Paipel HIOP 4
4
Elifas a apwüngü Hiop
4.1-5.27
Mürin, Elifas ewe re Teman a pälüeni Hiop,
“Are üpwe apasa och ngonuk, ifa usun, kopwe oput?
Üsap chüen tongeni fanafanala?
Nengeni, ka asukuula chomong aramas,
ka pwal apöchöküla pöün chon apwangapwang.
Om kewe kapas ra aütäi chokewe mi chepetek
o apöchöküla ekewe mi apwangapwang.
Nge iei a sapeituk ewe riaföü, nge kosap mosonatam fan.
A toruk ewe weires, nge ka rükö ren.
Ifa usun, sap om niuokusiti Kot ina om chip?
Ifa usun, sap wenecharen om föför ina om apilükülüköch?
 
Iei kopwe ekieki usun.
Ifa usun, eman aramas esap wor an tipis a tongeni küna feiengau?
Ifa usun, eman aramas mi wenechar a kärila?
Iei usun mine üa küna:
Chokewe mi fotuki tipis o amworafeili föför mi ngau
repwe chök kini mine ra fotuki.
Repwe feiengau ren ngasangasen Kot,
repwe moola ren pöchökülen an song.
10 Ekewe aramasangau ra wörüwör o ngüngü usun laion,
nge Kot a afanafanalaar o kupi ngiir.
11 Usun eman laion mi pöchökül a mäla pokiten esap wor ochan,
iei usun ra mäla, nge nöür kana ra toropasfeil.
 
12 Eu kapas a toriei lemonomon,
nge selingei a rongorong och möngününgün.
13 Lupwen üa ekieki usun künaei kewe lepwin,
lupwen möürüchou a püngütiu won aramas, Hiop 33.15
14 niuokus a feito woi,
pwal chechech mi achechecha chüi meinisin.
15 Eman ngün a pwerela fän mesei,
nge ülöülen inisi ra mwarangatä.
16 A üla, nge üsap tongeni nenengenifichi lapalapan.
Och mettoch a nom mwei.
Iwe, a lüa, mürin üa rongorong eu möngüngü:
17 Ifa usun, eman aramas mi feil ngeni mäla epwe tongeni pwüng fän mesen Kot?
Ifa usun, eman aramas a tongeni limöch fän mesen ewe Chon Föri i?
18 Are Kot esap anomu an lükülük won nöün kewe chon angang,
pwe a fen mwo nge atipisi nöün kewe chon läng pwe ra mwäl,
19 epwe pwal fokun föri iei usun ngeni chokewe mi nonom lon imw seni pwül,
ir mi för seni pwül moromor, a mecheres ngeni än eman epwe
apachacheer usun chök pwötür.
20 Ra feiengau lefilen lesosor me lekuniol,
ra mäla, nge esap wor eman a ekieki usur.
21 Meinisin mine ra eäni, eman a angei seniir.
Ra mäla, nge esap wor ar tipachem.

4:13: Hiop 33.15