epwe tori ekewe aramasangau
20.1-29
Mürin, Sofar ewe re Nama a pälüeni Hiop,
“Ai osukosuk lon letipei a echimwaei pwe üpwe fos,
pun üa fokun weires.
Üa rongorong om kapasen aitengauaei,
nge seni lon ai weweöch, üa silei mine üpwe pälüenuk won.
Ka fokun silei mine a fis seni me lomlom, lon ewe fansoun,
lupwen aramas ra kärän nom won fanüfan,
pwe än ekewe aramasangau mweireir a chök fis lon fansoun mochomoch,
nge än chokewe resap aleasochisi Kot pwapwa a fis lon eu chök otun.
Inamwo are an eman lamalamtekia a tekiatä tori läng,
nge möküran a tori ekewe kuchu,
epwe chök morola usun kiten anan tori feilfeilachök.
Chokewe mi küna i me mwan repwe apasa, ‘Ia ätewe a nom ie?’
Epwe morukula usun chök eu tan, nge sisap chüen küna.
Epwe süla usun chök künan eman lepwin.
Mesen ätewe mi küna i esap chüen künasefäli,
nge chon lenian resap chüen nenengeni.
10 Nöün kewe repwe aliwinala mine a soläni seni ekewe chon wöüngau,
ir repwe aliwinala wöün.
11 Inisin mi pöchökül me lom,
nge iei epwe wiliti pwül moromor.
 
12 Föföringau a arar me lon awan pwe a aopala fän chönawan,
13 esap fokun mochen atowu seni lon awan,
nge a chök amwöchü fän fongochun.
14 Nge ewe mongö lon lukan a siwil ngeni maras,
a wiliti poisonun serepenit me lon inisin.
15 A oromala ekewe wöü o musäsinisefälirewu.
Kot a atorowu seni lon lukan.
16 Epwe atumuw poisonun ekewe serepenit,
nge epwe mäla ren küwen eman serepenit.
17 Esap manau ngeni an epwe küna ekewe chanpupu mi apuowu apüra seni föün olif,
ika ekewe öüwö mi apuowu chönün chunen me milik.
18 Epwe fangatä uän an angang, nge esap tongeni püsin aea,
esap pwal tongeni pwapwaiti winnen an amömö.
19 Pun a ariaföüü o tümwününgau ngeni ekewe chon wöüngau,
a pwal angei fän pöchökül ekewe imw esap püsin aüetä.
 
20 Pokiten an mochenia esap ükütiu,
esap tongeni amwöchü och seni mine a pwapwaiti.
21 Wesin an mongö esap wor och lusun,
iei mine wöün esap nonomola.
22 Lupwen a fokun wöümong, osupwang epwe tori,
nge riaföü mi fokun pöchökül epwe feitiu won.
23 Lupwen a wes le aura lukan,
Kot epwe tinato ren an song mi fokun chou, o fokun wichi.
24 Inamwo ika epwe süla seni eu pisekin maun seni mächä pwe esap küw,
efoch föün esefich seni piras epwe fotolong lon inisin.
25 Ewe föün esefich a pwerewu me lükisökürün,
mesan mi misimis a tikiwu seni marasan.
Eniweniw a feitiu won.
26 Meinisin mine a ionifengeni a tala.
Eu ekkei esor eman aramas a angeta epwe kenala i,
epwe pwal kenala mine a lusun lon imwan imw mangaku.
27 Läng epwe pwärätä an föföringau,
nge fanüfan epwe ütä o atipisi.
28 Aramas repwe angeala pisekin lon imwan,
repwe uweala lon ewe ränin än Kot lingeringer.
29 Iei usun mine Kot epwe föri ngeni ewe aramasangau,
iei usun mine Kot epwe awisa ngeni.”