Paipel JOHANNES 8
8
Ra sereni eman fefin lupwen a lisowu
8.1-11
[Mürin ekewe aramas ra feila lon en me lenian, nge Jesus a feitä won ewe Chukun Olif. Lesosorusichin sorotän ewe rän a liwinsefäliti ewe imwenfel. Iwe, ekewe aramas meinisin ra mwicheto ren, nge Jesus a mottiu o popuetä le afalafaleer. Iwe, ekewe Sensen Allük me ekewe Farisi ra etekinato eman fefin ra sereni lon an lisowu. Ra aütai ewe fefin me mwen meser meinisin o üreni Jesus, “Äm aia sereni ei fefin lon an lisowu. Lon Allükün ach lamalam, Moses a allük pwe ei sokun fefin aramas repwe mone ngeni fau tori an epwe mäla. Nge met en kopwe apasa usun ei fefin?” Lif 20.10; Tut 22.22-24 Ra apasa ei fän iten ar repwe särei Jesus, pwe epwe wor och mine repwe tongeni aturu won. Nge Jesus a pworotiu o makkei won ewe pwül ren aütün pöün. Iwe, lupwen ra ükütä ikenan o kapas ais ngeni, Jesus a wenetä o üreniir, “Iön leimi esap wor an tipis epwe akom le monei ei fefin ngeni aeföün fau.” Mürin a pworesefälitiu o makkei won ewe pwül. Iwe, lupwen ar rong ekei kapas, ra chök feila eman mürin eman, nge ekewe chinlap ra akom. Iwe, Jesus chök a nom ikenan, pwal ewe fefin mi ükütä ren. 10 Jesus a wenetä o üreni ewe fefin, “Ikafa ir ekewe mwän? Esap chüen wor eman a nom an epwe apwünguk ngeni mäla?” 11 Ewe fefin a pölüeni, “Ai samol, esap chüen wor eman leir a nom.” Mürin Jesus a üra, “Üsap pwal fokun apwünguk. Kopwe feila, nge kosap chüen föri tipis.”]
Jesus ewe saramen fanüfan
8.12-20
12 Iwe, Jesus a kapassefäl ngeni ekewe aramas o üreniir, “Ngang ewe saramen fanüfan. Iö a tapweto müri epwe eäni ewe saramen manau, nge esap fetal lon rochopwak.” Mat 5.14; Joh 9.5 13 Iei mine ekewe Farisi ra üreni, “Ka eäni kapasen pwärätä usun püsin en, nge om pwärätä esap pwüng.” Joh 5.31 14 Jesus a pölüeniir, “Inamwo are üa pwärätä usun püsin ngang, nge ai pwärätä a pwüng, pun üa silei ia üa feito me ie o ia üpwe feila ie. Nge ämi ousap silei ia üa feito me ie are ia üpwe feila ie. 15 Ämi oua eäni apwüng lon örünien aramas. Ngang üsap apwüngü eman. 16 Nge are üpwe apwüngü eman, ai apwüng epwe let, pun ngang üsap aleman chök lon, pwe ewe Sam mi tinieito a etiei. 17 A fen mak lon ämi kewe Allük, pwe are ruoman aramas a wewefengen pwärier, mine ra pwärätä a pwüng. 18 Ngang üa pwärätä usun püsin ngang, nge ewe Sam mi tinieito a pwal pwärätä usi.” 19 Mürin ra aisini, “Ia semom a nom ie?” Jesus a pölüeniir, “Ämi ousap sileei are silei Semei. Are oupwe sileei, oupwe pwal silei Semei.” 20 Ekei kapas Jesus a aea lupwen a afalafal lon ewe imwenfel, lon ewe leni ia ekewe lenien asor ra nom ie. Iwe, esap wor eman a turufi, pun esap tori mwo an fansoun.
Ousap tongeni feila ia ngang üpwe feila ie
8.21-30
21 Iwe, Jesus a kapassefäl ngeniir, “Ngang üpwe feila. Ämi oupwe küttaei, nge oupwe mäla lon ämi tipis. Ousap tongeni feila ia üpwe feila ie.” 22 Iei mine ekewe nöüwisen chon Juta ra apasa, “A üra pwe sisap tongeni feila ia i epwe feila ie. Ifa usun, wewen ei pwe epwe püsin niela?” 23 Jesus a pölüeniir, “Ämi oua pop seni ei fanüfan, nge ngang üa feito seni läng. Ämi oua seni ei fanüfan, nge ngang üsap seni ei fanüfan. 24 Iei popun ai ürenikemi pwe oupwe mäla lon ämi tipis. Pun are ousap lüküei pwe ‘Ngang chök ewe Eman’, oupwe fokun mäla lon ämi tipis.” 25 Iwe, ra aisini, “Iö en?” Jesus a pölüeniir, “Üa fen ürenikemi seni lepoputän iö Ngang. 26 Mi wor chomong mettoch üpwe apasa usumi, pwal chomong kapasen atipisi fän itemi. Nge ätewe mi tinieito a wenechar. Iwe, ngang üa chök asile ngeni fanüfan mine üa rong seni i.” 27 Iwe, resap weweiti pwe Jesus a kapas ngeniir usun Saman. 28 Iei mine a üreniir, “Lupwen oupwe atekiatä ewe Nöün Aramas, mürin oupwe silei iö Ngang. Oupwe pwal silei pwe üsap föri och ren püsin ngang, nge üa chök apasa mine Semei a aiti ngeniei. 29 Iwe, ewe mi tinieito a etiei. Esap likitiei ai üpwe aleman, pun üa föri mine a pwapwa ren fansoun meinisin.” 30 Chomong aramas mi rongorong än Jesus kapas usun ekei mettoch ra lükü i.
