Paipel JOHANNES 15
15
Jesus i wesewesen ewe irän wain
15.1-17
“Ngang wesewesen ewe irän wain, nge Semei ewe chon tümwünü ewe tanipin wain. Epwe pöküela ekewe palan meinisin mi nonom loi resap ua, nge ekewe palan meinisin mi ua, epwe limetiir, pwe epwe chomongola uar. Ämi oua fen limöch pokiten ekewe kapas üa ürenikemi. Oupwe nonom loi, nge ngang üpwe nonom lomi. Usun efoch palen irän wain esap tongeni püsin ua, are esap nonom lon ewe irän wain, iei usun pwal ämi ousap tongeni püsin ua are ousap nonom loi.
“Ngang ewe irän wain, ämi palan kana. Iö a nonom loi, nge ngang lon, epwe uani ua mi chomong, pun lüki ousap tongeni föri och. Iö esap nonom loi, epwe koturula usun efoch palen irän wain o epwe pwasala. Ekei sokun palan repwe ioifengen o koturulong lon ekkei pwe repwe karala. Are ämi oupwe nonom loi, nge ai kewe kapas repwe nonom lomi, oupwe tüngor meinisin mine oua mochen, iwe, epwe torikemi. Iei chök mine Semei epwe küna ling ren, are oupwe uani ua mi chomong o pwärala pwe ämi nei chon kaiö. Usun Semei a echeniei, iei usun üa echenikemi, oupwe nonom lon ai chen. 10 Are oua aleasochisi ai kewe allük, oupwe nonom lon ai chen, usun ngang üa aleasochisi än Semei kewe allük o nonom lon an chen.
11 “Ngang üa fen ürenikemi usun ekei mettoch, pwe ai pwapwa epwe nom lomi o ämi pwapwa epwe unusöch. 12 Iei ai allük: Oupwe echenifengenikemi lefilemi usun ngang üa echenikemi. Joh 13.34; 15.17; 1.Joh 3.23; 2.Joh 5 13 Esap wor eman a eäni chen mi lapalap seni ei chen, are eman a pölükü manauan fän iten chiechian kana. 14 Iwe, ämi chiechiei kana, are oupwe apwönüetä mine üa allük ngenikemi. 15 Üsap chüen aita ngenikemi nei chon angang, pun eman chon angang esap silei mine an samol a föri. Nge üa aita ngenikemi chiechiei, pun üa asile ngenikemi meinisin mine üa rongorong me ren Semei. 16 Ämi ousap afiliei, nge ngang üa afilikemi o awisakemi, pwe oupwe feila o uani ua mi chomong, ewe sokun ua mi nonomola. Iei usun Semei epwe ngenikemi meinisin mine oua tüngor fän itei. 17 Iei ai allük ngenikemi: Oupwe echenifengenikemi lefilemi!
Än fanüfan oput nöün Jesus kewe chon kaiö
15.18-16.4
18 “Are fanüfan a oput ämi, oupwe chök chechemeni pwe a fen akomwen oputaei. 19 Are oupwe pop seni ei fanüfan, ei fanüfan epwe echenikemi usun nöün kana. Nge ämi ousap pop seni ei fanüfan, pun ngang üa afilikemi seni fanüfan, ina popun fanüfan a oput ämi. 20 Oupwe chechemeni pwe üa ürenikemi, ‘Esap wor eman chon angang a lap seni an masta.’ Are ra ariaföüüei, repwe pwal ariaföüükemi. Are ra aleasochisi ai kewe kapas, repwe pwal aleasochisi ämi kewe kapas. Mat 10.24; Luk 6.40; Joh 13.16 21 Repwe föri ngenikemi ekei mettoch meinisin, pokiten ämi nei. Pun resap silei ewe mi tinieito. 22 Are üsap feito o kapas ngeniir, esap wor ar tipis. Nge iei esap chüen wor ar künetipingen ren ar tipis. 23 Iö a oputaei a pwal oputa Semei. 24 Are ngang üsap föri leir ekewe föför esap mwo wor eman a föriir, esap wor ar tipis. Iwe, iei ra küna ekewe manaman üa föriir, nge ra fen oputaei me Semei. 25 Nge ei a fis pwe epwe pwönüetä mine a mak lon pwüngün ar lamalam, ‘Ra oputaei, nge esap wor popun.’ Kölf 35.19; 69.4
26 Iwe, lupwen ewe Soualilis epwe war, ngang üpwe tinato remi seni Semei, i ewe Ngünmifel mi pwärätä mine a let usun Kot, a feito seni Semei, i epwe pwärätä usi. 27 Pwal ämi oupwe pwärätä usi, pun ämi oua nonom rei seni lepopun.

15:12: Joh 13.34; 15.17; 1.Joh 3.23; 2.Joh 5

15:20: Mat 10.24; Luk 6.40; Joh 13.16

15:25: Kölf 35.19; 69.4