Paipel SOUKAPWÜNG 20
20
Ewe maun ngeni chon Peniamin
20.1-48
Mürin, ekewe aramasen Israel meinisin ra feito seni ewe telinimw Tan mi nom efeng me Persepa mi nom ör, pwal seni ewe fanü Kiliat mi nom ötiu. Ra chufengen fän tipeeu fän mesen ewe Samol mi Lapalap me lon Mispa. Iwe, ekewe souemwenin chon ekewe ainangen Israel meinisin ra feito lon ewe mwich än nöün Kot kewe aramas. A pwal wor ükükün föpükü ngeröü sounfiu fän nöür ketilas. Nge ekewe chon Peniamin ra rong pwe ekewe aramasen Israel ra feila Mispa. Iwe, ekewe aramasen Israel ra üreni ewe mwän seni ewe ainangen Lefi, “Kopwe apworausa ngenikem usun ei föför mi fokun ngau a fis.” Mürin pwülüen ewe fefin mi ninnila a üreniir, “Üa tori Kipea lon fanüen Peniamin, äm me ülüpwülüei we o pwinipwin ikenan. Iwe, ekewe re Kipea ra feito lepwin o pwelifeili ewe imw üa nom lon. Ra ekiekin nieila, ra pwal achomanauei ülüpwülüei we, pwe a mäla. Mürin üa angei ülüpwülüei we, üa kinikisietiu inisin o tinala ekewe kinikin ren ekewe engol me ruu ainangen Israel. Pun ekewe re Kipea ra föri och föför mi anioput o fokun ngau lon Israel. Ämi aramasen Israel meinisin mi mwichfengen ikei, oupwe pwüngüpwüngfengen o apasätä pwüngün ei mettoch.”
Iwe, ekewe aramas meinisin ra ütä fän tipeeu o apasa, “Esap wor eman leich epwe feila lon imwan, esap fokun wor eman leich epwe liwiniti lenian. Iei usun mine sipwe föri ngeni Kipea: Sipwe feila o maun ngeni Kipea fän pwüngün üttüt. 10 Iwe, sipwe filätä engol mwän seni ipükü me lein ekewe ainangen Israel meinisin, pwal ipükü mwän seni engeröü, nge engeröü mwän seni engol ngeröü, repwe uwato mongö fän iten ekewe aramas mi feila pwe repwe maun ngeni chon Kipea lon Peniamin, pokiten ewe föför mi fokun ngau ra föri lon Israel.” 11 Iei usun ekewe re Israel ra chufengen fän tipeeu pwe repwe maun ngeni ewe telinimw.
12 Iwe, ekewe ainangen Israel ra tinala ekoch mwän ren unusen ewe ainangen Peniamin pwe repwe üreniir, “Met ei sokun föföringau a fis me leimi? 13 Oupwe fangewu ekewe mwän mi manauangau seni Kipea, pwe aipwe nirela o atowu ewe mi ngau seni lon Israel.” Nge chon ewe ainangen Peniamin resap mochen aüselinga alon pwiir kewe aramasen Israel. 14 Iwe, chon ewe ainangen Peniamin ra feito seni ar kewe telinimw o chufengen lon Kipea, pwe repwe feila maun ngeni ekewe aramasen Israel. 15 Iteiten chon ewe ainangen Peniamin mi kö ngeni maun ra feito seni ar kewe telinimw lon ewe ränin ükükün rüe me wonungeröü mwän mi sile maun fän ketilas. Mi pwal wor ükükün füpükü mwän seni Kipea mi kefil. 16 Iwe, me lein ekewe mwän meinisin mi wor füpükü tamöng mi kefil. Iteiten eman me eman a tongeni monei eföü fau ngeni emet meten mökür, nge a küw. 17 Nge lükün ekei re Peniamin mi wor ükükün föpükü ngeröü mwän seni ekewe re Israel, ir meinisin sounfiu mi sile maun fän ketilas.
18 Iwe, ekewe aramasen Israel ra feila Petel o aisini Kot, “Iö me leim epwe akomwen feila maun ngeni chon Peniamin?” Nge ewe Samol mi Lapalap a pälüeniir, “Chon ewe ainangen Juta repwe akomwen feila.”
19 Mürin, ekewe re Israel ra ütä lesosor, ra feila o nom arap ngeni Kipea. 20 Iwe, ra feila pwe repwe maun ngeni chon Peniamin o atetteli ar mwichen sounfiu akawenewenen Kipea. 21 Nge ekewe chon Peniamin ra towu seni Kipea o niela ükükün rüe me ruungeröü re Israel lon ewe chök rän. 22-23 Mürin, ekewe aramasen Israel ra feila o kechü fän mesen ewe Samol mi Lapalap tori lekuniol. Iwe, ra aisini, “Ifa usun, äm aipwe feilasefäl o maun ngeni pwim kewe chon Peniamin?” Nge ewe Samol mi Lapalap a pälüeni, “Oupwe feila o maun ngeniir.” Mürin, ekewe re Israel ra tipepworasefäl o atettelisefäli ar mwichen sounfiu lon ewe chök leni ia ra piin atetteliir ie me mwan.
