Paipel JEREMAIA 51
51
Kot a apwüngü Papilon
51.1-64
Iei alon ewe Samol mi Lapalap, “Nengeni, üpwe apwäi ngünün eman chon kata pwe epwe maun ngeni Papilon me aramasen lon. Üpwe tinala chon ekis pwe repwe asüela chon Papilon usun asepwäl a ässala fetilipwas. Repwe apöla ewe fanü, repwe feito o maun ngeni seni lepekin meinisin lon ränin ar feiengau. Ousap mwüt ngeni ewe chon esefich epwe emeia nöün esefich, ousap pwal mwüt ngeni pwe epwe üföüf üfan üfen maun. Ousap achika ekewe alüal, nge oupwe fokun arosala ewe mwichen sounfiu meinisin. Repwe turula o mäla lon ewe fanü Papilon, repwe mäfeiengau me lon alan kewe. Ngang Kot ewe Samol mi Unusen Manaman, üsap pöütala chon Israel me chon Juta, inamwo ika ra tipis ngeniei, ngang ewe mi Pin me lon Israel.”
Oupwe sü seni Papilon o kütta en me manauan. Ousap eti Papilon le mäla lon an apwüng, pun lon ei otun ewe Samol mi Lapalap epwe ngeni chappen an föför. Epwe liwini ngeni mine a pwüng ngeni an föför. Papilon a wewe ngeni eu kap kolt lon pöün ewe Samol mi Lapalap, a föri pwe chon fanüfan meinisin repwe sakawala ren. Chon ekewe mwü ra ün wain seni o umwesila ren. Lon eu chök otun Papilon a turutiu o tala. Oupwe kechüeiti, oupwe küt säfeen an metek, eli epwe tongeni pöchökülsefäl. Sia mochen apöchökülasefäli Papilon, nge esap pöchökülsefäl. Ousipwe feil seni o liwinla ngeni en me poputän fanüan. Pun watten an apwüng a tori läng, a tekia usun tekian ekewe kuchu. 10 Ewe Samol mi Lapalap a aletätä ach pwüng. Ou etto, ousipwe asilefeili me lon Sion mine ewe Samol mi Lapalap ach we Kot a föri.
11 Ewe Samol mi Lapalap a äpwächa ekewe kingen Metia, pun a ekiekietä pwe epwe ataela Papilon. Iei usun ewe Samol mi Lapalap epwe ngeniir chappen ar ataela imwan imwenfel. Oupwe seimi nöümi föün esefich o amolätä ämi kewe tittin maun. 12 Oupwe aarü pwe oupwe maun ngeni ekewe tittin Papilon. Oupwe achomonga ekewe chon mas o anomuur lon en me lenian, oupwe amolakemiitä pwe oupwe operiir. Ewe Samol mi Lapalap epwe föri usun mine a fen akota o apasa fänäsengesin chon Papilon. 13 Ämi chokewe mi imweimw ünükün chomong koluk o wöü ren pisek aüchea, sopolomi a war, nge manauemi epwe müchüla. Pwär 17.1 14 Ewe Samol mi Unusen Manaman a eäni akapel püsin itan o apasa, “Ellet, üpwe tinala aramas mi chomong usun chomongun lifichimas, pwe repwe maun ngeni Papilon. Repwe iöfotäsini ar win won chon Papilon.
15 Kot ewe mi föri fanüfan ren an manaman,
a anüküchara ren an tipachem
o ameresala ekewe läng ren an weweöch.
16 Lupwen a apasawu mwelian, ekewe koluk fän läng ra ngüngü.
A pwal föri ekewe kuchu pwe repwe ässitä seni ekewe lesopun fanüfan.
A föri inefi fiti üt
o awarato asepwäl seni an kewe lenien iseis.
17 Aramas meinisin ra umwes, esap wor ar mirit.
Ekewe chon angang ngeni kolt ra säw ren förier uluulun anümwäl,
pun mine ra föri a mwäl, esap wor ngasangas lor.
18 Ra lomotongau o uretakir,
repwe tala, lupwen Kot epwe apwüngüür.
19 Nge än Jakop we Kot esap usun ekei uluulun anümwäl,
pun i ewe chon föri mettoch meinisin.
A pwal filätä chon Israel pwe repwe wesewesen nöün aramas,
itan ewe Samol mi Unusen Manaman. 20 Ewe Samol mi Lapalap a apasa,
“En Papilon ai ama me ai pisekin maun.
Üa aea en le atatakisi ekewe mwü o ataela ekewe fanü.
21 Üa aea en le atatakisi oris me chon wawa,
üa pwal aea en le atatakisi woken me chon wawa.
22 Üa aea en le niela mwän me fefin,
chinlap mwän me säräfö,
üa pwal aea en le niela ät me nengin.
23 Üa aea en le niela chon mas me nöür pwiin sip.
Üa aea en le niela chon tanipi me nöür kewe mönün tuw pwül.
Üa pwal aea en le niela kepina me nöüwis.”