Aramas mi ngas me aramas mi fötek
8.31-47
31 Mürin Jesus a üreni ekewe chon Juta mi lükü i, “Are oupwe aleasochisi ai kewe kapas, oupwe wesewesen nei chon kaiö. 32 Oupwe silei ewe let, nge ewe let epwe angasakemi.” 33 Iwe, ra pölüeni, “Äm aia mwirimwirin Apraham, esap fokun wor eman a nöünikem amanau. Met wewen om apasa, ‘Ämi oupwe ngasala?’ ” Mat 3.9; Luk 3.8 34 Nge Jesus a üreniir, “Enlet, üpwe wesewesen ürenikemi: Aramas meinisin mi föri tipis ra nonom fän nemenien tipis usun eman amanau. 35 Eman amanau esap chon ewe famili a angang ngeni fansoun meinisin, nge eman nau i chon ewe famili tori feilfeilachök. 36 Iwe, are ewe Nau a angasakemi, oupwe wesewesen ngasala. 37 Ngang mi silei pwe ämi mwirimwirin Apraham. Nge ämi oua sotuni ämi oupwe nieila, pun ousap mochen etiwa ai kewe kapas. 38 Üa kapas usun mine Semei a aiti ngeniei, nge ämi oua föri mine sememi a ürenikemi.” 39 Iwe, ra üreni, “Apraham semelapem.” Jesus a pölüeniir, “Are ämi wesewesen nöün Apraham, oupwe pwal föri sokun föför Apraham a föri. 40 Met üa föri, üa chök mochen aiti ngenikemi ewe let üa rong me ren Kot, nge ämi oua sotuni ämi oupwe nieila. Apraham esap föri ei sokun föför. 41 Ämi oua föri mine sememi a föri.” Iwe, ra pölüeni, “Äm aisap upun leroch, äm aia semeni eman chök Sam, iei i Kot.” 42 Jesus a üreniir, “Are Kot sememi, ämi oupwe echeniei. Pun ngang üa feito seni Kot, nge iei üa nom ikei. Ngang üsap feito fän püsin itei, nge i a tinieito. 43 Pwota ousap weweiti mine üa ürenikemi? Ina popun ämi ousap mochen rongorong ai kewe kapas. 44 Ämi nöün sememi, ewe Tefil, ämi oua chök mochen apwönüetä mochenin sememi. I eman chon niela aramas seni lepoputän, esap fokun nom won pekin let, pun esap wor let ren. Lupwen a kapas chofona, a chök fos lon örünian, pun i eman chon chofona me semen chon chofona. 45 Nge pokiten üa eäni kapas mi let, iei popun ousap lüküei. 46 Iö leimi a tongeni alletätä pwe ngang üa tipis? Are üa apasatä mine a let, pwota ousap lüküei? 47 Eman mi feito seni Kot a aüseling ngeni kapasen Kot. Nge ämi ousap feito seni Kot, iei mine ousap mochen aüselingaei.”
Jesus me Apraham
8.48-59
48 Iwe, ekewe chon Juta ra üreni Jesus, “Ifa usun, esap pwüng äm apasa pwe en eman re Samaria, nge eman anün rochopwak a wänuk?” 49 Jesus a pölüeniir, “Esap wor eman anün rochopwak a wäniei. Ngang üa asamolu Semei, nge ämi ousap asamoluei. 50 Ngang üsap püsin kütta ai ling. Nge mi wor eman a kütta ling fän itei, i pwal ewe souapwüng. 51 Enlet ngang üpwe wesewesen ürenikemi: Iö a aleasochisi ai kewe kapas esap fokun mäla.” 52 Iwe, ekewe chon Juta ra üreni, “Iei äm aia silei pwe eman anün rochopwak a wänuk. Apraham a mäla, pwal ekewe soufos ra mäla, nge en ka apasa pwe iö a aleasochisi om kewe kapas esap fokun mäla. 53 Ifa usun, ka ekieki pwe ka lap seni semelapach Apraham? I a mäla, pwal ekewe soufos ra mäla. Ka ekieki pwe en iö?” 54 Iwe, Jesus a pölüeniir, “Are üa püsin kütta ai ling, ei ling esap wor lomotan. Ewe eman mi alingaei, i Semei, ewe eman oua apasa pwe i ämi we Kot. 55 Ämi ousap fokun silei Kot, nge ngang üa silei i. Are üpwe apasa pwe üsap silei i, üpwe eman chon chofona usun chök ämi. Nge ngang üa silei i o aleasochisi an kapas. 56 Apraham sememi we a fokun pwapwa pwe epwe le küna fansoun ai feito. A küna ewe fansoun o pwapwaäsini.” 57 Ekewe chon Juta ra üreni, “En kosamwo ierini lime, nge ka fen küna Apraham?” 58 Jesus a pölüeniir, “Enlet üpwe wesewesen ürenikemi: Me mwen än Apraham esamwo uputiu, ngang üa fen nom.” 59 Lupwen ekewe aramas ra rong ekei kapas, ra angei fau pwe repwe mone ngeni. Nge Jesus a opola o towu seni ewe imwenfel.

8:5: Lif 20.10; Tut 22.22-24

8:12: Mat 5.14; Joh 9.5

8:13: Joh 5.31

8:33: Mat 3.9; Luk 3.8