24 Iwe, lon aruuen rän ekewe re Israel ra kan ngeni ekewe chon Peniamin pwe repwe maun ngeniir. 25 Nge ekewe chon Peniamin ra towu seni Kipea lon aruuen rän o niela ükükün engol me walungeröü re Israel, ir meinisin mwän mi sile maun fän ketilas. 26 Mürin, ekewe aramasen Israel meinisin ra feila Petel. Ikenan ra mot o kechü fän mesen ewe Samol mi Lapalap o achuun lon ewe rän tori lekuniol, ra pwal eäni asoren kek me asoren kinamwe fän mesen ewe Samol mi Lapalap. 27 Iwe, ekewe aramasen Israel ra aisini ewe Samol mi Lapalap mine repwe föri. Lon ena fansoun än Kot we pworofel a nom ikenan, 28 nge Pineas nöün Eleasar we mwän, nge Eleasar nöün Aaron mwän, a wisen angang ngeni. Iwe, ekewe aramasen Israel ra aisini, “Ifa usun, äm aipwe feilasefäl o maun ngeni pwim kewe chon Peniamin, ika aipwe emwen?” Nge ewe Samol mi Lapalap a pälüeniir, “Oupwe feila, pun lesor üpwe awinnakemi pwe oupwe akufuur.”
29 Mürin, ekewe chon Israel ra anomu ekoch chon op pwelin unükün Kipea. 30 Iwe, ekewe re Israel ra feila pwe repwe maun ngeni chon Peniamin lon aülüngatin rän. Ra atettelisefäliir pwe repwe maun ngeni Kipea usun me mwan. 31 Nge ekewe chon Peniamin ra towu pwe repwe maun ngeni ekewe aramas. Iwe, ra toauela seni ewe telinimw o popuetä le niela ekoch lein ekewe re Israel usun me mwan. Ra niir me lon ekewe alelap, efoch mi ale ngeni Petel, nge efoch ngeni Kipea pwal lon ewe amassawa. Ra niela ina epwe ükükün ilik re Israel. 32 Iwe, ekewe chon Peniamin ra apasa, “Ra pwal kuf rech usun chök me mwan.” Nge ekewe re Israel ra apasa, “Ousipwe sü seniir o panirela ngeni ekewe alelap toau seni ewe telinimw.” 33 Nge lupwen ekewe re Israel meinisin ra mwöküt seni lenier o atetteliir me lon Paal-tamar, chokewe mi op ra pwal sä seni lenier me pelilotoun Kipea. 34 Iwe, ükükün engol ngeröü mwän mi kefil seni lein unusen chon Israel ra maun ngeni Kipea. Ewe maun a fokun weires, nge ekewe chon Peniamin resap silei pwe ra arap ngeni feiengau. 35 Iwe, ewe Samol mi Lapalap a akufu chon Peniamin mwen ekewe re Israel. Lon ewe ränin, ekewe re Israel ra niela ükükün rüe me limungeröü ipükü re Peniamin, ir meinisin mwän mi sile maun fän ketilas.
36 Mürin, ekewe chon Peniamin ra mefi pwe ra kuf. Ekewe re Israel ra tipin sü me mwen ekewe chon Peniamin, pun ra lükü ekewe mwän mi op pwelin ünükün Kipea. 37 Iwe, ekewe mwän mi op ra müttir towu seni ar lenien op o cheri Kipea. Ra niela chon ewe telinimw meinisin ren ketilas. 38 Nge mi wor eu asisil ekewe re Israel me ekewe chon op ra tipeeufengen won, pwe lupwen epwe wor och ötüöt mi ötütä seni ewe telinimw, 39 ekewe re Israel mi tipin sü repwe kulsefäl o maun. Iei chon Peniamin ra fen popuetä le niela ina epwe ükükün ilik re Israel. Iwe, ra apasa, “Ellet, ra kuf rech usun me mwan.” 40 Nge lupwen ewe ötüöt a ötütä seni lon ewe telinimw, ekewe chon Peniamin ra nenesökür o küna pwe unusen ewe telinimw a kar. 41 Mürin, ekewe re Israel ra kul, nge ekewe chon Peniamin ra rükö, pun ra mefi pwe repwe le feiengau. 42 Iei mine ra sü me mwen ekewe re Israel o sü ngeni ewe fanüapö, nge resap tongeni sü seni ewe maun. Pwal ekewe re Israel mi towu seni ewe telinimw ra niela ekewe chon Peniamin ikenan. 43 Iwe, ra appafengeni ekewe chon Peniamin, ra tapweriir o niretiu seni Noha tori akawenewenen Kipea me peliötiu. 44 Iwe, ükükün engol me walungeröü chon Peniamin ra mäla, ir meinisin sounfiu mi pwora. 45 Nge ekewe lusun chon Peniamin ra kul o sü ngeni ewe fanüapö ren ewe achau mi nom Rimon. Iwe, ükükün limungeröü mwän ra mätiu lon ekewe alelap. Nge chon Israel ra pwal achocho le tapweriir tori Kitom o niela pwal ruungeröü mwän. 46 Iei mine unusen chon Peniamin mi mäla lon ewe ränin ükükün rüe me limungeröü mwän mi sile maun fän ketilas. Ir meinisin sounfiu mi pwora. 47 Nge ükükün wonopükü mwän ra kul o sü ngeni ewe fanüapö ren ewe achau mi nom Rimon. Ikenan ra nom fän ewe achau lon ükükün rüanü maram. 48 Mürin, ekewe re Israel ra kul o maun ngeni ekewe chon Peniamin. Ra niela aramas me man ren ketilas, pwal meinisin mine ra küna. Iwe, ra pwal kenala ekewe telinimw meinisin ra tolong lon.