8
Mürin, ekewe re Efraim ra üreni Kition, “Pwota ka föri ei ngenikem pwe kosap körikem, lupwen ka feila maun ngeni chon Mitian?” Iwe, ra fokun anini ngeni. Nge Kition a üreniir, “Met ngang üa föri epwe fen nönnö ngeni mine ämi oua föri? Ifa usun, esap mürina rusien chon Efraim föün irän wain mürin fansoun räs, lap seni resin föün irän wain än chon ewe eterekesin Apieser? Kot a fangelong lepöümi ekewe samolun Mitian iter Orep me Seep. Met ngang üa tongeni föri epwe fen nönnö ngeni mine ämi oua föri?” Mürin an üreniir ekei kapas, ar song a kisikisitiu.
Kition a liapeni ekewe kingen Mitian
8.4-21
Iwe, Kition me ekewe ülüpükü mwän mi eti ra tori ewe chanpupu Jortan o pwerela pekilan. Ra malülü, nge ra chök tapweriir. Lupwen ra tori Sukot, Kition a üreni mwänin ewe telinimw, “Ouse mochen oupwe ngeni nei kei sounfiu ekoch fochun pilawa. Ra fokun malülü, nge ngang üa chüen mochen tapweri ekewe kingen Mitian iter Sepa me Salmuna.” Kölf 83.11 Nge ekewe meilapen Sukot ra apasa, “Ifa usun, ka fen liapeni Sepa me Salmuna, ina äm aipwe wisen ngeni noum kewe sounfiu pilawa?” Mürin, Kition a üreniir, “Iwe, ina. Lupwen ewe Samol mi Lapalap epwe mwüt ngeniei pwe üpwe liapeni Sepa me Salmuna, üpwe atatakisi fitukemi ngeni ekewe iräfölüföl seni lon fanüapö, pwal ngeni ekewe nikouloul.” Iwe, seni ikenan Kition a feitä Penuel o kapas ngeni ekewe re Penuel ekewe chök kapas. Nge ir ra pwal pälüeni usun chök än ekewe re Sukot pälüen. Iei mine Kition a üreni ekewe re Penuel, “Lupwen üpwe liwinto fän kinamwe, üpwe atai ei imw tekia.”
10 Iwe, Sepa me Salmuna ra nom Karkor ren nöür sounfiu, ina epwe ükükün engol me limungeröü mwän, ikkei ir lusun ewe mwichen sounfiu seni ötiu. Pun ra mäla ükükün ipükü rüe ngeröü sounfiu mi sile maun won ketilas. 11 Iwe, Kition a feitä won alen ekewe aramas mi imweimw lon imw mangaku peliötiuen Nopa me Jokpeha o maun ngeni ekewe sounfiu, lupwen ra tümwününgauela. 12 Iwe, Sepa me Salmuna ekewe kingen Mitian ra sü. Nge Kition a tapweriir o liapeniir, a pwal fokun aniuokusu nöür kewe sounfiu pwe ra toropasfeil.
13 Mürin, Kition nöün Joas we mwän a liwinto seni maun me won palen Heres. 14 Iwe, a liapeni eman alüalün Sukot o aisini iten ekewe meilap me souakomwen Sukot. Iwe, ewe alüal a makeetiu iten fik me füman mwän. 15 Mürin, Kition a feito ren ekewe re Sukot o üreniir, “Nengeni, ikkei ir Sepa me Salmuna, ekewe oua turunufaseei rer ren ämi apasa, ‘Ifa usun, ka fen liapeni Sepa me Salmuna, ina äm aipwe wisen ngeni noum kewe sounfiu mi malülü pilawa?’ ” 16 Iwe, Kition a angei ekewe souakomwen ewe telinimw Sukot o wichiir ren iräfölüföl seni lon fanüapö, pwal ren nikouloul. 17 A pwal atai ewe imw tekia lon Penuel o niela mwänin lon ewe telinimw.
