20
Ewe anümamau fän iten Pasur pokiten an kalapusei Jeremaia
20.1-6
1 Iwe, ewe souasor Pasur nöün Imer we mwän, i ewe meilapen imwen ewe Samol mi Lapalap, a rongorong än Jeremaia osuni usun ekei mettoch. 2 Mürin, Pasur a akünöü eman pwe epwe wichi ewe soufos Jeremaia, epwe anükü pechen lefilen irä o anomu ünükün ewe Asamalapen Peniamin me asan me lon imwen ewe Samol mi Lapalap. 3 Iwe, sorotan ewe rän, lupwen Pasur a amusawu Jeremaia seni lefilen ekewe irä, Jeremaia a üreni Pasur, “Ewe Samol mi Lapalap esap chüen aita ngonuk Pasur, ngei epwe aita ngonuk ‘Niuokus watte a nom pwelin ünükum’. 4 Pun iei alon ewe Samol mi Lapalap: Üpwe föri pwe kopwe eu niuokus watte ngeni püsin en, pwal ngeni chiechiom meinisin. Ir repwe mäla ren nöün chon oputer ketilas, nge en kopwe nenengeniir. Üpwe asechalong chon Juta meinisin fän nemenien ewe kingen Papilon. I epwe emwenala ekoch Papilon, nge ekoch epwe nirela. 5 Üpwe pwal ngeni chon oputer wöün ei telinimw meinisin, än chon ei telinimw win me pisekir meinisin ra aücheani, pwal än ekewe kingen Juta pisek mi aüchea meinisin. Ir repwe angei ekewe pisek meinisin fän pöchökül pwe liaper o uweerela Papilon. 6 Nge en Pasur me chon leimwom meinisin, oupwe oola. Oupwe feila Papilon o mäla ikenan, oupwe pwal peias ikenan, ämi me chiechiom kewe meinisin, chokewe ka kapas chofana le osuni ngeniir.”
Än Jeremaia lalangau ngeni Kot
20.7-18
7 Ai Samol mi Lapalap, ka echimwaei,
nge ngang üa chimw reöm,
en ka pöchökül seniei,
en ka akufuei.
Üa uretakir iteiten rän,
aramas meinisin ra turunufaseei.
8 Pun fansoun meinisin lupwen üa kapas, üa wisen leüömong le kapas
o üra, “Angangen mwänewüs me kata!”
Ai Samol mi Lapalap, aramas ra ämängauaei o turunufaseei iteiten rän,
pun üa asilefeili om kapas.
9 Nge are üa apasa, “Üsap chüen föüni iten ewe Samol mi Lapalap ika kapas fän itan,”
mürin om kapas a usun chök ekkei mi kü me lon lelukei,
a pwourur me lechüi.
Üa resin apwosalong,
nge üsap chüen tongeni.
10 Üa rongorong möngününgünün chomong aramas,
“Niuokus watte a nom ekis meinisin.
Ousipwe aturu i, ousipwe aturu i.”
Pwal chiechiei kewe meinisin ra witiwiti ai üpwe turula.
Ra apasa, “Eli epwe tup,
mürin sipwe liapeni o ngeni chappen an föför.”
11 Nge en, ai Samol mi Lapalap, ka nom rei usun chök eman sounfiu mi pöchökül.
Iei mine ekewe chon ariaföüüei repwe chepetek, resap tongeni akufuei.
Repwe fokun säw, pun esap pwönüetä ar mochen.
Ar itengau esap tongeni manlüküla tori feilfeilachök.
12 Ai Samol mi Unusen Manaman, ka sotuni ekewe chon pwüng
o küna leluker me ekiekir.
Kopwe mwüt ngeniei ai üpwe küna om kopwe ngeni chon oputaei chappen ar föför,
pun üa likiti ngonuk pwe kopwe peniei.
13 Oupwe köl ngeni ewe Samol mi Lapalap,
oupwe mwareiti i.
Pun a angasa manauen ekewe chon mwelele seni ekewe chon föföringau.
14 Epwe anümamau ewe rän üa uputiu lon.
Esap feiöch ewe rän inei a nöünieitiu lon.
15 Epwe anümamau ewe aramas mi apwapwai semei,
lupwen a uwei ewe pworaus ngeni o apasa,
“Eman noum ät a upu ngonuk.”
16 Amwo ewe aramas epwe wewe ngeni ekewe telinimw
ewe Samol mi Lapalap a ataarala, nge esap eäni tong.
Amwo epwe rongorong puchörün metek lesosor
me kökkön maun leoloas,
17 pun esap nieila me lon letipen inei,
pwe letipen inei epwe peiasei.
18 Pwota üa towu seni letipen inei,
pwe üpwe chök riaföü me letipeta
o asopwala ränin manauei fän säw? ✡ Hiop 3.1-19