Paipel JEREMAIA 41
41
Iwe, lon ewe afisuen maram Ismael nöün Netania we, nge Netania nöün Elisama seni ewe familien king, i eman lein nöün ewe king kewe meilap, a feito me engol mwän ren Ketalia nöün Aikam we lon Mispa. Nge lupwen ra mongöfengen ikenan lon Mispa, Ismael me ekewe engol mwän mi nom ren ra ütä o niela Ketalia ren ketilas, i ätewe ewe kingen Papilon a awisa pwe epwe kepinan ewe fanü. Ismael a pwal niela ekewe chon Juta meinisin mi nom ren Ketalia lon Mispa, pwal ekewe sounfiun Papilon a sereniir me ikenan. 2.King 25.25
Iwe, lon ewe rän mürin än Ketalia ninnila, mwen esamwo wor eman a silei usun, walik mwän ra feito seni Sikem, Silo me Samaria, nge ra räisöüla alüser, ra kamwei üfer o akinasa inisir. Ra uwato asoren mongö me apach mi pwokus, pwe repwe asor lon ewe imwenfel. Nge Ismael a feiliwu seni Mispa pwe epwe churiir, a fetal nge kechü. Iwe, lupwen a churiir, a üreniir, “Ouse mochen oupwe feito ren Ketalia.” Nge lupwen ra tolong lon ewe telinimw, Ismael me ekewe mwän mi nom ren ra nirela o atururolong lon eu chönüttu. Nge mi wor engol mwän me leir ra üreni Ismael, “Kosap niikem, pun a wor äm föün wiich me parli, äm noppuk me chönün chunen aia aopala lemäl.” Iei mine Ismael esap chüen nirela.
Iwe, ewe chönüttu ia Ismael a aturalong ie somän ekewe mwän a nirela eu chönüttu mi fokun watte, ewe king Asa a tuw, lupwen Paasa ewe kingen Israel a maun ngeni. Iwe, Ismael a amasoua ei chönüttu ren ekewe somä. 10 Mürin, Ismael a liapeni ekewe lusun aramas meinisin mi chüen nom Mispa me nöün ewe king kewe föpwül, ir chokewe Nepusaratan ewe meilapen chon tümwünü ewe king a awisa Ketalia pwe epwe nemeniir. Iwe, Ismael a liapeniir o emweniir, pwe repwe feila ngeni fanüen chon Amon.
11 Nge lupwen Johanan nöün Karea we me ekewe souemwenin ewe mwichen sounfiu mi eti ra rong usun ewe föföringau Ismael a föri, 12 ra angei nöür aramas meinisin o tapweri Ismael pwe repwe maun ngeni. Iwe, ra tori Ismael me arun ewe nomun koluk mi watte a nom Kipeon. 13 Nge lupwen ekewe aramas meinisin mi nom ren Ismael ra küna Johanan me ekewe souemwenin ewe mwichen sounfiu, ra fokun pwapwa. 14 Mürin, ekewe aramas meinisin ra kul o sä ngeni Johanan. 15 Nge Ismael fiti waluman mwän ra sü seni Johanan o feila ren ekewe chon Amon. 16 Mürin, Johanan me ekewe souemwenin ewe mwichen sounfiu mi eti ra angei ekewe sounfiu, ekewe fefin me semirit me ekewe nöüwis lon imwen king, o aliwinireto seni Kipeon. Ikkei ir ekewe aramas Ismael a uweerela seni Mispa mürin an niela Ketalia. 17 Iwe, ra feila o ekis kaüla lon Kerut Kiman arun Petleem, pun ra ekiekin feila Isip, 18 pokiten ekewe chon Papilon. Pun ra fokun niuokusitiir pokiten än Ismael niela Ketalia, ätewe ewe kingen Papilon a awisa pwe epwe kepinan ewe fanü.

41:3: 2.King 25.25