18 Mürin, Kition a aisini Sepa me Salmuna, “Ifa lapalapen ekewe mwän oua nirela me lon Tapor?” Nge ir ra pälüeni, “Ir ra chök usum, eman me eman leir a lapalapeni lapalapen eman nöün king.” 19 Iwe, Kition a üreniir, “Ir pwii, nöün inei. Mwo manauen ewe Samol mi Lapalap, are ousap nirela, üsap pwal nikemiila.” 20 Mürin, a üreni Jeter nöün mwänichi, “Kopwe ütä o niir.” Nge ewe ät esap ütti nöün ketilas, pun a niuokus pokiten i a chüen kükün. 21 Iwe, Sepa me Salmuna ra üreni Kition, “Kopwe püsin ütä o nikeemila. Pun a nom reöm pöchökülen eman mwän.” Iei mine Kition a ütä o niela Sepa me Salmuna, a pwal angei ekewe fout mi lapalapeni lapalapen epek maram, ra nom won üen nöür kamel.
Än Kition föför me an mäla
8.22-35
22 Mürin, ekewe re Israel ra üreni Kition, “Kopwe nemenikem, ämi me mwirimwirum kana. Pun en ka angasakem seni chon Mitian.” 23 Nge Kition a üreniir, “Üsap nemenikemi, nge nei mwän esap pwal nemenikemi. Ewe Samol mi Lapalap epwe nemenikemi.” 24 Iwe, Kition a pwal üreniir, “A wor ai tüngor ngenikemi. Eman me eman leimi epwe ngeniei liapan iering seni mine oua liapeni.” Pun ekewe sonfiun Mitian ir mwirimwirin Ismael ra soun nöünöü iering seni kolt. 25 Iwe, ra üreni, “Äm aipwe pwapwa le ngonuk.” Iwe, ra emeresala echö mangaku, nge eman me eman mwän a uwätiu lon liapan iering. 26 Iwe, choun ekewe iering seni kolt Kition a tüngor ina epwe ükükün faik me ülüngat paun kolt. Nge esap alealong ekewe fout mi lapalapeni lapalapen epek maram, ekewe fouten fän üw, ekewe üf mi parachol ekewe kingen Mitian ra üföüf, pwal ekewe afouten won üen nöür kamel. 27 Iwe, Kition a föri seni ewe kolt echö üf itan efot o iseni lon an telinimw itan Ofra. Iwe, chon Israel meinisin ra likitala Kot o fel ngeni ewe efot ikenan. Ewe efot a pwal wiliti eu lenien likatup ngeni Kition me an famili. 28 Iei usun chon Mitian ra kuf ren ekewe aramasen Israel, pwe resap chüen ü ngeniir. Iwe, a wor kinamwe lon ewe fanü lon ränin manauen Kition lon ükükün faik ier.
29 Mürin, Kition nöün Joas we mwän a feila o nonom lon püsin imwan. 30 Nge mi wor ükükün fik nöün Kition mwän ir wesewesen nöün, pun a wor chomong pwülüan. 31 Iwe, a wor eman ülüpwülüan mi nom Sikem, a pwal nöüni me won eman ät. Nge Kition a aita ngeni Apimelek. 32 Iwe, Kition nöün Joas we mwän a mäla lupwen a fokun chinlap. Ra peiaseni lon peiasen Joas seman we me lon Ofra telinimwen chon ewe eterekesin Apieser.
33 Mürin chök än Kition mäla, ekewe aramasen Israel ra kulsefäl seni Kot o fel ngeni ekewe anü Paal, ra pwal filätä Paal-perit pwe ar kot. 34 Iwe, ekewe aramasen Israel resap chüen angang ngeni ewe Samol mi Lapalap ar we Kot mi amanaueer seni chon oputer meinisin mi nom pwelin ünükür. 35 Resap pwal kirikiröch ngeni ewe familien Jerupaal, iei i Kition, fän iten ekewe föför mi mürina meinisin a föri ngeni chon Israel.

8:5: Kölf 83.11