Paipel JAMES 5
5
Kapasen fön ngeni ekewe chon pisekisek
5.1-6
Iwe, iei oupwe aüselinga, ämi aramas mi pisekisek! Oupwe kechü o ngüngüres usun ekewe riaföü repwe torikemi. Pisekimi ra kiroula, nge pwötür ra äni üfemi. Ämi kolt me silifer ra parangela, nge ei parang epwe atipisikemi o änala fitukemi usun chök än ekkei kenala mettoch. Oua achukuchukatä pisekimi lon ekei ränin lesopolan. Mat 6.19 Ousap ngeni ekewe chon angang mi angang ngeni ämi kewe mälämäl liwinin ar angang. Oupwe aüseling ngeni ar lalangau! Än ekewe chon kini ämi kewe räs siöngau a tori selingen Kot, ewe Samol mi Unusen Manaman. Tut 24.14-15 Oua manaueni eu manau mi fokun mecheres won ei fanüfan, oua pwal eäni pwapwan fanüfan. Oua püsin föri met oupwe kitinup ren fän iten ewe ränin ninnila. Oua atipisi o niela ekewe aramas esap wor ar tipis, nge ir resap ü ngenikemi.
Usun ach sipwe mosonotam o iotek
5.7-20
Iei mine ämi pwii kana, oupwe mosonotam tori ach Samol epwe war. Oupwe nenengeni usun än eman chon tanipi mosonotam le witiwiti pwe fanüan epwe awora ua mi fokun aüchea. A mosonotam le witiwit an epwe püngütiu ewe üten leräs me üten lefeng. Iei usun pwal ämi, oupwe mosonotam o anüküchara letipemi, pun waren ach Samol a arapoto.
Ämi pwii kana, ousap lalefengen lefilemi, pwe Kot esap apwüngükemi. Ewe Soukapwüng a ütä arun asam. 10 Ämi pwii kana, oupwe chechemeni ekewe soufos mi kapas fän iten ach Samol. Oupwe eäniir lenien apirü lon ar mosonotam me likitü fän ekewe riaföü. 11 Sia apasa pwe ir chon feiöch pokiten ar likitü. Oua rongorong usun än Hiop likitü, oua pwal silei met ach Samol a amolätä fän itan lesopolan. Pun ach Samol a uren kirikiröch me tong. Hiop 1.21-22; 2.10; Kölf 103.8
12 Ämi pwii kana, mwen mettoch meinisin, ousap pwon fän akapel. Ousap ö: pölü läng ika fanüfan ika och mettoch. Are oua apasa “Ewer”, epwe enletin ewer, nge are oua apasa “Apw”, epwe enletin apw, pwe ousap tolong lon än Kot kapwüng. Mat 5.34-37
13 Iö me leimi a nom lon weires? Epwe iotek. Iö me leimi a pwapwa? Epwe kölün mwareiti Kot. 14 Iö me leimi a samau? Epwe titi ekewe souakomwen mwichefel, pwe repwe iotek won o epiti ngeni lö seni föün olif fän iten ach we Samol. Mark 6.13 15 Iwe, ei iotekin lükülük epwe apöchöküla ewe chon samau. Ach Samol epwe apwäki, nge ekewe tipis a föriir repwe musala. 16 Iei mine oupwe pwärifengeni ämi tipis kana, eman ngeni eman o iotekifengenikemi, pwe oupwe pöchökületä. Än eman chon pwüng iotek a manaman o a fokun pwönüetä. 17 Elias eman aramas usun chök kich. A tiliken lon an iotek pwe esap püng üt, iwe, esap püngütiu üt lon ükükün ülüngat esop ier won ewe fanü. 1.King 17.1; 18.1 18 Mürin a pwal ioteksefäl, iwe, läng a apüngatiu üt o ewe fanü a awora uän irä. 1.King 18.42-45
19 Ämi pwii kana, are eman me leimi epwe tokola seni mine a let, nge eman epwe aliwinisefäli, 20 oupwe chechemeni ei: Iö a aliwinisefäli eman chon tipis seni alan mi mwäl, epwe amanaua ewe chon tipis seni mäla o epwe pwölüela chomong tipis.

5:3: Mat 6.19

5:4: Tut 24.14-15

5:11: Hiop 1.21-22; 2.10; Kölf 103.8

5:12: Mat 5.34-37

5:14: Mark 6.13

5:17: 1.King 17.1; 18.1

5:18: 1.King 18.42-45