1 “Eman aramas mi uputiu me ren eman fefin a chök manau lon fansoun mochomoch,

nge manauan a uren weires.

2 A märitä usun chök epö pön irä, nge a pwal pwasala.

Manauan a süla usun eu nür, nge esap nonomola.

3 Ifa usun, kopwe nefotofotola won ena sokun aramas

o emwenato lon kapwüng pwe kopwe apwüngü?

4 Iö a tongeni atowu och mettoch mi limöch seni och mettoch mi limengau?

Esap wor eman.

5 Pokiten ränin manauen eman aramas ra aükük,

nge en ka silei iteiten maramen manauan,

ka pwal aükü müchülan ränin manauan pwe esap tongeni soposopola,

6 iei mine kopwe nenne seni o likiti

pwe epwe tongeni awesala ränin manauan usun eman chon angang mi mö.

7 A chüen wor ach apilükülük ren efoch irä mi pöküpök pwe epwe fasarsefäl,

pwe ilin kewe mi pwüküfö repwe fokun märitä.

8 Inamwo ika waran ra kirou me fän pwül

o popun a pwasala,

9 nge lupwen koluk a tori,

epwe fasar o apwükü palan usun efoch irä mi fö.

10 Nge lupwen eman aramas a mäla, a wes manauan.

Lupwen a müchüla an ngasangas, ia a nom ie?

11 Usun koluk a pwasatä seni eu nomun koluk,

nge eu chanpupu a kisikisila o morola,

12 iei usun eman aramas a mäla, nge esap chüen pwätäsefäl.

Tori ekewe läng repwe morola, esap nennela ika pwök seni an möür.

13 Amwo kopwe aopaei lon ewe lenien sotup,

amwo kopwe aopaei tori om lingeringer epwe wesila.

Mürin, kopwe filätä eu fansoun fän itei o chechemeniei.

14 Are eman aramas a mäla, ifa usun, epwe pwal manausefäl?

Lon unusen ränin ai angang üpwe witiwit tori fansoun ai ngasala epwe feito.

15 En kopwe köriei, nge ngang üpwe pälüenuk.

En kopwe positiei, ngang ätewe poum a föri.

16 Mürin kopwe aleani iteiten ipweipwen pechei,

nge kosap nengenifichi ai kewe tipis.

17 Kopwe amusala ai kewe tipis o atoauerela,

kopwe pwölüela ai kewe föföringau.

18 Usun ekewe chuk ra sönüla o möküla,

eu achau a mwöküt seni lenian,

19 usun ekewe koluk ra akükünala ekewe fau,

nge püngümongun üt a apuela pwülün fanü,

iei usun ka ataela än aramas apilükülüköch.

20 Ka akufu i tori feilfeilachök pwe esap chüen nom.

Ka siwili wowon won mesan o tinala.

21 Nöün kewe mwän ra tolong lon iteüöch,

nge i esap silei, ra sapwilitiu, nge i esap küna.

22 A chök mefi püsin metekin inisin,

a chök ngüngüres fän iten püsin i.”