Paipel JEREMAIA 43
43
Ewe sai ngeni Isip
43.1-13
Iwe, lupwen Jeremaia a wes le apworausa ngeni ekewe aramas meinisin alon ewe Samol mi Lapalap ar we Kot a tini ngeni pwe epwe üreniir, Asaria nöün Hosaia we mwän me Johanan nöün Karea we me ekewe aramas mi sikesik meinisin ra üreni Jeremaia, “En ka eäni kapas chofana. Ewe Samol mi Lapalap ach we Kot esap tinukoto, pwe kopwe apasa pwe aisap feila Isip o nonom ikenan. Nge Paruk nöün Neria we mwän a peseek, pwe kopwe ü ngenikem o atolongakem fän nemenien ekewe chon Papilon, pwe repwe niikem ika uweekeemila Papilon.” Iei mine Johanan me ekewe meilapen mwichen sounfiu meinisin, pwal ekewe aramas meinisin resap aleasochis ngeni ewe Samol mi Lapalap, ar repwe nomotiu lon ewe fanü Juta. Mürin, Johanan me ekewe meilapen ewe mwichen sounfiu meinisin ra angei chokewe mi chüen manau me lon Juta o uweerela Isip fitifengen me ekewe aramas meinisin mi liwinto seni ekewe mwü ia ra toropasfeil ie. Ra uweala ekewe mwän me fefin, ekewe semirit me nöün ewe king kewe föpwül, pwal ekewe aramas meinisin Nepusaratan ewe meilapen chon tümwünü ewe king a likiti ngeni Ketalia. Ra pwal uweala ewe soufos Jeremaia me Paruk nöün Neria we. Iwe, ra feila ngeni ewe fanü Isip, pun resap aleasochisi alon ewe Samol mi Lapalap. Iwe, ra tori Tapanes. 2.King 25.26
Mürin, ewe Samol mi Lapalap a kapas ngeni Jeremaia me lon Tapanes, “Kopwe angei ekoch fau mi föümong o irerela fän föün ewe al mesen asamalapen imwen Farao we mi nom lon Tapanes, lupwen ekewe chon Juta repwe atolok. 10 Mürin kopwe üreniir, ‘Iei alon ewe Samol mi Unusen Manaman, ewe Koten Israel: Üpwe titi nei chon angang Nepukatnesar ewe kingen Papilon. I epwe anomu an lenien motun king won ekei fau üa irela, epwe pwal aüetä imwan imwen king wor. 11 Iwe, Nepukatnesar epwe feito o maun ngeni ewe fanü Isip. Epwe niela chokewe mi feil ngeni ar repwe mäla o aoloi chokewe mi feil ngeni ar repwe oola, epwe pwal niela lon maun chokewe ra feil ngeni ar repwe mäla lon maun. 12 Iwe, epwe keni än ekewe koten Isip kewe imwenfel o uweela ar kewe uluulun anümwäl. Epwe limeti ewe fanü Isip usun eman chon masen sip a ettala mösün üfan. Iwe, epwe feila seni Isip fän wesöchün an angang. 13 Iwe, epwe amökkü ekewe ürefau mi pin mi nom Heliopolis lon Isip, epwe pwal kenala än ekewe koten Isip kewe imwenfel.’ ”

43:7: 2.King 25.26