Paipel AISEA 57
57
Iwe, ekewe chon pwüng ra mäfeiengau, nge esap wor eman a ekieki usur. Ekewe chon lükü Kot ra mäla, nge esap wor eman a silei popun. Iwe, ekewe chon pwüng ra mäla mwen ewe ränin feiengau a war, pwe repwe tolong lon kinamwe, nge chokewe mi fetal fän pwüng ra kon o asösö lon peiaser.
Oupwe etto, ämi nöün eman sourong fefin, ämi nöün ekewe mwän mi lisowu me ekewe fefin mi amömö insir fän iten angangen lisowu. Iö oua takiri? Iö oua ämängaua o achönaw ngeni? Ifa usun, sap ämi nöün chon tipis pwal mwirimwirin chon chofana? Ämi oua mocheisoufengen lefilemi, lupwen oua fel ngeni ekewe uluulun anümwäl fän ekewe irä ook, pwal fän sokun irä mi mwuresires, oua pwal eäni asor nöümi semirit lon ekewe lemol, pwal fän ekewe säpereperen achau. Oua angei fau mi motoutou seni lon öüwö o fel ngeniir pwe ämi Kot. Oua ninätiu wor asoren ün o uwato wor asoren mongö. Ifa usun, ngang üpwe pwapwaiti ei sokun föför? Oupwe feitä won ekewe chuk mi tekia, pwe oupwe lisowu o föri ämi asor. Iwe, aropen ämi kewe asamalap me lon oua iseni ämi uluulun anümwäl. Lupwen oua pöütieila, oua ameresala kiemi o konola won, oua tipeeufengen me nöümi kewe kamwet won liwinin ar repwe kon remi, oua pwal sani ar föför ngenikemi o nenengeni ar selela. Iwe, oua sai pwe oupwe uwala noppuk ren Molok, oua pwal achomonga epitemi lö mi pwokus, oua tinala toau nöümi chon künö tori mwo nge lon lenien sotup, pwe repwe kütta ämi kot oupwe tongeni fel ngeniir. 10 Oua malülü pokiten ämi saitam, nge ousap apasa, “Esap wor lomotan.” Ousap achanü, pun oua pöchökülsefäl iteiten fansoun.
11 Iwe, ewe Samol mi Lapalap a apasa, “Iö oua niueiti pwe oua chofana ngeniei, ousap pwal chechemeniei ika ekieki usi? Ifa usun, sap ren ai fanafanala ngenikemi fansoun langatam, iei popun ousap niueitiei? 12 Ämi oua ekieki pwe mine oua föri a pwüng, nge ngang üpwe pwärawu ämi föför, nge ämi uluulun anümwäl resap tongeni alisikemi. 13 Ifa usun, ämi kewe uluulun anümwäl repwe angasakemi, lupwen oua siö ngeniir fän leüömong? Iwe, asepwäl epwe ässirela, nge enienin ngasangas epwe pönirela. Nge chokewe mi eäniei lenien op repwe fanüeni ewe fanü, repwe pwal chukuni chuki mi pin.”
Kot a alisi o amanaua nöün aramas
57.14-21
14 Iwe, Kot epwe apasa, “Oupwe föri, oupwe föri efoch al o amolla. Oupwe angei föün lon pwe resap epeti ewe al nei aramas repwe fetal lon.” 15 Pun iei alon Ewe mi Unusen Tekia, ewe mi manau tori feilfeilachök, itan Ewe mi Pin, “Ngang üa imweimw lon eu leni mi pin o tekia, pwal ren eman mi luketatakis o tipetekison, pwe üpwe amanaua ngüngün chon tipetekison o apöchöküla leluken chon liamam. 16 Iwe, üsap pälüeniir feilfeilachök, üsap pwal songeitiir fansoun meinisin. Pun are üpwe föri iei usun, ekewe aramas üa föriir repwe mäla, enienin ngasangaser üa awora epwe müchüla. 17 Iwe, üa song ngeni nei aramas pokiten ar tipisin mochenia, iei mine üa apwüngüür o amona mesei seniir. Nge ir ra chök sopwela le föri letiper. 18 Iwe, üa küna föförür meinisin, nge üpwe chök amanaueer. Üpwe emweniir o fokun achipeer. Üpwe pwal aururu ir mi letipeta o föri pwe repwe mwareitiei. 19 Iwe, üpwe awora kinamwe, kinamwe ngeni chokewe mi toau pwal ngeni chokewe mi arap, üpwe fokun amanaueer,” iei alon ewe Samol mi Lapalap. Ef 2.17 20 “Nge ekewe chon föföringau ra usun chök nonoon lematau esap tongeni pos, pwe a chök kuar ren nonoon lon, a kümetätä pwakak me limengau. 21 Iwe, ekewe chon föföringau esap wor ar kinamwe,” iei alon ai Kot. Ais 48.22

57:19: Ef 2.17

57:21: Ais 48.22