Paipel AISEA 64
64
Amwo kopwe kamwefeseni läng o feitiu rem. Ekewe chuk repwe chechech me mwom, usun chök koluk mi pur lon nape, lupwen a nom won ekkei. Kopwe feitiu o alinga itom ngeni ekewe chon oputok, nge chon ekewe mwü repwe chechech fän mesom. Lupwen ka feitiu o föri mettoch mi eniwokus, aisap ekieki usun me mwan pwe kopwe föri, ekewe chuk ra chechech me mwom. Seni me lomlom esap wor eman a rongorong ika küna eman Kot usun en mi föri sokun föför ngeni ir mi anomu ar apilükülük womw. 1.Kor 2.9 En ka etiwa chokana mi pwapwa le föri mine a pwüng, chokana mi chechemeni mine ka mochen pwe repwe föri. En ka songeitikem, nge aia chök sopwela le föri tipis. Iwe, fansoun langatam aia nonom lon tipis. Ifa usun, äm aipwe tongeni küna manau?
Äm meinisin aia usun chök eman aramas mi limengau, äm föförün pwüng meinisin ra usun chök mekipwülün sof mi fokun limengau. Äm meinisin aia aiolol usun chön irä, nge äm tipis a ässikeemila usun asepwäl a ässala mettoch. Esap wor eman a köri itom, esap pwal wor eman a achocho le kammwöch womw. Iwe, ka aopa mesom senikem, ka pwal asechikeemila lon feiengau pokiten äm föföringau.
Äm Samol mi Lapalap, en Semelapem. Äm ai usun chök pwül, nge en ka usun chök ewe chon föri sepi. Äm meinisin förien poum. Kosap fokun songomong ngenikem. Äm Samol mi Lapalap, kosap pwal chechemeni äm tipis tori feilfeilachök. Kose mochen kopwe nenengenikem, pun äm meinisin noum aramas. 10 Om kewe telinimw mi pin ra wiliti eu fanüapö. Iwe, Jerusalem a wiliti eu lenien tatakis o pön. 11 Iwe, äm imwenfel ewe leni mi pin o fokun ling, ia äm kewe lewo ra mwareituk ie, a kar ren ekkei. Leniem meinisin mi mürina ra tala. 12 Ifa usun, kopwe chüen sap senikem, lupwen ka küna äm kewe feiengau? Äm Samol mi Lapalap, ifa usun, kopwe chök sopwela le fanafanala o akafeiengauakem ren ei feiengau ese wor aükükün?

64:4: 1.Kor 2.9