Paipel AISEA 55
55
Än Kot ümöümöch ngeni aramas meinisin
55.1-13
Ewe Samol mi Lapalap a apasa,
“Ou etto, ämi meinisin mi kaka,
oupwe feito o ün seni ewe koluk.
Ämi mi wöüngauen moni,
oupwe feito o angei enemi.
Oupwe feito o angei ünümemi wain me milik,
nge ousap möni. Pwär 21.6; 22.17
Pwota oua mochen püngütiu moni fän iten mettoch ousap tongeni mongö?
Pwota oua angang weires fän iten mine ousap möt ren?
Oupwe fokun aüselingaei o föri mine üa ürenikemi.
Iwe, epwe wor enemi mongö mi annö,
oupwe pwal pwapwaiti uän ewe fanü mi fokun chomong.
Oupwe aü selingemi o feito rei.
Oupwe rongorong pwe ngünümi epwe manau.
Iwe, ngang üpwe föri eu pwon esemüch ngenikemi
o apwönüetä ai ümöümöch me tong usun üa fen pwon ngeni Tafit. Föf 13.34
Nengeni, üa awisa pwe epwe souemwen me samolun mwü kana,
epwe pwärätä ngeni aramasen fanüfan ai manaman.
Iwe, kopwe köri chon ekewe mwü kosamwo sileer me mwan,
nge chon ekewe mwü resamwo sileek repwe müttir feito reöm
pokiten ngang ewe Samol mi Lapalap om we Kot,
Ewe mi Pin lon Israel,
pun ngang üa alingok.”
 
Oupwe kütta ewe Samol mi Lapalap lupwen fansoun oua tongeni küna,
oupwe köri, lupwen a arap.
Chon föföringau repwe likitala ar föför,
nge chon pwüngingau kana repwe siwili ar ekiek.
Repwe liwiniti ewe Samol mi Lapalap pwe epwe tongeäsiniir.
Repwe kuliti ach Kot, pun a müttir le amusala tipis.
Iwe, iei alon ewe Samol mi Lapalap,
“Ai ekiek resap wewe ngeni ämi ekiek kana,
nge ämi al resap wewe ngeni ai al kana.
Pun usun läng a tekia seni fanüfan,
iei usun ai al ra tekia seni ämi al kana,
nge ai ekiek seni ämi ekiek kana.
 
10 Iwe, usun rän me snow ra püngütiu me läng,
nge resap liwintä, pwe repwe mwo achönü pwül
o aräsi fanü o apwükü irä,
epwe pwal wor fotän chon fofot me enen chon mongö, 2.Kor 9.10
11 iei usun ai kapas esap liwinto rei fän pön,
pwe epwe afisätä mine üa tipeni
o apwönüetä mine üa akünöü ngeni.
 
12 Iwe, oupwe towu seni Papilon fän pwapwa
o feila fän kinamwe.
Chukutekia me chukutekison repwe chietä köl me mwemi,
nge irän lemäl meinisin repwe alopolop.
13 Iwe, irä saipires repwe märitä lon lenien iräfölüföl,
nge mwoosor repwe mär lon lenien lantana.
Ei epwe eu asisil esap mola tori feilfeilachök,
nge ngang ewe Samol mi Lapalap üpwe iteföüla ren.”

55:1: Pwär 21.6; 22.17

55:3: Föf 13.34

55:10: 2.Kor 9.10