24 Iei alon ewe Samol mi Lapalap, “Üpwe ngeni chon Papilon chappen ar föför mi ngau ra föri me lon Sion me mwen mesemi.”
25 Iei alon ewe Samol mi Lapalap, “Papilon, en ka wewe ngeni eu chuk mi ataala unusen fanüfan. Nge ngang üpwe ü ngonuk. Üpwe turufuk pwe üpwe asokopeluketiu lepökün ewe achau o föri pwe kopwe wiliti eu chuk mi karala. 26 Esap wor eman epwe angei eföü fau senuk, pwe epwe eäni föün lepokuku ika föün longolong. Nge kopwe eu leni mi tala tori feilfeilachök. Ngang ewe Samol mi Lapalap üa kapas.
27 Oupwe aarü pwe repwe maun o ettiki ewe rappwa me lein chon ekewe mwü. Oupwe eteri chon ekewe mwü pwe repwe maun ngeni Papilon, o kökkörifengeni chon ekewe mwün Ararat, Mini me Askenas, pwe repwe maun ngeni. Oupwe awisa eman meilapen sounfiu pwe epwe emweni ewe mwichen maun, oupwe pwal emwenätä ekewe oris usun chök chomongun pwiin lifichimas. 28 Oupwe eteri chon ekewe mwü pwe repwe maun ngeni Papilon. Oupwe titi ekewe kingen chon Metia fiti nöür kewe kepina me nöür kewe nöüwis, pwal sounfiun ekewe fanü meinisin mi nom fän nemenier. 29 Iwe, fanüfan a chechech o mwaroro, pokiten a fisitä mine ewe Samol mi Lapalap a akota fän iten Papilon. Epwe ataala ewe fanü Papilon pwe esap chüen so. 30 Ekewe sounfiun Papilon ra ükütiu le maun, ra chök nonom lon ar kewe imwen maun mi pöchökül. A kisikisila letiper, ra wewe ngeni fefin. Asamalapen ewe telinimw Papilon ra tala, nge ekkei a kenala ekewe imw lon. 31 Eman chon sä a tapwela mürin pwal eman, nge eman chon künö a tapwela mürin pwal eman, pwe repwe asile ngeni ewe kingen Papilon pwe unusen an we telinimw a oola. 32 Ekewe chon oputer ra liapeni ekewe petepeeten ewe chanpupu o kenala ekewe imw mi pöchökül. Ekewe sounfiun Papilon ra fokun niuokus. 33 Papilon a wewe ngeni eu lenien wichiwich umwun wiich, lupwen fansoun aramas ra puri ewe wiich. Ekis echök fansoun, mürin ewe wiich mi kinikin epwe nom lon ewe leni. Ngang ewe Samol mi Unusen Manaman ewe Koten Israel üa kapas.”
34 Ekewe chon Sion repwe apasa,
“Nepukatnesar ewe kingen Papilon a atatakisikichetiu
o oromikichela.
A apökichela pwe sia usun epö pör mi pön.
A oromikichela usun eman serepenit
o amasoua lukan ren anach mongö mi anö.
Mürin a kusufikichewu.
35 Ekewe angangen mwänewüs a föri ngenikich pwal ngeni aramasach epwe ukun chon Papilon.”
Ekewe chon Jerusalem repwe apasa,
“Chaach epwe ukun chon Papilon.” 36 Iei usun mine ewe Samol mi Lapalap a apasa ngeni chon Jerusalem, “Üpwe penikemi o angei eliemi. Üpwe apwasatä ar we chanpupu o amorätä ar puächen koluk. 37 Papilon epwe wiliti eu ioien mettoch mi tala, eu leni ia kolak mi mwacho ra nom ie. Epwe och minen eniweniw me och minen turunufas, eu leni esap so. 38 Ekewe chon Papilon meinisin repwe wörüwörfengen usun ekewe laion, repwe ngüngü usun ekewe apanen laion. 39 Nge lupwen ra mochenia, üpwe amolätä eu kametip fän iter, üpwe apucheer pwe repwe mwälek. Repwe möürüfochola, nge resap chüen pwök. 40 Üpwe emwenirela ren ewe chon ninni usun eman a emwenala ekewe apanen sip, ekewe nienifön sip me ätemwänin kuuch. Ngang ewe Samol mi Lapalap üa kapas.”
41 Ewe Samol mi Lapalap a apasa usun Papilon, “A oola ewe telinimw unusen fanüfan a mwareiti. Papilon a wiliti och minen eniweniw me lein ekewe mwü. 42 Sät a tötä won Papilon, ekewe nopuropur ra pwölüela. 43 Ekewe telinimw ra wiliti och minen eniweniw, ra wiliti eu leni mi pwas o pön, eu leni ia esap wor eman aramas a nom ie, esap pwal wor eman a pwerela lon. 44 Üpwe apwüngü Pel ewe koten Papilon o föri pwe epwe atowu mine a soläni. Chon ekewe mwü resap chüen fel ngeni. Tittin ewe telinimw Papilon a turula.
