Paipel SOUKAPWÜNG 18
18
Maika me ekewe chon Tan
18.1-31
Iwe, lon ekana fansoun esap wor eman king lon Israel. Lon ena fansoun chon ewe ainangen Tan ra kütta eu fanü fän iter pwe repwe nonom lon, pun resap mwo angei fanüer me lein ekewe ainangen Israel. Iei mine ekewe chon Tan ra filätä limman mwän mi pwora seni lon unusen ar ainang. Ra tinirela seni Sora me Estaol o üreniir pwe repwe operi ewe fanü o ouwasacha. Iwe, ra tori chukuchukutän ewe fanü Efraim lon imwen Maika o pwinipwin ikenan. Nge lupwen ra nom ikenan ren imwen Maika, ra silleni ngingin ewe alüal seni ewe ainangen Lefi. Iwe, ra sap ngeni o üreni, “Iö a emwenukoto ikei? Met ka föri lon ei leni? Met om angang ikei?” Nge ätewe a üreniir, “Iei usun mine Maika a föri ngeniei. A möniei pwe üpwe eman nöün souasor.” Iwe, ra üreni, “Äm aia tüngoreek, kopwe aisini Kot pwe aipwe silei ika äm sai epwe fisiöch.” Nge ewe souasor a üreniir, “Oupwe feila fän kinamwe. Ämi sai a nom fän emwenien ewe Samol mi Lapalap.”
Mürin, ekewe limman mwän ra feila o tori ewe telinimw Lais. Iwe, ra küna ekewe aramas mi nonom ikenan, pwe ra nom fän kinamwe usun chon Siton. Ra mosonoson, nge resap ekieki pwe eman epwe maun ngeniir, esap pwal wor och mine ra osupwang ren me won fanüfan, pun ra fokun pisekisek. Ra pwal küna pwe ra toau seni chon Siton, nge resap chiechi ngeni mwo eman. Iwe, lupwen ekewe limman mwän ra liwiniti Sora me Estaol, aramaser kewe ra aisiniir, “Met pworausemi?” Nge ir ra pälüeni, “Oupwe ütä, ousipwe feila o maun ngeni chon Lais. Pun äm aia küna ewe fanü pwe a fokun pwülüöch. Ifa usun, oupwe chök momot ikei? Oupwe müttir feila o tolong lon ewe fanü pwe oupwe fanüeni. 10 Lupwen oupwe feila, oupwe tori eu mwichen aramas resap ekieki pwe eman epwe maun ngeniir. Ewe fanü a watte, esap pwal wor och mine a osupwang ren, nge Kot a ngenikemi ewe fanü.”
11 Iwe, ükükün wonopükü mwän seni ewe ainangen Tan ra feila seni Sora me Estaol fän ar pisekin maun. 12 Ra feitä o nonom ünükün Kiriat-jearim lon Juta. Iei popun pwe ewe leni pelilotoun Kiriat-jearim a iteni Mahane-tan * wewen Mahane-tan lenien chon Tan tori ikenai. 13 Seni ikenan ra feila ngeni chukuchukutän ewe fanü Efraim o tori imwen Maika.
14 Mürin, ekewe limman mwän mi piin feila pwe repwe operi ewe fanü ünükün Lais ra üreni chiener, “Ifa usun, oua silei pwe lon eu ekei imw a wor echö efot, ekoch uluulun anün leimw me eu uluulun anü mi fal, a kapachetä silifer won? Iei mine oupwe ekieki mine oupwe föri.” 15 Iwe, ra rik seni ewe al o feila ren imwen ewe alüal seni ewe ainangen Lefi lon lenien Maika o aisini usun an nonom. 16 Nge ekewe wonopükü re Tan ra ütä leasamalapen tittin ewe leni fän ar pisekin maun. 17 Iwe, ekewe limman mwän mi piin operi ewe fanü ra tolong lon ewe imw o angei ewe uluulun anü mi fal a kapachetä silifer won, ewe efot me ekewe uluulun anün leimw, lupwen ewe souasor a ütä ren ekewe wonopükü mwän mi nom leasamalapen tittin ewe leni fän ar pisekin maun. 18 Iwe, lupwen ekewe limman mwän ra tolong lon imwen Maika o angei ewe uluulun anü mi fal a kapachetä silifer won, ewe efot me ekewe uluulun anün leimw, ewe souasor a aisiniir, “Met oua föri?” 19 Nge ir ra üreni, “Kopwe chök fanafanala, kosap apasa och, kopwe etikem pwe kopwe eman semem me eman nöüm souasor. Ifa usun, esap mürina om kopwe souasor ngeni unusen eu ainang me eu eterekesin lon Israel lap seni om kopwe souasor ngeni chon leimwen eman mwän chök?” 20 Ren ekei kapas ewe souasor a fokun pwapwa lon lelukan. A angei ewe efot, ekewe uluulun anün leimw me ewe uluulun anü mi fal o eti ekewe aramas.
21 Mürin, ekewe aramas ra kul o feila, nge nöür semirit, nöür man me pisekir ra akom mwer. 22 Iwe, lupwen ra toauela seni imwen Maika, Maika a kökkörawu ekewe mwän mi nom lon ekewe imw lükün imwan, pwe repwe tapweri ekewe chon Tan. Iwe, ra kan ngeni ekewe chon Tan 23 o leüömong le kökkö ngeniir. Nge ir ra kulsefäl o aisini Maika, “Met om osukosuk, pwe ka tapwerikem me om ei mwich?” 24 Nge Maika a pälüeniir, “Pwota oua fen aisiniei met ai osukosuk? Ämi oua angei ai kewe kot üa föriir me nei we souasor o süla far.” 25 Iwe, ekewe chon Tan ra üreni, “Kosap anini ngenikem pwe mwän mi nisosong rese turufuk o nikemiila me chon leimwom.” 26 Mürin, ekewe chon Tan ra feila won aler. Nge lupwen Maika a küna pwe ra kon pöchökül mwan, a kul o liwinsefäl ngeni lenian. 27 Mürin än ekewe chon Tan angei mine Maika a föri pwal nöün we souasor ra feila Lais, ra tori eu mwichen aramas mi mosonoson, resap ekieki pwe eman epwe maun ngeniir. Iwe, ra nirela ren ketilas o kenala ewe telinimw. 28 Esap wor eman mi angaseer, pun ar telinimw a toau seni Siton, resap pwal chiechi ngeni mwo eman. Iwe, Lais a nom lon ewe lemol arap ngeni Pet-rehop. Nge ekewe chon Tan ra aüsefälietä ewe telinimw o imweimw lon. 29 Iwe, ra aita ngeni ewe telinimw Tan, iten mwirimwirin ar we lewo nöün Israel we. Nge iten ewe telinimw me mwan Lais. 30 Iwe, ekewe chon Tan ra aütai ewe uluulun anü mi fal pwe repwe fel ngeni, nge Jonatan me nöün kewe mwän pwal mwirimwirir ra souasor ngeni ewe ainangen Tan tori fansoun ar oola seni ewe fanü. Iwe, Jonatan nöün Kersom we mwän, nge Kersom nöün Moses mwän. 31 Nge förien Maika we uluulun anü mi fal a nom ikenan lon ükükün fansoun ewe imwen Kot a nom lon Silo.

*18:12: wewen Mahane-tan lenien chon Tan