Paipel SOUKAPWÜNG 5
5
Än Tepora me Parak köl
5.1-31
Iwe, lon ewe ränin, Tepora me Parak nöün Apinoam we mwän ra köl ei köl:
“Sipwe mwareiti ewe Samol mi Lapalap
fän iten ekewe souemwen mi emweni chon Israel,
fän iten ekewe aramas mi fangala inisir ren mochenin letiper.
 
Oupwe rongorong ämi king,
oupwe aü selingemi ämi samol,
üpwe köl ngeni ewe Samol mi Lapalap,
üpwe kölün mwareiti ewe Samol mi Lapalap ewe Koten Israel.
 
Lupwen ka feila seni ewe chuk Seir, en Samol mi Lapalap,
lupwen ka karis seni ewe fanü Etom,
fanüfan a chechech o läng a apüngätiu üt,
ewer, ekewe kuchu ra apüngätiu koluk.
Ekewe chuk ra chechech fän mesen ewe Samol mi Lapalap,
ewe chuk Sinai a chechech fän mesen ewe Samol mi Lapalap ewe Koten Israel. Eks 19.18
Lon ränin Samkar nöün Anat we mwän,
lon ränin Jael
ekewe mwichen aramas me man mi sai resap chüen sai,
nge ekewe chon sai ra fetal won al mi chökis.
Ekewe sop lon Israel ra pön, ewer,
ra pön tori en Tepora ka ütä,
ka ütä pwe kopwe eman inelap lon Israel.
Lupwen chon Israel ra filätä ekewe kot mi fö,
maun a tolong lon fanüer.
Ifa usun, a wor ren faik ngeröü sounfiun Israel
tittin maun ika siles?
Lelukei a pwapwa ren ekewe meilapen Israel,
pwal ren ekewe aramas mi fangala inisir ren mochenin letiper.
Sipwe mwareiti ewe Samol mi Lapalap.
 
10 Ämi mi wawa aas mi pwechepwech,
ämi mi mot lon planket mi fokun mürina,
pwal ämi mi fetal won al, oupwe köl.
11 Oupwe aüseling tikin musik arun ekewe chönüttu.
Ikenan ra kakapasen mwareiti än ewe Samol mi Lapalap föför mi pwüng,
an pwora me win lon ekewe sop lon Israel.
Mürin, nöün ewe Samol mi Lapalap aramas ra karisitiu ngeni asamalapen ar kewe telinimw.
 
12 Kopwe pwätä, kopwe pwätä en Tepora.
Kopwe pwätä, kopwe pwätä o chietä echö köl.
Kopwe ütä, en Parak nöün Apinoam we mwän,
kopwe emwenala noum kewe chon oola.
13 Ekewe lusun aramas tekia ra karisitiu,
nöün ewe Samol mi Lapalap aramas ra karisitiu rei pwe repwe maun ngeni ekewe chon pwora.
14 Ra feitiu seni ewe fanü Efraim,
ir chokewe mi nonom lon fanüen chon Amalek,
nge chon ewe ainangen Peniamin ra tapweto müriir.
Iwe, ekewe meilap ra karisitiu seni Makir,
nge chokewe mi nemenem ra karisitiu seni Sepulon.
15 Ekewe samol seni chon ewe ainangen Isakar ra eti Tepora.
Ewer, chon ewe ainangen Isakar ra eti Parak.
Ra sätiu mürin lon ewe lemol.
Nge chon ewe ainangen Rupen ra kakapasfengen
usun met repwe föri.
16 Pwota oua chök nonom lon ekewe lenien sip
pwe oupwe rongorong tikin aangün fän iten ekewe pwiin sip?
Ewer, chon ewe ainangen Rupen ra kakapasfengen
usun met repwe föri.
17 Chon ewe ainangen Kat ra chök nonom peliötiuen ewe chanpupu Jortan.
Nge pwota chon ewe ainangen Tan ra chök nonom ren ekewe sip?
Pwal chon ewe ainangen Aser ra chök nonom aroset
lon ekewe lenien ilen sip.
18 Nge ekewe aramasen Sepulon me Naftali
ra fangala manauer lon feiengauen mäla lon ekewe lenien wiirasen maun mi tekia.
 
19 Ekewe king ra feito o maun.
Ekewe kingen Kanaan ra maun me lon Taanak arun ekewe kolukun Mekito.
Nge esap wor liaper silifer.
20 Ekewe fün läng ra maun,
ekewe fü mi mwökütfeil ra maun ngeni Sisera.
21 Pupun ewe chanpupu Kison a opurela,
pupun ewe chanpupu Kison mi pumong.
Üpwe kakaris fän pöchökül.
 
22 Mürin, chopuchopun pechen ekewe oris ra chopumong ren ar sässä,
pokiten chon wawa ra süsüla.
23 ‘Oupwe anümamaua chon ewe telinimw Meros,’ nöün ewe Samol mi Lapalap chon läng a apasa.
‘Oupwe fokun anümamaueer, pun resap feito pwe repwe alisi ewe Samol mi Lapalap
le maun ngeni ekewe chon pwora.’
 
24 Iwe, epwe fokun feiöch Jael
pwülüen Heper ewe re Ken,
epwe fokun feiöch me lein ekewe fefin mi imweimw lon imw mangaku.
25 Sisera a tüngor seni koluk, nge neminewe a ngeni milik,
a uwato ren soon milik lon eu sepien samol.
26 A angei ewe chüfölün imw,
a pwal angei ewe ama won pöüifichin.
Iwe, a amaani Sisera o amökkü möküran,
a posu o atatakisi esen mongön.
27 Sisera a mwörürütiu,
a turula arun pechen neminewe.
A mwörürütiu arun pechen o turula,
nge ewe ia a turula ie, ikenan a mäla.
 
28 Iwe, inen Sisera a nennewu lefichen asammwachon imwan,
a nennewu me lon ewe asammwacho o urä,
‘Pwota wän Sisera woken a mang le feito?
Pwota chopuchopun pechen orisin wan woken resamwo chopuchoputo?’
29 Nge eman me lein ekewe finesamol mi fokun tipachem a pälüeni,
ewer, a püsin pälüeni an kapas ais,
30 ‘Ifa usun, resap küna o aineti liaper?
Iteiten eman me eman sounfiu epwe angei eman föpwül ika ruoman.
Ra liapeni mangaku mi anüepat fän iten Sisera,
ra liapeni mangaku mi anüepat o chü,
ruachö mangaku mi anüepat o chü fän iten üei.’
 
31 Ai Samol mi Lapalap, iei usun repwe rosola chon oputom meinisin.
Nge chokewe mi echenuk repwe usun chök akkar, lupwen a tötä fän lingan.”
Iwe, a wor kinamwe lon ewe fanü lon ükükün faik ier.

5:5: Eks 19.18