45 Nei aramasen Israel, oupwe towu me lon Papilon. Oupwe en me kütta manauan o sü seni ai song mi fokun watte. 46 Ousap akisala letipemi, ousap pwal niuokus, lupwen oupwe rong pworaus me lon ewe fanü. Eu pworaus a war lon eu ier, eu pworaus a pwal war lon eu ier mürin, pworausen angangen mwänewüs mi fis lon ewe fanü me pworausen än ekewe sounemenem maunfengen. 47 Iei mine epwe war ewe fansoun ai üpwe apwüngü ekewe uluulun anümwälin Papilon. Unusen ewe fanü epwe itengau, nge ekewe mi ninnila repwe chök toropasfeil lon. 48 Mürin ekewe läng me fanüfan pwal meinisin mi nom lor repwe köl fän pwapwa fänäsengesin Papilon. Pun ekewe chon kata repwe feito seni efeng pwe repwe maun ngeni. 49 Papilon i popun pwe chomong aramas won fanüfan ra mäla. Nge iei Papilon epwe fokun tala pokiten i popun pwe chomong chon Israel ra mäla. Ngang ewe Samol mi Lapalap üa kapas.”
50 Ewe Samol mi Lapalap a üreni nöün aramas me lon Papilon, “Ämi mi sü seni ewe mäfeiengau, oupwe feila, nge ousap üla. Oupwe chechemeniei ngang ewe Samol mi Lapalap me lon ewe fanü toau, nge Jerusalem epwe chem ngenikemi. 51 Nge ämi oua apasa, ‘Äm aia säw ren ekewe kapasen turunufas aia rongorong. Itengau a pwölüela mesem, pun chon ekis ra tolong lon ekewe leni mi pin lon ewe imwenfel.’ 52 Iei mine üa apasa pwe epwe war ewe fansoun lupwen üpwe kapwüng ngeni än Papilon kewe uluulun anümwäl. Ekewe mi kinas repwe ngüngü lemenen unusen ewe fanü. 53 Inamwo ika Papilon epwe fefeitä tori läng, inamwo ika epwe apöchöküla an we imwen maun mi nom wilitekia, üpwe chök tinala ekewe chon kata pwe repwe atai. Ngang ewe Samol mi Lapalap üa kapas.
54 Oupwe aüselinga ewe puchör seni Papilon,
ewe akürangen feiengau mi fokun watte seni fanüen chon Papilon.
55 Pun ngang ewe Samol mi Lapalap üa ataela Papilon
o aükätiu mwelian mi pöchökül.
Chon oputeer repwe purolong lon usun chomong koluk,
repwe maun ngeni fän akürangen mwelier mi leüömong.
56 Iwe, ewe chon kata a feito won Papilon.
Nöün Papilon sounfiu ra oola,
nge nöür kewe esefich ra kupukupukisitiu.
Pun ngang ewe Samol mi Lapalap eman Kot mi ngeni aramas chappen ar föför,
üpwe fokun aunusa ngeniir liwinin ar föför.
57 Üpwe apucha ekewe nöüwisen Papilon me nöün kewe soutipachem,
nöün kewe kepina, nöün kewe meilap me nöün kewe sounfiu.
Repwe möürüfochola, nge resap chüen pwök.
Ngang ewe King itei ewe Samol mi Unusen Manaman
üa kapas.
 
58 Tittin ewe telinimw Papilon mi chölap epwe tatiu tori pwül,
nge asamalapan kewe mi tekia repwe karala.
Än ekewe aramas angang a lomotmwäl,
än chon ekewe mwü angang a chök mwüchün ekkei.
Ngang ewe Samol mi Unusen Manaman üa kapas.”
59 Iwe, ewe soufos Jeremaia a öüröüra Seraia nöün Neria we mwän, nge Neria nöün Maseia we, lupwen a eti Setekia ewe kingen Juta le feila Papilon lon arüanün ierin mwün Setekia. Iwe, Seraia i meilapen chon tümwünü ewe sai. 60 Iwe, Jeremaia a makei lon echö toropwe usun ekei feiengau meinisin repwe tori Papilon, ekewe kapas meinisin mi fen maketiu fänäsengesin Papilon. 61 Iwe, Jeremaia a üreni Seraia, “Lupwen kopwe tori Papilon, kopwe pi pwe kopwe aleani ngeni ekewe aramas ekei kapas meinisin mi mak lon ei toropwe. 62 Mürin kopwe üra, ‘Ai Samol mi Lapalap, en ka üra pwe kopwe ataela ei leni pwe esap wor eman aramas ika man epwe nom lon. Epwe chök pönüla tori feilfeilachök.’ 63 Nge lupwen ka wes le aleani ei toropwe ngeni ekewe aramas, kopwe föti ngeni eföü fau o aturalong lukalapen ewe chanpupu Oifrat, 64 iwe, kopwe üra, ‘Iei usun än Papilon epwe kokotiu, nge esap chüen pisefälitä, pokiten ewe feiengau ewe Samol mi Lapalap epwe awarato won.’ ” Ais 13.1–14.23; 47.1-15; Pwär 18.21
Iei ükükün än Jeremaia kewe kapas.

51:13: Pwär 17.1

51:64: Ais 13.114.23; 47.1-15; Pwär 18.21