Paipel JEREMAIA 3
3
Iei alon ewe Samol mi Lapalap, “Are eman mwän a pöütala pwülüan, nge neminewe a feila o pwüpwülü ngeni pwal eman, ifa usun, ätewe epwe tongeni pwülüenisefäli neminewe? Ifa usun, ewe fanü esap fokun limengau ren? Nge en, Israel, a wor chomong noum kamwet. Ifa usun, kopwe chüen tongeni liwinitiei? Kopwe netä won ungen ekewe chuk o nenengeni. Ifa usun, epwe wor eu leni ia en kosap fangala inisum ie? Ka nissoal lepekin ekewe al o awiti ekewe kamwet ka akawit usun eman chon Arapia lon fanüapö. En ka alimengaua ewe fanü ren om föförün lisowu. Iei mine esap chüen püng üt, nge ütten leres esap fis. Ka fen mesemau usun eman fin lisowu, kosap sile säw. Nge iei ka üreniei, ‘En semei, ka tongeei seni leküküni. Ifa usun, kopwe song fochofoch ngeniei? Ifa usun, kopwe lingeringeritiei tori feilfeilachök?’ Iei usun om kapas, nge ka chök föri ekewe föför mi ngau meinisin ka tongeni föri.”
Kot a tüngor ngeni chon Israel me chon Juta pwe repwe ekieksefäl
3.6-4.4
Iwe, lon mwün ewe king Josia ewe Samol mi Lapalap a üreniei, “Ka küna mine chon Israel mi kirikiringau ra föri? Ra kul seniei o feitä won ekewe chuk meinisin pwal fän ekewe irä meinisin mi mwuresires o fel ngeni ekewe koten ekis. Ren ei ra kirikiringau ngeniei. 2.King 22.1–23.30; 2.Kron 34.1–35.27 Iwe, ngang üa ekieki pwe mürin ar föför meinisin repwe liwinitiei. Nge resap liwinitiei. Nge ekewe chon Juta mi pwal kirikiringau ra küna ei. Ra pwal küna pwe üa pöütala Israel, usun eman mwän a pöütala pwülüan. Üa tinirela pokiten ra kirikiringau ngeniei ren ar fel ngeni pwal ekoch kot. Nge ekewe chon Juta mi kirikiringau resap niuokus. Ra pwal föri ei sokun föför, nge resap fokun säw ren. Ra alimengaua ewe fanü ren ar fel ngeni fau me mwüch, iei ar angangen lisowu. 10 Nge mine a ngau seni kei, pwe ekewe chon Juta mi kirikiringau ra chök pwomweni pwomwen ar liwinitiei, nge sap seni unusen letiper. Ngang ewe Samol mi Lapalap üa kapas.”
11 Mürin, ewe Samol mi Lapalap a üreniei, “Iei mwo än chon Israel kul seniei, nge a pwä pwe ra pwüng lap seni chon Juta mi kirikiringau. 12 Kopwe feila o aronga ekei kapas ngeni chon Israel, ‘Oupwe liwinto, ämi chon Israel mi kirikiringau. Üsap chüen wowoon song ngenikemi, pun üa eäni ümöümöch, nge üsap song ngenikemi tori feilfeilachök. 13 Oupwe chök pwärätä ämi tipis, pwe oua ü ngeniei ngang ewe Samol mi Lapalap ämi we Kot. Oupwe pwärätä pwe oua chiechi ngeni ekewe koten ekis fän ekewe irä mi mwuresires, ousap pwal aleasochisi ai kapas. Ngang ewe Samol mi Lapalap üa kapas. 14 Oupwe liwinto rei, ämi aramas mi kirikiringau, pun ngang echök üa nöünikemi. Üpwe angeikemi akaeman seni iteiten ekewe telinimw, nge akaruoman seni iteiten ekewe eterekes o emwenikemiilong lon Sion. 15 Üpwe ngenikemi souemwen mi lelukeni lelukei, repwe emwenikemi fän silelap me weweöch. 16 Lon ekana rän, lupwen oupwe chomongola me lon ewe fanü, aramas resap chüen kapas usun ai we pworun pwon. Esap chüen nom lon ekiekir, resap pwal chüen chechemeni ika mefi pwe esap chüen nom. Resap pwal chüen försefäli ewe pworofel. 17 Are epwe tori ena fansoun, Jerusalem epwe iteni än ewe Samol mi Lapalap lenien mot, nge chon ekewe mwü meinisin repwe mwichefengen lon Jerusalem pwe repwe fel ngeniei. Resap chüen ülöförea le apwönüetä ekiekingauen leluker. 18 Lon ekana rän chon Juta me chon Israel repwe chufengen, repwe feitopök seni ewe fanü efeng ia ra oola ie, o liwinla ngeni ewe fanü üa ngeni ämi kewe lewo, pwe repwe fanüeni.’ ”
19 Mürin, ewe Samol mi Lapalap a apasa,
“Üpwe fokun pwapwa le atolongakemi lon tettelin nei mwän
o ngenikemi eu fanü mi mürina,
eu fanü mi fokun mürina seni fanüen chon ekewe mwü.
Üa mochen pwe oupwe kökköri ngeniei, ‘Semem,’
nge ousap fokun chüen kul seniei.
20 Ellet, ämi chon Israel oua kirikiringau ngeniei,
usun eman fefin a kirikiringau ngeni pwülüan o likitala.
Ngang ewe Samol mi Lapalap üa kapas.”
 
21 Aramas ra rongorong mwelien ekewe chon Israel won ungen ekewe chuk,
ra kechü o tütüngormau,
pun ra föri chomong tipis
o manlükala ewe Samol mi Lapalap ar we Kot.
22 Oupwe liwinto, ämi meinisin mi kul seni ewe Samol mi Lapalap,
i epwe awesi ämi kirikiringau.
Nge ämi oupwe apasa, “Ewer, äm aipwe liwinto ren ewe Samol mi Lapalap, pun i äm we Kot. 23 Ellet, äm fel ngeni ekewe uluulun anümwäl won ungen ekewe chuk esap alisikem. Ellet, ewe Samol mi Lapalap äm we Kot i ewe Chon Amanau fän iten Israel. 24 Nge ren äm fel ngeni ewe anü Paal mi ässäw, aia lus won meinisin mine äm kewe lewo ra angang ngeni seni me lom. Aia lus won nöüm pwiin sip me kow, pwal nöüm alüal me föpwül. 25 Aipwe chapala lepwül fän säw, nge itengau epwe pwölükem. Pun aia tipis ngeni ewe Samol mi Lapalap äm we Kot, äm me äm kewe lewo seni lesäräföm tori ikenai. Äm aisap aleasochis ngeni ewe Samol mi Lapalap äm we Kot.”

3:6: 2.King 22.123.30; 2.Kron 34.135.27