Paipel HIOP 6
6
Hiop a apwüngü chiechian kewe
6.1-30
Mürin, Hiop a pälüeni,
“Ika ai kewe riaföü repwe kilo, nge ai kewe feiengau meinisin repwe aükük,
ellet repwe fokun chou seni pien aroset.
Iei mine ai kewe kapas ra pöchökül.
Pun wokun Ewe mi Unusen Manaman föün esefich ra fotolong loi,
nge poisonur a tolong leuti.
Än Kot eniweniw ra tettelila mwei usun eu telin sounfiu, pwe repwe fiu ngeniei.
Ifa usun, eman aas mi mwacho a wörüwör lupwen a mongö fetil,
ika eman ätemwänin kow a wörüwör lupwen a wor anan?
Nge ifa usun, aramas ra tongeni mongö mine a nepatapat, nge esap wor salt lon?
Ifa usun, ewe pwechen lon eföü sokuul a anö?
Üsap fokun mochen mongö ena sokun mongö,
pun a kuuto woi.
 
Amwo Kot epwe ngeniei mine üa tüngor,
epwe mwütätä mine üa apilükülükü.
Amwo Kot epwe niei, amwo epwe aitiewu pöün o ärieila.
10 Ei epwe afisätä ai chip,
üpwe pwal mwetemwet fän pwapwa,
inamwo ika a watte ai cheuch,
pun üsap amamäsini än Ewe mi Pin kewe kapas.
11 Met sokun pöchökül üa eäni pwe epwe wor ai apilükülük?
Met sopolan manauei pwe üpwe mosonotam?
12 Ifa usun, ai pöchökül a usun chök pöchökülen ekewe fau, ika inisi a usun chök piras?
13 Ellet, esap fokun wor ai tufich,
mine üa apilükülüküni a sü seniei.
 
14 Eman mi apilükingau chienan kewe repwe kirikiröch ngeni,
inamwo ika a likitala an niueiti Ewe mi Unusen Manaman.
15 Nge chiechiei kewe ra alichipüngüei usun chök ekewe öüwö mi pumong,
ra morola, lupwen esap püng üt,
16 usun chök ekewe öüwö mi urela ren ais me sno,
17 nge lupwen fansoun pwichikar ra pwasala
o morola me lon lenier.
18 Ekewe chon sai ir chon amömö ra malechela seni aler,
lupwen ra kütta ünümer koluk, ra pwerelong lon fanüapö o mäla.
19 Ekewe chon sai ir chon amömö seni Tema me Sepa ra kütta ekewe öüwö mi pumong,
20 nge lupwen ra tori ekewe öüwö, ra lichipüng o apilükingau.
Ra apilüköch pwe repwe künökün koluk, nge esap wor.
21 Iei usumi ngeniei.
Oua küna ai feiengau o niuokus ren.
22 Ifa usun, üa tüngor ngenikemi pwe oupwe ngeniei eu lifang,
ika oupwe fangala ngeni eman och seni wöümi, pwe eu lifangen amichimich fän itei?
23 Ifa usun, üa pwal tüngor ngenikemi pwe oupwe angasaeila seni ekewe chon oputaei,
ika mönisefäliei seni ekewe chon mwänewüs?
 
24 Oupwe asukuulaei, nge ngang üpwe fanafanala o aüseling,
oupwe aiti ngeniei mine üa mwäl won.
25 Kapas wenechar a fokun manaman.
Nge met ämi kapasen apwüng ra mochen alletä?
26 Ifa usun, oua ekiekin apwüngü mine üa apasa?
Oua ekieki pwe alon eman mi apilükülükingau a usun chök asepwäl?
27 Ämi oua fen tongeni üttüt won eman mi mäsen,
iö epwe nöüni amanau, o amömöla chiechiemi.
 
28 Nge iei ouse mochen oupwe nenengeniei, pun ngang üsap chofana ngenikemi.
29 Üa tüngor ngenikemi pwe oupwe ekieksefäl, ousap föri och mi pwüngingau.
Oupwe ekieksefäl iei chök, pwe epwe pwä pwe ngang üa pwüng.
30 Ifa usun, üa eäni kapas esepwüng,
ika üsap sile alefila lefilen pwüng me pwüngingau?”