Paipel JEREMAIA 38
38
Jeremaia a manau seni lon ewe chönüttu
38.1-13
Iwe, Sefatia nöün Matan we mwän, Ketalia nöün Pashur, Jehukal nöün Selemia me Pashur nöün Malkia ra rongorong mine Jeremaia a üreni ekewe aramas meinisin. Iei usun mine a apasa, “Iei alon ewe Samol mi Lapalap: Iteiten eman me eman mi nomotiu lon ei telinimw epwe mäla ren maun, ren lengita me mätter. Nge iteiten eman me eman mi fangatä ngeni ekewe chon Papilon esap mäla. Repwe en me püsin kütta manauan. Ewe Samol mi Lapalap a pwal apasa: Ei telinimw epwe fokun oolong lepöün ekewe sounfiu nöün ewe kingen Papilon, pun repwe liapeni.” Mürin, ekewe nöüwis ra üreni ewe king, “Kopwe mwütätä pwe ei mwän epwe ninnila. Pun a akisikisala leluken ekewe sounfiu mi chüen nom lon ei telinimw me leluken ekewe aramas meinisin ren an apasa ekei sokun kapas ngeniir. Ei mwän esap kütta feiöchün ekei aramas, ngei feiengauer.” Iwe, ewe king Setekia a üra, “Nengeni, a nom lepöümi. Pun ngang ewe king üsap tongeni föri och mine epwe ü ngenikemi.” Iei mine ra angei Jeremaia pwe repwe aturalong lon ewe chönüttu än Malkia nöün ewe king we mwän mi nom lon ewe lenien chon mas. Iwe, ra aürätiu Jeremaia won säl, nge esap wor koluk lon ewe chönüttu, pwe pwakak echök. Iwe, Jeremaia a kokotiu lon ewe pwakak.
Iwe, Epet-melek ewe re Itiopia, eman ätelipich mi angang lon imwen king, a rongorong pwe ra aturalong Jeremaia lon ewe chönüttu. Lon ewe otun ewe king a eäni kapwüng lon ewe Asamalapen Peniamin. Iwe, Epet-melek a feila seni ewe imwen king, a feila ren ewe king o üreni, “Ai samol ewe king, a ngau än ekewe mwän föför ra föri ngeni ewe soufos Jeremaia. Ra aturätiu lon ewe chönüttu. Epwe mäla ikenan ren echik, pun ese chüen wor mongö lon ewe telinimw.” 10 Mürin ewe king a allük ngeni Epet-melek ewe re Itiopia, “Kopwe angei ülüman mwän repwe etuk, pwe oupwe efietä ewe soufos Jeremaia seni lon ewe chönüttu me mwen an epwe mäla.” 11 Iei mine Epet-melek a nuki ekewe mwän, a feila ren imwen ewe king lon ewe rumwen iseis üf o angei ekoch mangaku mi kamwakam me üf mi mes. A aürätiu ekei mangaku lon ewe chönüttu ren säl. 12 Mürin Epet-melek a üreni Jeremaia, “Kopwe uwalong fän poum ekewe mangaku mi kamwakam o mes, pwe ekewe säl resap akinasok.” Iwe, Jeremaia a föri iei usun. 13 Mürin ra efietä Jeremaia seni lon ewe chönüttu ren säl. Iwe, Jeremaia a chök nom lon lenien chon mas.
Setekia a angei öüröüran me ren Jeremaia
38.14-28
14 Mürin, ewe king Setekia a titi ewe soufos Jeremaia o etiwa lon aülüngatin lenien tolong me lon imwen ewe Samol mi Lapalap. Iwe, ewe king a üreni Jeremaia, “Üpwe aisinuk eu kapas ais, nge kosap tükümi seniei pälüan.” 15 Nge Jeremaia a üreni Setekia, “Are üpwe ürenuk pälüen om kapas ais, ifa usun, kosap fokun nieila? Nge are üpwe öüröürok, en kosap aüselingaei.” 16 Mürin, ewe king Setekia a akapel ngeni Jeremaia le monomon, “Mwo manauen ewe Samol mi Lapalap, ewe mi fang ngenikich manau, üsap niikala ika asechikolong lepöün ätekewe mi mochen angei manauom.”
17 Mürin, Jeremaia a üreni Setekia, “Iei alon Kot ewe Samol mi Unusen Manaman, ewe Koten Israel: Are kopwe fangatä ngeni nöün ewe kingen Papilon kewe meilap, mürin kosap mäla, nge ei telinimw esap karala. Iwe, ämi me chon leimwom oupwe manau. 18 Nge are kosap fangatä ngeniir, mürin ei telinimw epwe oolong lepöün ekewe chon Papilon. Iwe, repwe kenala, nge en kosap tongeni sü seni lepöür.” 19 Mürin, ewe king Setekia a üreni Jeremaia, “Üa niuokusiti ekewe chon Juta mi fen feila ngeni ekewe chon Papilon. Üa pwal niuokus pwe ekewe chon Papilon repwe asechieilong lepöür, nge ir repwe turunufaseei.” 20 Nge Jeremaia a üra, “Resap asechikolong lepöür. Kopwe aleasochisi mine üa ürenuk fän alon ewe Samol mi Lapalap, mürin kopwe feiöch, nge kosap mäla. 21 Nge ewe Samol mi Lapalap a pwäri ngeniei lon künaei mine epwe fis are kosap fangatä. 22 Üa küna pwe ra emwenawu ekewe fefin meinisin mi chüen nom lon imwen ewe kingen Juta ren nöün ewe kingen Papilon kewe nöüwis. Ekewe fefin repwe apasa ngonuk,
‘Chiechiom kewe ka lüküür ra atupuk, en king,
ra pwal pworaituk.
Iei pecheöm ra kokotiu lon pwakak,
nge ir ra kul senuk.’ 23 Repwe emwenawu pwülüom kewe me noum kewe ren ekewe chon Papilon, nge püsin en kosap tongeni sü seniir. Ewe kingen Papilon epwe turufuk, nge ei telinimw epwe karala.”
24 Mürin, Setekia a üreni Jeremaia, “Kosap asile ngeni eman ekei kapas, pwe kete mäla. 25 Are ekewe nöüwis repwe rong pwe üa kapas ngonuk, repwe feito reöm o ürenuk, ‘Kopwe ürenikem mine ka üreni ewe king, pwal mine ewe king a ürenuk. Are kosap tükümi och senikem, aisap niikela,’ 26 mürin kopwe üreniir, ‘Üa tüngor pwetete ngeni ewe king, pwe esap aliwinisefälieila ngeni ewe imwen fötek mi nom lon imwen Jonatan, pwe üsap mäla ikenan.’ ” 27 Mürin, ekewe nöüwis meinisin ra feito ren Jeremaia o kapas ais ngeni, nge i a chök pälüeni won mine ewe king a öüra ngeni. Iei mine resap chüen kapas ngeni, pun esap wor eman a rongorong ar kapasfengen me ewe king. 28 Nge Jeremaia a nonomotiu lon ewe lenien chon mas tori ewe rän Jerusalem a oola lon. Is 33.21

38:28: Is 33.21